மட்டக்களப்பில் தம்பதிகள் படுகொலை - மகளும் அவருடன் கற்கும் மாணவர்களும் கைது

(Tn) மட்டக்களப்பு செங்கலடி பிரதேசத்தில் இடம்பெற்ற இரட்டைக் கொலைச் சம்பவம் தொடர்பாக கொல்லப்பட்டவர்களது மகள் மற்றும் பாடசாலை மாணவர்கள் மூவரும் கைது செய்யப்பட்டுள்ளதாக ஏறாவூர் பொலிஸார் தெரிவித்துள்ளனர்.

காதலுக்குத் தடையாக இருந்ததனால் மகளின் ஒத்துழைப்புடன் அவரின் தாயும் தந்தையும் கொலை செய்யப் பட்டதாக தகவல் வெளியாகியுள்ளது.

பிரபல வர்த்தகரான சிவகுரு ராகு அவரது மனைவி சுந்தர மூர்த்தி விப்ரா ஆகியோர் கடந்த 7 ஆம் திகதி நள்ளிரவு படுக்கையறையில் கோரமாக வெட்டிக் கொலை செய்யப்பட்டமை தெரிந்ததே.

இக்கொலைச் சம்பவம் குறித்து பொலிஸ் மற்றும் சி.ஐ.டி.யினர் பல்வேறு கோணங்களில் விசாரணைகளை மேற்கொண்டு வந்தனர். இதன் போது கிடைத்த இரசியத் தகவலை அடிப்படையாகக் கொண்டு செங்கலடியிலுள்ள பிரபல பாடசாலையொன்றின் தரம் 11 இல் கற்கும் மாணவர்கள் மூன்று பேரும் கொல்லப்பட்ட தம்பதியரது மகள் ஒரு வரும் பொலிஸாரினால் கைது செய்யப்பட்டு விசாரணைக்குட்படுத்தப் பட்டனர்.

இதையடுத்து கொலைக்குப் பயன்படுத்திய கத்தி, பொல்லு, தடிகள் மற்றும் கையுறை உள்ளிட்ட பல பொருட்கள் பொலிஸாரினால் கண்டெடுக்கப்பட்டுள்ளன.

இப்பொருட்கள் செங்கலடி அம்மன்புரம் காட்டுப்பகுதியில் புதைக்கப்பட்டிருந்ததாக பொலிஸார் கூறினர்.

இது பற்றித் தெரிவிக்கப்படுவதாவது, கொலை செய்யப்பட்டவர்களது மகள் ஒருவர் தரம் 11 இல் கல்வி கற்பவர். அதே வகுப்பைச் சேர்ந்த மாணவனுடன் காதல் தொடர்பு உண்டு. இவ்விவகாரம் தெரியவந்ததையடுத்து பெற்றார் தமது எதிர்ப்பை வெளியிட்டுள்ளனர். இதனால் பெற்றார் உயிருடன் இருக்கும் வரை தமது காதல் வாழ்க்கை நிறைவேறாது எனக் கருதியுள்ளனர்.

இதையடுத்து சம்பவ தினம் இரவு வீட்டிலிருந்த கறிச்சட்டிக்குள் தூக்க மாத்திரைத் தூள் போடப்பட்டுள்ளதாகவும் நள்ளிரவு வரை எஸ்.எம்.எஸ். மூலமாக மகள் தொடர்பில் இருந்ததாகவும் தெரியவந்துள்ளது.

பின்னர் மகள் வீட்டின் பின்புறக்கதவை திறந்து ஒத்துழைப்பு வழங்கியதனால் இக்கொலை இடம்பெற்றுள்ளதாக அறிய வருகிறது.

கைது செய்யப்பட்டுள்ள மாணவர்களில் இருவர் செங்கலடி பிரதேசத்தையும் மற்றையவர் கித்துள் பிரதேசத்தையும் சேர்ந்தவர்கள் ஆவர். சந்தேக நபர்கள் தொடர்ந்தும் பொலிஸ் விசாரணைக்குட்படுத்தப்பட்டுள்ளதாக தெரிவிக்கப்படுகிறது.