தேசிய ஷூரா - சில ஐயங்கள் !

(நாகூர் ழரீஃப்)

'தேசிய ஷூரா பேரவை பற்றிய கேள்விகளும் விடைகளும்' எனும் தலைப்பில் அஷ் ஷைக் எஸ். எச். எம். பளீல் (நளீமி) அவர்களால் சென்ற 30.05.2013 அன்று ஒரு கட்டுரை எழுதப்பட்டிருந்தது. அக்கட்டுரையின் இறுதியில், பொதுமக்களும் தமது கருத்துக்களையும் தெரிவிக்க சந்தர்ப்பமுண்டு என்றொரு வரியும் இருந்தது. அதனால் எனது கருத்துக்களை மீண்டும் ஒரு முறை மிகச் சுருக்கமாகச் சுட்டிக்காட்ட விரும்புகின்றேன்.

01 – (அரசியல் யாப்பிற்கான 13 திருத்தம் பற்றி) அரசியல் துறை விற்பன்னர்களான முஸ்லிம் அரசியல் விஞ்ஞானிகளது அபிப்பிராயங்கள் பெறப்படல் வேண்டும். இத்துறை சார்ந்தோர் சாதக பாதகங்களை நிரூபிக்கும் பட்சத்தில் அது ஷூரா சபையின் கவனத்திற்கு கொண்டு வரப்பட்டு பின்னர் முடிவொன்று பெறப்படும் என்று ஒரு பந்தி சொல்கிறது.

அப்படியாயின் அரசியல் விஞ்ஞானிகள் என்று இங்கு சுட்டிக் காட்டப்பட்டுள்ளவர்கள் ஷூராவிற்கு வெளியில் இருந்து செயற்படுவதாகவே தெரிகிறது. ஷூரா என்பது முடிவெடுக்கும் அதிகாரம் படைத்த ஓர் அமைப்பு மாத்திரமா? ஏன் அந்த அதிகாரத்தை அகில இலங்கை ஜம்இய்யத்துல் உலமா நெடு காலமாகச் செய்து வருவதைப் போன்று தொடர்ந்தும் இருக்கக் கூடாது?

02 – (1000 பாடசாலைகள் அபிவிருத்தி பற்றிப் பேசும் போது) ஷூரா சபை கூடி துறை சார்ந்தவர்களது கருத்துக்களைப் பெற்று மட்டுமே முடிவெடுக்கும்.

இங்கும் முடிவெடுக்கும் அதிகாரம் மட்டுமே ஷூரா சபை பெறுப்பேற்றுள்ளது என்பதைத் தெளிவாகக் காணமுடிகிறது. அகில இலங்கை ஜம்இய்யத்துல் உலமாவின் கல்விக் குழு இச்சேவைகளைச் செய்து வருகிறது. பாடத் திட்டங்கள் திருத்தியமைக்கப்பட்ட போது, முன்னாள் பிரதிக் கல்வி வெளியீட்டு ஆணையாளர் சகோதரர் என். கச்சி முகம்மது (கல்வி வெளியீட்டுத் திணைக்களம்) அகில இலங்கை ஜம்இய்யத்துல் உலமாவின் கல்விக் குழுவின உதவியை நாடிய போது, இஸ்லாம் பாடத் திட்டத்தின் தரம் : 07, தரம் : 10, தரம் : 11 ஆகிய பாட நூல்கள் தொகுத்தளிக்கப்பட்டது. 

தொடர்ந்தும் கல்விக் குழுவின் சேவையினை வளர்க்க இத்துறை சார்ந்தோர் மேலும் உதவினால் இதனை விட சிறப்பாக அமையாதா?

