மத்திய மாகாண சபைத் தேர்தலும், 'தம்புள்ளை முதல் மஹியங்கனை வரையான' மந்திரமும்

(ஜே.எம்.ஹாபீஸ் - மூத்த ஊடகவியலாளர்)

எதிர்வரும் மத்திய மாகாண சபைத் தேர்தலில் மடவளை மற்றும் அக்குறணை வாழ் மக்களுக்குக் ஒரு தார்மீக் பொறுப்பு உண்டு. இதுகாலவரை அதனைப் பயன்படுத்தியது போல் இம்முறையும் சரியாகப் பயன்படுத்திக் கொள்வதனால் முழு மாகாணத்திற்கும் கௌரவத்தை ஈட்டித்தரமுடியும்.

கிடைத்துள்ள அரிய சந்தர்ப்பத்தை விசேடமாக மடவளை மக்களும் (பாத்ததும்பறை தொகுதி முஸ்லிம்கள்) அவர்களுக்கு உதவியாக அக்குறணை மக்களும் முறையாகப் பயன்படுத்திக் கொள்ள வேண்டும். இதுபோன்ற ஒரு சந்தர்ப்பம் இனி எதிர்பார்ப்பது கடினம்.  அது ஏன் எப்படி என்ற வினாக்களை நாம் பலரிடம் தொடுத்த போது அவர்கள் கூறிய காரணம் பின்வருமாறு அமையப் பெற்றுள்ளது.

மத்திய மாகாணத்தைப் பொருத்தவரை கண்டி மாவட்டத்திற்கு அரசியல் ரீதியாக நல்ல பெயர் உள்ளது. அது முஸ்லிம் வாக்காளர்களுக்கு மத்தியிலும் இல்லாமல் இல்லை. காரணம் மத்திய மாகாண சபை அமைக்கப்பட்ட காலம் முதல் கண்டி மாவட்டப் பிரதி நிதி ஒருவரே முஸ்லிம் மாகாண அமைச்சராக வந்துள்ளார். (அப்துல் காதர், அப்துல் ஹலீம், அமீன், சாபி போன்றவர்கள்)

அத்துடன் கண்டி மாவட்டத்தில் தொடர்ந்து இரண்டிற்கு மேற்பட்ட முஸ்லிம்கள் அங்கத்தவர்கள் தெரிவாகி இருந்துள்ளமையும் குறிப்பிடத்தக்கது. இப்படிப் பல்வேறு விடயங்களைக் குறிப்பிடலாம். இவை அனைத்தையும்விட எங்களாலும் முடியும் என்ற வகையில் கடந்த பாராளுமன்றத் தேர்தலில் 4 அங்கத்தவர்கள் தெரிவாகினர். இவை அனைத்தும் கண்டி வாக்காளர்கள் புத்திசாலிகள் என்பதனைக் காட்டி வருகிறது.

சரி இன்னும் சிலவாரங்களில் இடம் பெறப்போகும் மத்திய மாகாண சபையைப் பொருத்தவரையும் சில அரூடங்கள் கூறப்படுகின்றன. அதன்படி பார்க்குமிடத்து ஐ.ம.சு.முன்னணி வெற்றி பெற்றாலும் கூட ஐ.தே.க. சார்பாகப் போட்டியிடும் முஸ்லிம்களில் மூன்று அல்லது நால்வர் தெரிவாகலாம் என்ற கருத்து பலமாக உள்ளது. ஒரு சிலரின் கூற்றுப்படி ஒரு கட்சி சார்பாகப் போட்டியிடும் 32 அபேட்சகர்களில் ஐ.தே.க. மூலம் ஐவர் தெரிவானாலும் கூட அதில் நான்கு பேர் முஸ்லிம்களாக இருக்க சாத்தியம் உண்டு என்பதாகும்.

காரணம் 'தம்புள்ளை முதல் மஹியங்கனை வரையான' மந்திரத்தை ஜெபித்து ஜெபித்து மக்களது மனங்கள் பண்பட்டுள்ள சந்தர்ப்பமாகும். அதே நேரம் ஸ்ரீல.மு.கா.ஐ நம்புவதற்கும் மக்கள் தயக்கம் காட்டி வருகின்றனர். எனவே கண்டி மாவட்ட முஸ்லிம்களின் வாக்குகள் அதிகம் ஐ.தே.க.ன் பக்கமே சரிய ஆரம்பித்துள்ளது. மறு புறம் ஐ.தே.க. சார்பாக பேரின சமுகம் ஒட்டு மொத்தமாக ஒருவருக்கு அல்லது இருவருக்கு விருப்பு வாக்குகளை அள்ளி வழங்கக் கூடிய அமைப்பு இல்லை. இதனால் முஸ்லிம்களுக்கு சந்தர்ப்பம் அதிகம் எனக் கணித்துள்ள நிலையையே அதிகமானோர் தெரிவிக்கின்றனர்.

