பெளத்த புனித சின்னங்களை முஸ்லிம்கள்தான் பாதுகாத்துள்ளனர் - ஜனாதிபதி மஹிந்த

அண்மையில் நான் அம்பாறைக்கு விஜயம் செய்திருந்தேன். அப்பிரதேசத்திலுள்ள சில பெளத்த புனித சின்னங்களை அங்கு வாழும் முஸ்லிம்கள்தான் பாதுகாத்துள்ளனர். அத்தோடு அவற்றை அவர்களே பெளத்த தேரர்களுக்கும் வழங்கியுள்ளனர். இது பெரிதும் பாராட்டப்பட வேண்டிய செயல். அதனால் நாம் இன, மத, பேதங்களுக்கு அப்பால் ஒன்றுபட்டு செயற்பட வேண்டும். எமது மரபுரிமைகளைப் பாதுகாக்க வேண்டும். பதவிகள் நிரந்தரமானவை அல்ல. அதனால் எமது மரபுரிமைகளை எமது எதிர்கால சந்ததியினருக்காகப் பாதுகாத்துக் கொடுக்க வேண்டியது எம்மெல்லோரதும் பொறுப்பே என ஜனாதிபதி மஹிந்த ராஜபக்ஷ பேருவளையில்  தெரிவித்தார்.

பேருவளை சப்புகொட ஸ்ரீ மகா விகாரையைப் புனரமைத்து திறந்து வைக்கும் வைபவம் ஜனாதிபதி தலைமையில் நேற்று முன்தினம் மாலையில் நடைபெற்றது, இவ்வைபவத்தில் உரையாற்றும் போதே ஜனாதிபதி மேற்கண்டவாறு குறிப்பிட்டார். இவ்வைபவத்தில் ஜனாதிபதி மஹிந்த ராஜபக்ஷ அவர்கள் தொடர்ந்தும் உரையாற்றுகையில், 

நான் தேரர்களையும், விகாரைகளையும், கட்சி நிற அடிப்படையில் பார்ப்பவன் அல்ல. சகல தேரர்களையும் காவியுடை தரித்த பெளத்த மதத்தலைவர்களாகவே நான் பார்க்கின்றேன். இந்த விகாரை 260 வருடங்களுக்கும் மேல் பழைமைமிக்கது. இங்குள்ள கலை வடிவங்களைப் பார்க்கும் போது அவை எமது பாரம்பரிய மரபுரிமைகளை வெளிப்படுத்துகின்றன. இது எமக்குப் பெருமையாகும்

நாட்டில் பேதங்களை ஏற்படுத்துவதற்காக எந்த வர்க்கத்தைச் சேர்ந்த தனி நபரோ, குழுவினரோ செயற்படுவார்களாயின் சமாதானத்தையும், சமத்துவத்தையும், நல்லிணக்கத்தையும் பாதுகாப்பதற்காக அவர்களுக்கு எதிராக சட்ட நடவடிக்கை எடுப்பதற்கு ஒரு போவதும் பின் நிற்க மாட்டேன் என்றும் ஜனாதிபதி மஹிந்த ராஜபக்ஷ  தெரிவித்தார்.