எம்முன்னுள்ள சவால்களை வெற்றிக்கொள்ள முழு சமூகமும் முன்வரவேண்டும்' - றிசாத்

(இர்ஷாத் றஹ்மத்துல்லா)

எமக்கு முன்னால்  உள்ள சவால்களை வெற்றிக் கொள்வதற்கு ஒரு அமைச்சராலோ அல்லது பாராளுமன்ற உறுப்பினராலோ முடியாது, முழு சமூகமும் முன்வரவேண்டிய காலம் எற்பட்டுள்ளதாக அகில இலங்கை மக்கள் காங்கிரஸ் தலைவரும்,அமைச்சருமான றிசாத் பதியுதீன் தெரிவித்துள்ளார்.

புத்தளம் தில்லையடியில் இடம் பெற்ற சந்திப்பொன்றின் போதே அமைச்சர் மேற்கண்டவாறு கூறினார்.மேலும் அமைச்சர் றிசாத் பதீயுதின் கருத்துரைக்கும் போது,,

இடம் பெயர்ந்த சமூகத்திற்கு என்னால் ஆன அனைத்து பணிகளையும் ஆற்றிவருகின்றேன்.மக்களுக்கான தேவைகளை பெற்றுக் கொடுக்க முயற்சிகளை மேற்கொள்கின்ற போது அதற்கு பல தடைகள் ஏற்படுத்தப்படுகின்றன. அதனையும் தாண்டி எமது அரசியல் பலத்துடன் செல்ல முயற்சிக்கின்ற போதும்,எமது இலக்கை அடைய முடியாதுள்ளது.இன்று எமது சமுகத்தில் இருக்கும் துறை சார்ந்தவர்களும் ஒன்று பட்டு இந்த முயற்சியினை முன்னெடுக்க முன்வரவேண்டும்.

இன்று எதனை நாம் செய்தாலும், அதற்கு இனவாத சாயம் பூசி அதன் மூலம் இனங்களுக்கியைடில் முரன்பாடுகளை தோற்றுவிக்க முயற்சிக்கின்றனர். இதன் மூலம் இன மோதல்களை ஏற்படுத்தி மீண்டும் மக்கள் அச்ச சூழ்நிலையி்ல் ஆழ்த்துவதற்கு முயற்சிக்கின்றனர்.இவ்வாறான சந்தர்ப்பங்களில் கற்றவர்கள் இவற்றை சரியாக சகோதர சமூகத்தின் மத்தியில் தெளிவுபடுத்தும் பணியினை செய்ய வேண்டும்.எனக்கு என்ன போச்சுது என்ற பொறுப்பற்ற பதிலை எவரும் கூற முற்படக் கூடாது.

நாட்டில் காணப்பட்ட அச்ச சூழ்நிலை அகன்றுள்ளது. இந்த சூழல் எற்படுமா என்று எம்மில் எத்தனையோ பேர்கள் கேள்விகளை எழுப்பியிருப்போம். இன்று ஏற்பட்டுள்ள அந்த சூழலை எவ்வாறு தக்க வைத்துக் கொள்வது என்பது குறித்து சிந்தணை செய்வதுடன்,அதற்கான முயற்சிகளை தாமாக முன்வந்து செய்ய முன்வரவேண்டும்.சிறந்ததொரு சமூகத்தினை உருவாக்கும் பொருப்பு ஆசிரியர்களிடம் ஒப்படைக்கப்பட்ட அமானிதம்,அதனை உரிய முறையில் பாதுாக்க வேண்டும் என்றும் அமைச்சர் றிசாத் பதியுதீன் கூறினார்