13 வேண்டாமென அணிதிரளும் பௌத்த அமைப்புக்கள் - மிரட்டும் முஸ்லிம் காங்கிரஸ்

13ஆவது அரசமைப்புத் திருத்தத்தை ஒழிப்பது தொடர்பில் ஆராய்வதற்காக நாளைமறுதினம் வியாழக்கிழமை கொழும்பில் முக்கிய சந்திப்பு ஒன்று நடைபெறவுள்ளது. 

ஜாதிக ஹெல உறுமயவுக்கும், கடும்போக்குடைய சிங்களத் தேசிய அமைப்புகளுக்குமிடையில் இந்த முக்கிய சந்திப்பு ஏற்பாடு செய்யப்பட்டுள்ளது.

பொதுபலசேனா, சிஹல ராவய, தேசப்பற்றுள்ள தேசிய இயக்கம், சிங்கள தேசிய சங்கம், தர்ம விஜய நிதியம, ராவண பலய உள்ளிட்ட சகல சிங்கள பௌத்த அமைப்புகளும் இச்சந்திப்பில் கலந்துகொள்ளவுள்ளன.  ஜாதிக ஹெல உறுமயவின் மத்திய குழு உறுப்பினரும், மேல் மாகாண சபை அமைச்சருமான உதய கம்மன்பில இந்தத் தகவலை உறுதிப்படுத்தினார்.

இச்சந்திப்பின்போது அரசமைப்பிலிருந்து 13ஆவது திருத்தச் சட்டத்தை ஒழிக்கக்கோரும் ஹெல உறுமயவின் தனிநபர் பிரேரணை, வடக்குத் தேர்தல், மிருகவதைத் தடைச் சட்டவரைவு, வடக்கிலிருந்து விரட்டியடிக்கப்பட்ட சிங்கள மக்களின் மீள்குடியேற்றம் உட்பட முக்கிய பல விடயங்கள் சம்பந்தமாக ஆராயப்படும் என அறியமுடிகின்றது. 

அதேவேளை, சிங்கள, பௌத்த அமைப்புகளிடம் மேற்படி விடயங்கள் சம்பந்தமாகக் கருத்துக் கேட்டபின்னர் அவற்றை அறிக்கை யொன்றாகத் தயாரித்து ஜனாதிபதியிடம் கையளிப்பதற்கு ஹெல உறுமய உத்தேசித்துள்ளது என்றும் தெரியவருகின்றது.

குறிப்பாக, தமது கோரிக்கையை ஏற்காது அரசு வடமாகாண சபைத் தேர்தலுக்கு செல்லுமானால், அவ்வேளையில் தாம் எடுக்கவுள்ள முடிவு தொடர்பிலும் பௌத்த அமைப்புகளுக்கு இச்சந்திப்பின்போது ஹெல உறுமய உத்தியோகபூர்வமாக அறிவிக்கும் என எதிர்பார்க்கப்படுகின்றது. 

அத்துடன், அரசமைப்பிலிருந்து 13ஐ அகற்றுமாறு அரசுக்கு அழுத்தங்களைப் பிரயோகிக்குமாறு மேற்படி அமைப்புகளிடம் ஹெல உறுமய கோரிக்கையொன்றை முன்வைக்கவுள்ளது எனவும் அறியமுடிகின்றது.

அதேவேளை, 13வது திருத்தச்சட்டத்தை பலவீனப்படுத்தும் எத்தகைய முயற்சிகள் மேற்கொள்ளப்பட்டாலும், சிறிலங்கா அரசாங்கத்தில் இருந்து தமது கட்சி வெளியேறும் என்று சிறிலங்கா முஸ்லிம் காங்கிரஸ் எச்சரித்துள்ளது. இதுகுறித்து முஸ்லிம் காங்கிரசின் தேசிய அமைப்பாளர் ரபீக் ரஜாப் தீன் கருத்து வெளியிடுகையில், 

 முஸ்லிம் காங்கிரசின் உயர் சபை இது குறித்து நேற்று முன்தினம் விவாதித்தது. அதிகாரப்பகிர்வைப் பலவீனப்படுத்தும் எத்தகைய முயற்சிகளுக்கும் சிறிலங்கா அரசுக்கு ஆதரவு அளிப்பதில்லை என்று அதில் முடிவு செய்யப்பட்டுள்ளது. 13வது திருத்தச்சட்டத்தை பலவீனப்படுத்த சிறிலங்கா அரசாங்கம் நடவடிக்கை எடுத்தால், அரசாங்கத்தில் இருந்து சிறிலங்கா முஸ்லிம் காங்கிரஸ் வெளியேறும்” என்றும் அவர் மேலும் கூறியுள்ளார்.