சாய்தமருதுவின் பெயர் பலகை எங்கே..?

(ஏ.எல். ஜுனைதீன்)

    வீதி அபிவிருத்தி அதிகார சபையினால் நாட்டிலுள்ள நகரங்கள், கிராமங்கள் தோறும் ஊரின் எல்லையைக் காண்பிக்கும் நோக்கமாக ஊரின் பெயர் பொறிக்கப்பட்ட நவீன பெயர் பலகை அம்பாறை மாவட்டக் கரையோரப் பிரதேசத்தில் சாய்ந்தமருதின் எல்லைப் பகுதியில் நடப்படாதது குறித்து இப் பிரதேச மக்கள் கவலை தெரிவிப்பதுடன், இப் பெயர் பலகை இவ்வூரில் நடக்கூடாது என அரசியல்வாதிகள் யாராவது தடை விதித்துள்ளனரா? எனவும் கேள்வியும் எழுப்புகின்றனர்.

    இக்கிராமத்தில் ஆரம்ப காலத்தில் நடப்பட்டிருந்த “சாய்ந்தமருது” என மூன்று மொழிகளிலும் எழுதப்பட்டிருந்த பெயர் பொறிக்கப்பட்ட கல்லும் கூட அகற்றப்பட்டிருப்பதும் இம்மக்களுக்கு வேதனை தரும் விடயமாக இருந்து கொண்டிருக்கிறது.

    இம்மாவட்டத்தில் நிந்தவூர், காரைதீவு, மாவடிப்பள்ளி, சம்மாந்துறை. கல்முனை, பாண்டிருப்பு என சகல ஊர்களுக்கும் பெயர் பொறிக்கப்பட்ட நவீன பெயர் பலகை நடப்பட்டிருந்தும் ஏன் சாய்ந்தமருதில் இப் பெயர்ப் பலகை நடப்படவில்லை எனவும் சுட்டிக்காட்டுகின்றனர்.

    அம்பாறை மாவட்டத்தின் மிகப் பழையதும் சனத்தொகை கூடியதுமான சாய்ந்தமருது கிராமம் தனியான ஒரு பிரதேச செயலகப் பிரிவுமாகும் இக்கிராமத்தில் சுமார் 26 ஆயிரத்திற்கும் மேற்பட்ட தனியாக முஸ்லிம் மக்கள் மட்டுமே வாழ்ந்து கொண்டிருக்கிறார்கள்.

    இக் கிராமத்தில்தான் இலங்கையின் முதலாவது பயிற்றப்பட்ட முஸ்லிம் பெண் ஆசிரியை பாத்துமுத்து ஹலால்தீன், இலங்கையின் முதலாவது முஸ்லிம் பெண் பல்கலைக் கழக வேந்தர் தேசபந்து ஜெஸிமா இஸ்மாயில், இலங்கையின் முதலாவது முஸ்லிம் பெண் மேல் நீதிமன்ற நீதிபதி ஏ.எல்.என். மைமூனா  ஆகியோர் பிறந்து முஸ்லிம் சமுகத்திற்கு புகழ் தேடித் தந்திருக்கிறார்கள்.

    இது மாத்திரமல்லாமல் சாய்ந்தமருது கிராமம் சரித்திர முக்கியத்துவம் பெற்றுள்ள ஒரு கிராமம் எனவும் அறிவிக்கப்படுகின்றது.

    கடல் வழியாக வந்த ஒல்லாந்தக் குழுவினர் இலங்க்கையில் முதன் முதலாகக் காலடி வைத்த இடம் சாய்ந்தமருது எனத் தெரிவிக்கப்பட்டிருக்கிறது. இது 1602 ஆம் ஆண்டு ஜூன் மாதம் 02 ஆம் திகதி எனவும் குறிப்பிடப்பட்டிருப்பதாகவும், ஒல்லாந்தரது கப்பலொன்றின் தளபதியான ஜொரிஸ் வான் ஸ்பில் பேர்கன் என்பவரே சாய்ந்தமருதில் தரையிறங்கி, பின்னர் சம்மாந்துறையில் தங்கியிருந்து அங்கிருந்து கண்டிக்குச் சென்று முதலாம் விமல தர்ம சூரியன் மன்னனைச் சந்தித்தான்.இப்பயணத்தின் போது மட்டக்களப்பு பிரதேசத்தில் தான் சந்தித்த சோனகர் (Mooren)  மற்றும் துலுக்கர் (Tureken) பற்றியும் தனது நாட் குறிப்பேட்டில் விபரித்துள்ளான். (Journal of Spilbergen 1602- Translation by K.D. Paranavitane-1997 Page 23 ) எனவும் ஆதாரம் காட்டப்படுகின்றது.

    இப்படியான பல முக்கியத்துவங்கள் உள்ள சாய்ந்தமருதின் எல்லையைக் காட்டுவதற்கு ஊரின் பெயர் பொறிக்கப்பட்ட நவீன பெயர் பலகை இது வரை நடப்படாமல் இருப்பதன் மர்மம் என்ன? இதற்கான பதிலை இப்பிரதேச அரசியல்வாதிகள்தான்  கூறவேண்டும்.