காலி, கராப்பிட்டிய முஸ்லிம்களுக்கு அச்சுறுத்தல்

காலி - கராப்பிட்டிய முஸ்லிம்களுக்குரிய குடியிருப்புகளை புல்டோசர்கள் சகிதம் அகற்றவந்தவர்களை தடுத்து நிறுத்திய பெண்கள் அச்சுறுத்தப்பட்ட சம்பவம் தொடர்பில் பொலிஸ் நிலையத்தில் முறைப்பாடு செய்யப்பட்டுள்ளது. இதனை பிரதேச முஸ்லிம்கள் சார்பில் பேசிய றியாஸ் என்பவர் உறுதிப்படுத்தினார். 

இன்று புதன்கிழமை கராப்பிட்டிய முஸ்லிம் குடியிருப்புகளை அகற்றுவதற்கு சென்றுள்ள நகர அபிவிருத்தி அதிகார சபை அதிகாரிகள் மற்றும் கொந்தராத்து காரர்களை முஸ்லிம் பெண்கள் தடுத்து நிறுத்தியுள்ளனர். இதன்போது குறிப்பிட்ட அதிகாரிகளும், கொந்தராத்துகாரர்களும் முஸ்லிம் பெண்கள் எதிர்த்தாலும் அவர்களின் உடல்களுக்கு மேல் புல்டோசர்களை செலுத்தி குடியிருப்புகளை அகற்றுவொமென அச்சுறுத்தியுள்ளனர்.

குறிப்பாக கொந்தராத்துகாரர்கள் தாம்மை முஸ்லிம் பெண்கள் எதுவும் செய்ய முடியாதெனவும், தாம் அதிகாரம் பெற்றவர்கள் எனவும் எவருக்கும் அஞ்சப்போதவில்லையெனவும் கூறி, முஸ்லிம் பெண்களை தூஷித்துள்ளனர்.

முஸ்லிம் பெண்கள் மற்றும் ஆண்களின் எதிர்ப்பு காரணமாக முஸ்லிம் குடியிருப்புகளை அண்டிய பகுதிகளில் புல்டோசர்கள் மூலம் தொடர்ந்து உடைக்கும் பணிகள் நடைபெற்றுள்ளன.

இதேவேளை நகர அபிவிருத்தி அதிகார சபையினர் மற்றும் கொந்தராத்து காரர்கள் தம்மை அச்சுறுத்தியதாககூறி  அங்குள்ள முஸ்லிம்கள் சட்டத்தரணிகளின் ஆலோசனைக்கு இணங்க பொலிஸ் நிலையத்தில் முறைப்பாடு ஒன்றையும் பதிவு செய்துள்ளனர்.