மேலும் கண்டியைப் பொருத்தவரை முஸ்லிமகள் அதிகம் வாழும் வலயங்களாக மூன்று பகுதிகளை இனம் காணலாம். (1) அக்குறணையும் அதன் சுற்று வட்டாரமும். (2) மடவளையும் அதன் அயற்கிராமங்களும் (உடதலவின்ன, வத்தேகெதர). (3) கம்பளையை மையமாகக் கொண்ட பகுதியாகும்(கெலிஓயா, உடுநுவர போன்றன). இதில் அதிகமானவர்கள் அக்குறணையையும் மடவளையையுமே முன் உதாரணமாகக் கொள்வர். அப்படியாயின் மடவளையும் அக்குறணையும் எக்கட்சிக்கு அதிகம் சார்பாக உள்ளதோ அக்கட்சியையே கண்டி முஸ்லிம்களில் அனேகர் இது காலவரை ஆதரத்ததுள்ளனர். இதன் காரணமாகவேதான் சிலர் இந்த மூன்று பிரதேசங்களில் ஒன்றை பூர்வீகமாகக் கொண்டு தேர்தலில் முன் நிற்கின்றனர். அல்லது மேலே சொன்ன மூன்றில் ஒன்றுதான் தமது ஊர்  என உரிமை கொண்டாடு கின்றனர். அது மட்டுமல்ல மத்திய மாகாண சபை மற்றும் பாராளுமன்றத் தேர்தல்கள் இரண்டையும் எடுத்துக் கொண்டால் வெற்றி பெற்றவர்கள் இந்த முன்று வலயத்தில் ஒன்றில் உள்ளடங்குகின்றனர். 

முன்னாள் மத்திய மாகாண சபை அங்கத்தவர் லாபீர் ஹாஜியார் மட்டுமே இதற்கு விதிவிலக்காக உள்ளார்.ஆனால் அவருக்கு இந்த மூன்று வலயங்களிலும் இருந்து கனிசமான ஆதரவு கிடைத்தது. ஏனைய அனைத்து பிரதிநிதிகளும் இந்த மூன்று வலயங்களில் ஒன்றிலிருந்துதான் உருவாகி இருக்கினறனர். (அமைச்சர் றவூப் ஹகீம், பிரதி அமைச்சர் பைஸர் முஸ்தபா ஆகியோர் இம்முன்று வலயத்தில் அடங்காவிட்டாலும் அவ்வாறான ஒரு மாயையும் ஏற்படுத்தியே வெற்றி பெற்றனர்). அமைச்சர் றவூப் ஹகீம் அண்மையில் பகிரங்கமாகச் சொன்னார் சிலர் எனது ஊர் மடவளை என்று நினைக்கும் அளவிற்கு எனக்கும் மடவளைக்கும் தொடர்பு உண்டு என்றார். 

அதனாற்தான் போலும் 10 பேர் தமது உயிரைத் தாரை வார்த்தனர். அதேபோல் பிரதி அமைச்சர் பைஸர் முஸ்தபாவும் செல்லுமிடமெல்லாம் 'மகே சீயாவன செய்யத் முஹம்மட் முஸ்தபாகே உபன்கம மடவல' (எனது பாட்டனார் செய்யத் முஹம்மத் முஸ்தபாவின் பிறந்த கிராமம் மடவலை) என்று அடிக்கடி பெருமையாகக் கூறிக்கொள்வார். இவர்களது வெற்றியைத் தீர்மானித்த காரணிகளில் இவையும் ஒன்றாகும்)

ஆனால் இதுகாலவரை மடவளையைப் பொருத்தவரை ஒரு பிரதேச சபைத் தலைவர் கூட மடவளையில் பிறக்கவில்லை. 

கம்பளையை மையமாகக் கொண்ட காதர் ஹாஜியார், றபீக் ஹாஜியார், அம்ஜட் ஹாஜியார், உவைஸ் ஹாஜியார், மர்ஜான் மாஸ்டர், நயீமுல்லா, அமுpன் ஹாஜியார், றவூப் ஹாஜியார் என்று பட்டியல் செல்கிறது. அதேபோல் அக்குறணையை மையமாகக் கொண்டு ஏ.ஸீ. சாகுல் ஹமீட், எம்.எச்,ஏ.ஹலீம், சாபி ஹாஜியார், ரிஸ்வி பாருக், உபைதுல்லா, போன்ற அரசியல் வாதிகளின் பிரவேசத்தைப் பார்க்கமுடியும். ஆனால் மடவளை இவ்வாறான ஒரு அரசியல் தலைமையை இதுகாலவரை உருவாக்கவில்லை.

அதற்கு சற்று தொலைவில் இருந்து பார்க்கும் போது ஜனாப் மஹ்மூத் றஹ்மத்துல் மலீக் மட்டும் சிலகாலம் பாத்ததும்பறைப் பிரதேச சபையில் பிரதித் தலைவராக இருந்தார். அவர் மத்திய மாகாண சபைத் தேர்தலில் போட்டியிட்டு வெற்றியின் வாயிலுக்கு வந்து கை நழுவியுள்ளார்.

