இறக்குமதியாகும் 4 வகை பால் மாக்களில் உடலுக்கு தீங்கு விளைவிக்கும் பொருட்கள் =

வெளிநாட்டிலிருந்து இறக்குமதி செய்யப்பட்ட  நான்கு வகையான பால் மாக்களில் மனித உடலுக்கு பாதிப்பை ஏற்படுத்தக் கூடிய டி.சி.டி (டைசயான் டமைய்ட்) என்ற இரசாயன பதார்த்தமிருப்பது இனங்காணப்பட்டுள்ளதாக தொழில் நுட்பவியல்  மற்றும்  ஆராய்ச்சி அமைச்சு தெரிவித்துள்ளது. 

 சந்தைகளில் விற்பனை செய்யப்படும் 4 வகையான பால் மாக்களில் இந்த இரசாயனப் பதார்த்தம் இனங்காணப்பட்டமை குறிப்பிடத்தக்கது.  இது தொடர்பில் மேலும் தெரியவருவதாவது,

வெளிநாடுகளிலிருந்து இறக்குமதி செய்யப்பட்ட பால்மா வகைகள் சோதனைக்குட்படுத்தப்பட்ட போது அதில் நான்கு வகை  பால் மாக்களில்  டைசயான் டமைய்ட் எனும் இரசாயன பதார்த்தம் இனங்காணப்பட்டுள்ளது. சந்தையில் மிகவும் பிரசித்திப் பெற்ற நான்கு வகையான பால் மாக்களிலேயே குறித்த இரசாயன பதார்த்தம் இனங்காணப்பட்டுள்ளது. இதனால் சந்தைகளில் விற்பகப்படும் அனைத்து பால் மா வகைகளையும் பரிசோதனைக்குட்படுத்த அமைச்சு தீர்மானித்துள்ளதாக தொழில் நுட்பவியல் மற்றும் ஆராய்ச்சி அமைச்சின் ஊடக செயலாளர் தனுஸ்க ராமநாயக்க தெரிவித்தார். 

 இந்த நான்கு வகை பால் மாக்கள் மேலும் சில பரிசேதனைகளுக்குட்படுத்தப்பட்டு ஆய்வறிக்கை கிடைத்தவுடன் சந்தையிலிருந்து அப் பால் மாக்களை அப்புறப்படுத்துவதற்கான  நடவடிக்கை முன்னெடுக்கப்படும் . இந்த  சோதனை நடவடிக்கைகள் உள்நாட்டில் உற்பத்தி செய்யப்படும் பால் மா வகைகளிலும் மேற்கொள்ளப்பட்டதுடன்  உள்நாட்டு பால் மாக்களில் மனித உடலுக்கு  தீங்கு விளைவிக்கும் எவ்வித இரசாயனப் பதார்த்தமும் காணப்படவில்லையென அவர் மேலும் தெரிவித்தார்.