03 – (இஸ்லாத்துக்கு எதிரான திரைப்படங்கள் காடகங்கள் ) பற்றிப் பேசும் போதும், மீடியாவுடன் நெருக்கமான தொடர்பு கொண்ட அத்துறையில் அதிக பரீட்சயமுள்ளவர்கள் அது பற்றிய ஆய்வொன்றைச் செய்யும் படி வேண்டப்பட வேண்டும். ஆய்வின் முடிவுகளின் பின்னர் அவர்களது ஆலோசனைகளின் பேரில் தக்க நடவடிக்கைகளை ஷூரா எடுக்கும்.

இங்கும் முடிவெடுக்கும் அதிகாரத்தையே ஷூரா கொண்டுள்ளது என்று தெளிவாகச் சொல்லப்பட்டுள்ளது. ஏன் அந்த அதிகாரத்தை அகில இலங்கை ஜம்இய்யத்துல் உலமாவிடம் இருந்து கழட்டி எடுக்க வேண்டும்? ஆவர்களுடன் மேற்படி மீடியாவுடன் நெருக்கமான தொடர்பு கொண்ட அத்துறை சார்ந்தோரை இணைத்து விட்டால் இன்னும் சிறப்பாக இக்காரியம் நடைபெறுமல்லவா?

04 – (இலங்கை முஸ்லிம்களின் பொருளாதார சிக்கல்கள் பற்றிப் ) பேசும் போது, இத்துறை சார்ந்த திட்டங்களை வகுப்பதற்கு பொருளாதார துறை சார் வல்லுனர்களது ஆலோசனைகள் பெறப்பட வேண்டும் என்று ஒரு பந்தி குறிப்பிடுகிறது.

ஓவ்வொரு துறைசார்ந்தோர்களது ஆலோசனைகளையும் அறிவுறுத்தலையும் மேற்படி ஷூரா எதிர்பார்ப்பதாயின், ஜம்இய்யத்துல் உலமாவின் இஸ்லாமிய வங்கியியல் வழிகாட்டல் குழுவிடம் இப்பொறுப்பினைச் சுமத்தி மேலும் இத்துறை சார்ந்தோர்களை இணைத்துச் செயற்பட்டால் இன்னும் சிறப்பாக ஜம்இய்யாவின் செயற்பாடுகள் மேலோங்குமல்லவா?

05 - இவ்வாறு துறை சார்ந்த நிபுணர்களின் ஆலோசனைகள் பெறப்பட வேண்டிய பல துறைகள் உள்ளன என்றும் மற்றுமொரு பந்தி பேசுகிறது.

ஆம், அத்தகைய வல்லுனர்களை அகில இலங்கை ஜம்இய்யத்துல் உலமாவுடன் இணைத்து, சகல இஸ்லாமிய அமைப்புக்களையும் சேர்த்து அதன் தலைமையில் செயற்பட்டால் என்ன?

உண்மையில் நாம் சமூக ஐக்கியத்தையும் ஒருமைப்பாட்டையும் உளமாற விரும்புகின்றோம் என்பதில் மாற்றுக் கருத்தே இல்லை. ஆனால் நாம் எதிர் பார்க்கும் அல்லது முயலும் மேற்படி ஒருமைப்பாட்டினை சமூக அங்கீகாரம் பெற்றுச் சிறப்பாகத் தனது தலைமைத்துவப் பணியினைச் செய்து வரும் அகில இலங்கை ஜம்இய்யத்துல் உலமாவுடன் மேற்படி துறை சார்ந்தோர்கள் இணைவார்களாயின் மிகச் சிறந்த பலனை இச்சமூகம் பெறும் என்று நம்புகின்றோம்.

இது ஒரு தேசிய மட்டத்திலான ஷூரா என்பதால் எமது இக்கருத்தையும் ஒரு ஷூராவாகப் பார்க்குமாறும் சிந்திக்குமாறும் கேட்டுக் கொள்வதுடன், இது ஒரு பிரிவினைக்கான அல்லது குலப்படிக்கான துரும்பாகப் பார்க்கப்படக் கூடாது என்றும் அன்பாகக் கேட்டுக் கொள்கின்றேன்.