முஸ்லிம் பிரதிநிதித்துவத்தை உறுதிப்படுத்த வடக்கில் மு.கா. ஆளும் கட்சியில் போட்டி..?

வடமாகாண சபையில் முஸ்லிம் பிரதிநிதித்துவத்தை உறுதி செய்வதற்காக முஸ்லிம் காங்கிரஸ் ஐக்கிய மக்கள் சுதந்திர கூட்டமைப்பின் சார்பில் போட்டியிட விருப்பம் தெரிவித்துள்ளதாக அரசியல் வட்டாரங்களிலிருந்து அறியவருகிறது. இதுதொடர்பில் அமைச்சர் ரவூப் ஹக்கீம் ஜனாதிபதி மஹிந்த ராஜபக்ஸவுடன் பேச்சுவார்த்தையில் ஈடுபடுவாரெனவும் அறியவருகிறது.

வடக்கில் அண்மைய காலங்களில் நடைபெற்ற உள்ளுராட்சி சபைத் தேர்தல்களில் சொற்ப வாக்குகள் வித்தியாசத்தில் சில பிரதேச சபைகளின் அதிகாரங்களை முஸ்லிம்கள் இழந்திருந்தனர். 

இந்நிலையில் வடமாகாண சபையில் ஆளும் கட்சி சார்பில் போட்டியிட அமைச்சர் றிசாத் பதியுதீன் தலைமையிலான தரப்பினரும் இணங்கியிருந்தனர். இந்நிலையில் முஸ்லிம் காங்கிரஸும் ஆளும் தரப்பில் போட்டியிடுவார்களாயின் அது முஸ்லிம்களின் வாக்குகள் சிதறடிக்கப்படாமலிருக்க துணை நிற்பதுடன், முஸ்லிம் பிரதிநிதிகளை அதிகளவில் பெறவும் உதவுமென சுட்டிக்காட்டப்பட்டிருந்தது.

வடக்கு முஸ்லிம்கள் ஏற்கனவே புயங்கரவாதப் புலிகளின் கொடுமைகளை அனுபவித்துள்ள நிலையில் தற்போது தமிழ் இனவாதிகளின் நெருக்குவாரங்களுக்கும் உட்பட்டுள்ளனர். இதனையும் கருத்திற்கொண்டே முஸ்லிம் காங்கிரஸ் இவ்வாறான தீர்மானமொன்றுக்கு வந்துள்ளதாக அறியவருகிறது.

அதேவேளை அமைச்சர் றிசாத் பதியுதீனும், முஸ்லிம் காங்கிரஸ் வடமாகாண சபையில் அளும்கட்சியுடன் இணைந்து கேட்க வேண்டுமென தமது விருப்பத்தை முஸ்லிம் காங்கிரஸ் எம்.பி.களிடத்தில் வெளிப்படுத்தியிருந்தமையும் இங்கு குறிப்பிடத்தக்கது.

வை.எல்.எஸ். ஹமீட் 

எதிர்வரும் வட மாகாண சபைத்தேர்தலில் அகில இலங்கை மக்கள் காங்கிரஸ் அரசாங்கத்துடன் இணைந்து ஐ.ம.சு.மு.வில் போட்டியிட உள்ளதாக அ.இ.ம. காங்கிரஸ் செயலாளர் வை.எல்.எஸ். ஹமீட் தெரிவித்தார். வடக்கில் முஸ்லிம் காங்கிரஸ் தனித்துப் போட்டியிடுவதால் முஸ்லிம் பிரதிநிதித்துவம் பாதிக்கப்படும் என்று குறிப்பிட்ட அவர் முஸ்லிம் காங்கிரஸை அரசுடன் இணைந்து போட்டியிட வைப்பதற்கான முயற்சிகளை மேற்கொண்டுவருவதாகவும் குறிப்பிட்டார்.

அரசுடன் இணைந்து போட்டியிடுவதன் மூலமே கூடுதல் முஸ்லிம் பிரதிநிதிகளை வடமாகாண சபைக்கு தெரிவு செய்ய முடியும். ஆனால் முஸ்லிம் காங்கிரஸ் தனித்துப் போட்டியிட இருப்பதாக அறிவித்துள்ளது. முஸ்லிம் பிரதிநிதித்து வத்தை பாதுகாக்க வேண்டுமானால் மு.கா.வும் அரசுடன் இணைந்து போட்டியிட வேண்டும்.

அமைச்சர் ரிசாத்பதியுதீன் தலைமையில் இது தொடர்பாக மு. காவுடன் பேசி வருகிறோம். வடக்கில் அகில இலங்கை மக்கள் காங்கிரஸ¤க்கு எத்தனை ஆசனங்கள் ஒதுக்கப்படும் என்பது குறித்து இன்னும் இறுதி முடிவு எட்டப்படவில்லை. தொடர்ந்து பேசி வருகிறோம் என்றார்.