இவர் 1997ம் ஆண்டு பாத்ததும்பறைப் பிரதேச சபையில் ஐ.தே.க.. சார்பாகப் போட்டியிட்டு சுமார் 5500 வாக்குகளைப் பெற்றார். பாத்ததும்பறைப் பிரதேச சபை அங்கத்தவர் ஒருவர் அவ்வருடம் பெற்ற அதி கூடிய வாக்குகள் அதுவாகும்.அதேபோல் 2002ம் ஆண்டும் 5918 வாக்குகளைப் பெற்று அதி கூடிய வாக்காகப் பதிவு செய்து கொண்டார். 2004ம் ஆண்டு காலப் பகுதியில் பிரதித் தவிசாளராகவும் இருந்தார்.

2004 ம் ஆண்டு மகாண சபைக்கு ஐ.தே.க. சார்பாகப் போட்டியிட்டு 12 000 விருப்பு வாக்குகளைப் பெற்று மத்திய மாகாண சபையின் விழிம்பில் இருந்தார்.

இதைவிட பெரும் தோட்டப் பாடசாலைகள் விடயத்தில் ஏற்பட்ட சர்ச்சையின் போது பாராளுமன்ற அங்கத்தவர் எம்.எச்.ஏ.ஹலீம் அவர்களைத் தலைவராகக் கொண்ட கமிட்டியில் அப்துல் மலீக் அவர்கள் செயலாளராக இருந்து நீதிமன்றம் வரை சென்றுள்ளார். அப்போது இவருக்கு உதவியாக சட்டத்தரணிகளான ஏ.எம்.வைஸ், மற்றும் ஜிப்ரி, அத்துடன் கவாபூஷணம் புன்னியாமீன் ஆகியோரும் பங்களிப்புச் செய்ததன் விளைவாக பிரதி அமைச்சர் பைஸர் முஸ்தபா சட்டத்தரணி என்ற வகையில் சமரசம் செய்து 625 ஆசிரிய நியமனங்களைப் பெற்றுக்கொள்ள வழிகோலினார்.

அத்துடன் தேர்தல் தொகுதி நிர்ணயம் தொடர்பாக கண்டி மாவட்ட முஸ்லீம்கள் (ஐ.தே.க.) அமைத்த தெரிவுக்குழுவிலும் அல்ஹாஜ் மலீக் அங்கத்தவராக இருந்துள்ளார்.

இவ்வாறு ஐ.தே.க.யை விட்டு ஓடாது தொடர்நதும் அனைத்துச் செயற்பாடுகளிலும் பங்கு கொண்டுள்ள இவர்  அரசியல் ரீதியில் பரிச்சய முள்ளவர். 

இன்று கண்டி மாவட்டம் முழுவதும் முஸ்லிம் போட்டியாளர்கள் போட்டா போட்டி இட்டவண்ணம் தமது சுவரொடகளை ஒம்டி வருகின்றனர். அவற்றுள் முன் நிற்பது நம்மவர்களது சுவரோட்டிதான். ஆனால் எம்.ஆர். மலீக்குடைய ஒரு சுவரொட்nயை யாவது காண முடியவில்லை. இதற்குப் பலகாரணம் உண்டு. ஒன்று அவர் மிக அமைதியானவர். அடக்கமானவர். ஒரு உலமாவின் மகள். சமய கருத்துக்களைக் கொண்டவர். எளிமையான வாழ்கை நடத்துபவர். எனவே பகட்டு வாழ்கையோ அல்லது எம்படியாவது பணமீட்டவேண்டும் எனக் கருதி பணத்தை தேடி அழிப்பவருமல்ல. இதனால் அவர் பற்றிய  விளம்பரம் குறைவாக இருந்தாலும் பாத்ததும்பறைப் பிரதேசத்திலுள்ள சுமார் 15 000 முஸ்லிம் வாக்குகளுக்கு உரிமை கோரக் கூடிய நிலையில் இருக்கிறார். மகாண சபையைப் பொருத்தவரை பதினையாயிரம் வாக்கு என்பது மிகப் பெரிய தொகையாகும். மேற்படி முஸ்லிம் வாக்குகளை ஒருவர் பெற்றுக் கொள்வாராயின் அதுவே அவருக்குப் போதுமானதாகும்.

முழு பாத்ததும்பறை முஸ்லிம் மக்களும் தமது வாக்கை அவருக்கு வழங்குவார்களாயின் சிங்கள சமூகத்திற்கு மத்தியிலும் அவருக்குள்ள செல்வாக்கைக் கொண்டு பாத்ததும்பறையில் மட்டும் 20 000 வாக்குகளை இலகுவாகப் பெறலாம். இதனுடன் ஏனைய முஸ்லீமவாக்குகளும் சேருமிடத்து அது பெரும் தொகையாகி விடும். எனவே மலீக் ஒரு பிரதி நிதியாகத் தெரிவாகின் அது மடவளையில் இது காலவரை இருந்த அரசியல் வெற்றிடம் பூரணப்பட இடமுண்டு எனப் பலர் தெரிவித்தனர்.

ஆதே நேரம் இந்த ஒற்றுமைகாரணமாக கண்டி மாவட்டத்தில் 4 அல்லது 5 முஸ்லிம் பிரதிநிதிகளைத் தெரிவு செய்து கொள்ள வசதியாக அது அமையும் எனப் பலர் தெரிவித்தனர்.