பேஸ்புக்கில் வருபவர்களை எமது நண்பர்கள் என ஏற்றுக்கொள்ளக்கூடாது - ஜனாதிபதி மஹிந்த

இலங்கைக்கே உரித்தான சிறந்த கலாசாரங்களை சீர்குலைக்க சமூக மட்டத்திலும், பாடசாலை மட்டத்திலும் செயற்படும் சக்திகளிடமிருந்து எச்சரிக்கையாக செயற்படுவது அவசியம் என ஜனாதிபதி மஹிந்த ராஜபக்ஷ தெரிவித்தார்.

களுத்துறை மகளிர் மகா வித்தியாலயத்தில் புதிதாக நிர்மாணிக்கப்பட்டுள்ள நீச்சல் தடாகம் நேற்று ஜனாதிபதி மஹிந்த ராஜபக்ஷ அவர்களினால் உத்தியோக பூர்வமாகத் திறந்து வைக்கப்பட்டு மாணவிகளின் உபயோகத்திற்கு கையளிக்கப்பட்டது. இந்நிகழ்வில் ஜனாதிபதி தொடர்ந்து உரையாற்றுகையில்,

எமது நாட்டில் சிறந்த குடும்ப அமைப்புகள் உள்ளன. உலகில் பெருமையையும் தனித்துவத்தையும் அடையாளப் படுத்துவது எமது நாட்டின் குடும்ப உறவுக் கலாசாரமே. 16 வயதாகியவுடன் குடும்பத்தை விட்டுப் பிள்ளைகள் வேறாகப் பிரிந்து செல்லும் கலாசாரம் எமது நாட்டில் இல்லை. ஒவ்வொரு யுகத்திலும் ஒவ்வொரு கருத்துக்கள் உலா வருகின்றன. ஆண்களுக்கு நிகரானவர்களாக பெண்கள் இருக்க வேண்டுமெனவும் ஆண்கள் செயற்படுவது போல் பெண்களும் செயற்பட வேண்டுமென்றும் கூறும் அமைப்பு களும் உண்டு.

பெண்கள் விடுதலை, பெண்கள் உரிமை எனக் கூறிக்கொண்டு பெண்கள் மது அருந்தவும் முடியும் என பிரசாரப் படுத்துவோர் வெளிநாடுகளை அதற்கு ஆதாரமாக எடுத்துக்கொள்கின்றனர். எமது நாட்டுக்கு ஒரு சிறந்த கலாசாரம் உண்டு. சிறந்த குடும்ப பிணைப்புகள் உண்டு. எமது சிறந்த நண்பர்கள் எமது பெற்றோர்களே. அதைவிடுத்து பேஸ்புக்கில் வருபவர்கள் எமது நண்பர்கள் என ஏற்றுக்கொள்ளக் கூடாது. வளர்ந்து வரும் தலைமுறை இதில் முக்கிய கவனம் செலுத்த வேண்டும்.

சில பாடசாலைகளுக்கும் இத்தகைய கலாசாரத்தை ஊடுருவச் செய்ய சில சக்திகள் முனைகின்றன. இவர்களிடமிருந்து எமது பிள்ளைகள் பாதுகாக்கப்படவேண்டும். சுதந்திரம் என்பது இத்தகைய செயற்பாடுகள். சுதந்திரம் என்பது எமக்கான பொறுப்பின் அடையாளம் என்பதை குறிப்பாக இளந்தலைமுறை மாணவர்கள் உணர வேண்டும். சுதந்திரம் என்ற பெயரில் மோசமான நடவடிக்கைகளில் ஈடுபடுவது வாழ்க்கைக்கான பொறுப்பல்ல. கைத் தொலைபேசிகள், மடி கணனிகள் காட்டும் கலாசாரத்தை விட்டுவிட்டு ஒழுக்கத்தைப் பாதுகாத்து வாழ்வதில் அக்கறை காட்டுவது அவசியமாகும்.

சமூகப் பிரச்சினைகள் பல படிப்பினை எமக்கு உணர்த்துகின்றன. சிறு சிறு பிரச்சினைகளுக்காக தற்கொலை செய்துகொள்ளும் நிலையை தற்போது எமது சமூகத்தில் காணப்படுகிறது. பரீட்சையில் தோல்வி என்பதால் தற்கொலை, அம்மாவின் எச்சரிக்கைக்காக தற்கொலை என தற்கொலைகள் தொடர்கின்றன. தவறான வழிகளில் எமது பிள்ளைகள் சிந்திக்க இடமளிக்கக் கூடாது. அதற்கான நடவடிக்கைகளை அரசாங்கமும் முன்னெடுத்து வருகிறது. உள ரீதியான பாதிப்புகளிலிருந்து எமது பிள்ளைகள் பாதுகாக்கப்படவேண்டும். இதற்கான பொறுப்பு பெற்றோர்கள், ஆசிரியர்கள் என சகலருக்கும் உள்ளது என்பதை மறந்து விடக்கூடாது எனவும் ஜனாதிபதி மேலும் தெரிவித்தார்.