முஸ்லிம்களின் உரிமைக்கு ஆபத்து - கண்களை மூடிக்கொண்டுள்ள மு.கா.

தம்புள்ள பள்ளிவாசல் உடைப்பை கிழக்கில் அரசியலாக்கிய மு.கா. வின் தலைமைத்துவம் கண்டியில் முஸ்லிம் மகளிரை வீட்டுக்குள் முடங்கிக் கிடக்குமாறு அறிவிக்கப்பட்டுள்ளதை அடுத்த தேர்தலில் என்ன கோணத்தில் சொல்லப் போகிறது என கிழக்கிலங்கை முஸ்லிம் இளைஞர் முன்னணி மு.கா.விடம் பகிரங்க கேள்வியினை எழுப்பியுள்ளது.

முஸ்லிம்களின் மத உரிமைகளில் மூக்கை நுழைத்துள்ள பொ.ப.சே.வினதும் ஏனைய  குழுக்களினதும் அண்மைக்கால கடும் போக்குத் தொடர்பில்  கிழக்கிலங்கை முஸ்லிம் இளைஞர் முன்னணி வெளியிட்டுள்ள அறிக்கையில் மேற்படி கேள்வி எழுப்பப்பட்டுள்ளது.

அவ்வறிக்கையில் மேலும் குறிப்பிடப்பட்டுள்ளதாவது,

இந்நாட்டில் மூவின மக்களிடையே ஒற்றுமையையும் சக வாழ்வையையும் ஏற்படுத்தவும் முஸ்லிம்களை ஒரே கொடையின் கீழ் ஒன்று சேர்க்கவும் முஸ்லிம்களின் உரிமைகள் தட்டிப் பறிக்கப்படுகின்றபோது அதற்காக குரல்கொடுத்து அவற்றை உரிய முறையில் பெற்றுக்கொடுக்கவுமே மா மனிதர் மர்ஹும் அஷ்ரப் மு.கா. தோற்றிவித்தார்.

ஆனால், இன்றைய முஸ்லிம் காங்கிரஸின் தலைமைத்துவமும் அதன் அதியுயர் பீட உறுப்பினர்களும் முஸ்லிம்களின் உரிமைகளுக்கு இத்தனை அழுத்தம் ஏற்பட்டுள்ள போதிலும் அவற்றை உலமா சபை பார்த்துக் கொள்ளட்டும் என்று கண்களை மூடிக்கொண்டு இருப்பதை கிழக்கிலும் சரி தெற்கிலும் சரி இக்கட்சிக்கு வாக்களித்த மக்கள் இக்கட்சியின் செயற்பாடு குறித்து மௌனமாக இருக்கிறார்கள்.

இந்நாட்டில் வாழும் முஸ்லிம்களின் பெரும்பான்மை ஆதரவைப் பெற்ற முஸ்லிம் காங்கிரஸ் அக்கட்சி உறுப்பினர்களுக்கு அமைச்சர் பதவி வழங்கப்பட்டாலோ அல்லது கட்சிக்குள் சில்லரைச் சண்டை ஏற்பட்டாலோ அவசர அவசரமாக அதியுயர் பீடத்தைக் கூட்டி பேசுகின்ற நிலையில், முஸ்லிம்களின் உரிமைகளைப் பறிப்பதற்கு தினந்தோரும் மேற்கொள்ளப்பட்டு வரும் நடவடிக்;கைககள் தொடர்பில் முஸ்லிம்களின் உரிமைகளைப் பாதுகாப்பதற்காக கலந்துரையாடுவதற்கு எத்தனை தடவை இந்தக் கட்சியின் அதியுயர் பீடம் கூட்டப்பட்டிருக்கும். 

பள்ளிவாசல்கள் உடைக்கப்படுகிறது என்று உணர்வுகளை உசுப்பி வாக்குகளைப் பெற்று அதிகார ஆசனங்களைப் பெற்றுக்ககொள்ள முடியுமென்றால், அந்த மக்களின் இருப்புக்கு ஆபத்து ஏற்பட்டுள்ள நிலையில்  அதைப் பாதுகாப்பதற்கு மக்கள் வழங்கிய அந்த அரசியல் அதிகாரத்தினூடாக எத்தகையை இராஜதந்திர நடவடிக்கைகளை  இந்தக் கட்சி எடுத்துள்ளது. கேவலம் இந்தக் கட்சியை வளர்த்தெடுத்து இவர்களை பாராளுமன்றம் காணச் செய்த அந்ததப் பெரும் தலைவன் இந்த நாட்டைக் காட்டிக்கொடுத்தார் என பேரினவாதக் கட்சியைச் சேர்ந்த அமைச்சர் ஒருவர் கூறியபோது, அக்கூற்றையாவது எதிர்த்து இக்கட்சியின் தலைமைத்துவமும் அதன் உயர் பீடமும் பேசாமல்  வாய் மூடி மௌனிகளாக இருந்துள்ளனர் இத்தகைய முதுகெழுபில்லாதவர்களை   இனியும் நாம் எத்தனை நாளைக்கு நம்பி இவர்களின் பசப்பு வார்த்தைகளுக்கு மயங்கிக் கிடக்கப்போகிறோம் என்று  மு.கா.வுக்கு வாக்களித்த மக்களிடம் இக்கேள்வியைக் கேட்பதாக கிழக்கிலங்கை முஸ்லிம் இளைஞர் முன்னணி விடுத்துள்ள அறிக்கையில் மேலும் குறிப்பிடப்பட்டுள்ளது.