வாழைச்சேனையின் 2 குழுக்களுக்கிடையில் மோதல் - இருவருக்கு கத்திக்குத்து

(அனா)

வாழைச்சேனை பொலிஸ் பிரிவில் பிறைந்துரைச்சேனைக் கிராமத்தில் இரண்டு குழுக்களுக்கிடையில் இடம் பெற்ற மோதலில் கத்திக்குத்துக்கு இலக்காகி இருவர் காயப்பட்டு மட்டக்களப்பு போதனா வைத்தியசாலையில் அனுமதிக்கப்பட்டுள்ளனர்.

நேற்று (04.06.213) இரவு 10.15 மணியளவில் வாழைச்சேனை–பிறைந்துரைச்சேனை 02ம் குறுக்கு வீதியில் இரண்டு குழுக்களுக்கிடையில் ஏற்பட்ட மோதலில் கலந்தர்லெப்பை முகம்மட் அன்வர், அப்துல் ஸலாம் முகம்மட் பௌசர் என்றழைக்கப்படும் இருவரே கத்திக்குத்துக்கு இலக்காகி வாழைச்சேனை ஆதாரவைத்தியசாலையில் அனுமதிக்கப்பட்டு மேலதிக சிகிச்சைக்காக மட்டக்களப்பு போதனா வைத்தியசாலைக்கு மாற்றப்பட்டுள்ளனர்.

இச் சம்பவத்தைத் தொடர்ந்து சண்டை நடைபெற்ற இடத்தில் குண்டுத் தாக்குதலும் இடம் பெற்றுள்ளது. இக் குண்டுத்தாக்குதலால் எவருக்கும் சேதம் ஏற்படவில்லை இக் கைக்குண்டு வெடிக்கவைத்தவர்கள் என்ற சந்தேகத்தின் பேரில் இரு இளைஞர்கள் தலைமறைவாகியுள்ளதுடன் இவர்களை வாழைச்சேனை பொலிஸார் தேடிவருவதுடன் இச் சம்பவம் தொடர்பில் வாழைச்சேனை பொலிஸார் விசாரணைகளை மேற்கொண்டு வருகின்றனர்.