நீதியமைச்சு கவனம் செலுத்துமா..?

(எம்.எம்.ஏ.ஸமட்)

மத்தியஸ்தர் சபைக்கான உறுப்பினர் தெரிவின்போது தொழில்வாண்மை உளவள ஆலோசகர்களையும் உள்ளவாங்குவதில் கவனம் செலுத்தப்பட வேண்டுமென நீதி அமைச்சுக்கு ஆலோசனை வழங்கப்படுகிறது. இவ்வாலோசனை தொழில்வாண்மை உளவள ஆலோசகர்களினால் வழங்கப்பட்டுள்ளது.

நீதி அமைச்சினால் உருவாக்கப்பட்ட  ஏறக்குறைய 319 மத்தியஸ்தர் சபைகள் நாடுபூராகவும் இயங்குகின்றன. நீதி மன்றத்தில் தாக்கல் செய்யப்படாத பல வழக்குகள் மத்தியஸ்தர் சபையில் தொடரப்படுகிறது. இம்மத்தியஸ்தர் சபையில் தொடுக்கப்படும் அதிகளவிலான சமூகப் பிரச்சினைகளில் குடும்பப் பிரச்சினைகளே மிகக் கூடுதலாகத் தாக்கல் செய்யப்படுவதாக மத்தியஸ்தர் சபையில் உள்ளோர் குறிப்பிடுகின்றனர்.

நீதிமன்றங்களில் தாக்கல் செய்யப்படும் அதிகளவிலான வழக்குகள்  வெற்றி தோல்வி என தீர்வாக வரும் நிலையில மத்தியஸ்தர் சபையில் தொடரப்படும் வழக்குகள் தோல்வியென்ற நிலையைத் தவிர்த்து இரு தரப்புக்கும் வெற்றி என்ற நிலையை அடைகிறது.

சமூகப் பிரச்சினைளைத் தீர்ப்பது தொடர்பிலும் பிரச்சினைக்குரியவர்களைக் கொண்டே பிரச்சினைகளை தீர்த்துக் கொள்வதற்கான ஆளுமைகளை அவர்களிடத்தில் கட்டியெழுப்புவதற்குரிய நுட்பங்கள், திறன்கள், திட்டங்களை அவர்களிடத்தில் உருவாகுவதற்கு துணை நிற்பதில் தொழில்வாண்மை உளவள ஆலோசகர்களினால்  இயலுமானதாகவிருக்கும்.

மேலும், உளவள ஆலோசகர்கள் மத்தியஸ்தர் சபையில் உறுப்பினர்களாக அங்கம் வகிக்கின்றபோது, இச்சபையில் தொடுக்கப்படுகின்ற தனிநபர், குடும்ப மற்றும் குழுக்கள் தொடர்புபட்ட பிரச்சனைகளுக்குத் தொழில்வாண்மை உளவள ஆலோசனையினூடாக   எவருக்கும் பாதிப்பில்லாத வகைளில,; குறிப்பாக குடும்ப மற்றும் குழுக்கள் தொடர்பான பிரச்சினைகளில் வெற்றி-வெற்றி என்ற நிலையில் அவரவர் பிரச்சினைகளுக்கான தீர்வை பெறுவதற்கு இத்தொழில்வாண்மை உளவள ஆலோகர்களினால் முடியுமாக இருக்கும்.

இவற்றைக் கருத்திற்கொண்டு மத்தியஸ்தர் சபைகளின் உறுப்பினர் தெரிவின்போது தொழில்வாண்மை உளவள ஆலோசகர்களையும் உள்வாங்க நடவடிக்கை எடுக்குமாறு தொழில்வாண்மை உளவள ஆலோசகர்களினால் நீதி அமைச்சுக்கு ஆலோசனை வழங்கப்பட்டுள்ளது,

இதேவேளை, வடக்குக் கிழக்குப் பிரதேங்களில் யுத்தத்தினால் பாதிக்கப்பட்டு மீளவும் குடியமத்தப்பட்டுள்ள மக்கள் மத்தியில் பல பிரச்சினைகள் காணப்படுவதகவும் இவற்றைக் கருத்திற்கொண்டு மேலும் பல விஷேட மத்தியஸ்தர் சபைகளை ஸ்தாபிக்க நடவடிக்கை எடுக்கப்படவுள்ளதாகவும் அண்மையில் கொழும்பில் நடைபெற்ற மத்தியஸ்தர் தின வைபவத்தில் கலந்து கொண்டு உரையாற்றிய மத்தியஸ்தர் சபைகள் தலைவர் ஹெக்டர் எஸ் யாப்பா குறிப்பிட்டுள்ளார். 

அத்துடன், மத்தியஸ்தர் சபை உறுப்பினர்களின் ஆடை, மத்தியஸ்தர் சபை கூடும் நேரம் வழக்குகளை பரிசீலிக்கும் விதம் அவை தொடர்பான அறிக்கை தயாரிக்கும் ஒழுங்குமுறைகள் உட்பட அநேக விடயங்கள் கொண்ட சுற்று நிருபமொன்றை நாடளாவிய ரீதியில் இயங்கும் அனைத்து மத்தியஸ்தர் சபைகளினதும் தவிசாளர்களுக்கு மத்தியஸ்தர் சபைகளின் செயலாளர் அனுப்பி வைத்துள்ளமை குறிப்பிடத்தக்கது.