முஸ்லிம் காங்கிரஸ் ஜம்மியத்துல் உலமாவோடும் ஒத்துழைக்கும்..!

(எஸ்.அன்சப் இலாஹி)

சிலர் தங்களுடைய அரசியல் இலாபங்களுக்காக முன்னுக்குப் பின் முறணாக, ஒரு கட்டத்தில் ஹலால் சான்றிதழை மீளப்பெறக்கூடாது என்றும் மீளப்பெற்றதற்குப் பிறகு மீளப்பெற்றது பிழை என்றும் அதற்கு பிறகு ஜம்மியத்துல் உலமா சரி என்றும் பக்குவமற்ற அறிக்கைகளை விட்டு முஸ்லிம் மக்களையும் குழப்பி அவர்களும் குழம்பி இருக்கிறார்கள் ஆகவே சமூகத்தலைவர்கள், மதத்தலைவர்கள், அரசியல் தலைவர்கள் இந்த விடயத்தை நிதானமாக நடத்தியது போன்றும் ஜம்மியத்துல் உலமா என்கின்ற  அந்த அமைப்பு இதுவரைக்கும் செய்துவந்திருக்கின்ற கடமைகளை தொடர்ந்தும் செய்ய வேண்டும் என கிழக்கு மாகாணசபை உறுப்பினர் ஏ.எல்.தவம் தெரிவித்துள்ளார்.

கிழக்கு மகாணசபை உறுப்பினர் ஏ.எல்.தவம் முஸ்லிம் மக்களுக்கு பொது பலசேனாவால் ஏற்படுத்தப்பட்டுவருகின்ற நியாயமற்ற செயற்பாடுகள் தொடர்பாக நேற்று (18.03.2013) வெளியிட்டுள்ள ஊடக அறிக்கையிலேயே மேற்படி தெரிவித்துள்ளார்.

அவ் அறிக்கையில் மேலும் தெரிவிக்கப்பட்டுள்ளதாவது- கடந்த காலங்களில் பொது பல சேனா ஹலால் உணவை ஒரு விடயமாக கையில் எடுத்து கொண்டது போன்று ஹிஜாபையும், முகத்தை மூடிக்கொள்வதனையும் ஒரு பிரச்சினையாக இப்போது கையில் எடுத்துக்கொண்டு பிரச்சாரத்தில் இறங்கியிருக்கிறார்கள். பொதுபலசேனா ஹலால் தொடர்பான விடயத்தினை பிரச்சாரம் செய்து முஸ்லிம் மக்கள் மத்தியில் அதிகமாக ஏற்பட்டுள்ள விழிப்புணர்வு போன்று முகத்தினை திறக்க அல்லது ஹிஜாபை அகற்றவேண்டும் என்கின்ற விடயமும் அதிகமாக விழிப்புணர்வையே ஏற்படுத்தும் என்பதே உண்மை இதனால் முஸ்லிம் மக்களிடத்தில் விழிப்புணர்வுகள் ஏற்பட்டு வருவதனை நாம் பார்க்கிறோம். உலகில் இருக்கின்ற பௌத்த மதம் என்பது சகிப்புத்தன்மையோடும், மனிதபிமானத்தோடும் தொடர்பிருக்கின்ற ஓர் மதம்; என்ற அடிப்படையில் ஏனைய மதங்களுடைய அடையாளங்களை  மதிக்கின்ற ஒரு மதத்தில் இருக்கின்ற பௌத்த குருமார்கள் அந்த மதத்தை கண்ணியப்படுத்தவேண்டுமே தவிர இழிவுபடுத்துவதற்கு ஒரு நாளும் முற்படக்கூடாது.

இலங்கையிலே கடந்த 30 வருடங்களாக இடம்பெற்றுவந்த யுத்தத்திற்கு பின்பு கொஞ்சம், கொஞ்சமாக இப்போதுதான் இன சௌஜன்யமும் இன ஒற்றுமையும் வளர்ந்துவரும்போது, மிகக் குறுகிய அரசியல் இலாபங்களுக்காக தங்களுடைய கைகளிலே இனவாதத்தையும் அதே போன்று மதவாதத்தையும், கையில் எடுத்திருக்கின்ற பொதுபல சேனா போன்ற அமைப்புக்களை சிங்கள மக்கள் ஒரு நாளுமே ஏற்றுக்கொள்ள மாட்டார்கள் அதற்கு கண்டியிலே நடந்து முடிந்திருக்கின்ற அவர்களுடைய மாநாடு மிகச் சிறந்த சாட்சியமாகும். இலங்கை பூராகவும் உள்ள அவர்களுடைய ஆதரவாளர்கள் அனைவரையும் அழைத்துவந்து கண்டி மாநாடு நடாத்தியபோதும் அங்கே ஆயிரத்திற்கும் குறைவானவர்களே கலந்துகொண்டு அதனை நடாத்தி முடித்த விடயம் என்பது சிங்கள மக்கள் இவர்களை ஏற்றுக் கொள்ளவில்லை என்பது மிக வெளிப்படையான ஓர் முன் உதாரணமாகும். அந்த அடிப்படையில் பொதுபல சேனா மற்ற இனங்களை மதிக்கின்றவரைக்கும்தான் சிங்கள மக்கள் அவர்களோடு இருப்பார்களே தவிர, அதற்கு மாற்றமானால் அவர்களோடு சிங்கள மக்கள் இருக்கமாட்டார்கள். அதே போன்று முஸ்லிம் அரசியல் தலைமைகள் மற்றும் மார்க்கத்தலைவர்கள், சமூகத்தலைவர்கள் இந்த விடயத்திலே இதுவரைக்கும் காட்டிவந்த பொறுமை பாராட்டத்தக்கது.  வெறுமென தங்களது ஒரு நிகழ்ச்சி நிரலுக்காக இவர்கள் பொதுபலசேனாவோடு முண்டிக்கு முண்டி நின்று ஒரு பெரிய கலவரங்கள் ஏற்படுவதனை விட அல்லது இந்த நாட்டில் ஓர் இன முறுகல் ஏற்படுவதை விடவும்; முஸ்லிம் மதப்பெரியார்கள் அதே போன்று சமூகத்தலைவர்கள் இதுவரைக்கும் சாதித்திருப்பது பாராட்டத்தக்க விடயமாக இருக்கிறது.

அரசியல் கட்சிகளிடம்; அல்லது நிறுவனங்களிடம் இந்த விடயங்களை கொடுக்கின்ற போது அவர்கள் தங்களுடைய சொந்த நிகழ்ச்சி நிரலுக்கேற்றவாறு விடயங்களை நகர்த்தி அங்கு மிகப் பெரிய ஒரு பூகம்பம், பூதாகரமான நிகழ்வுகளை அரங்கேற்றி இந்த முஸ்லிம் சமூகத்தை இக்கட்டான நிலைக்கு உட்படுத்திவிடுவார்கள் என்கின்ற அச்சம் எம்மத்தியில் உள்ளது.

ஆகவே தொடர்ந்து நிதானமான போக்கொடு ஸ்ரீலங்கா முஸ்லிம் காங்கிரசும் அதனுடைய தலைமையையும், ஜம்மியத்துல் உலமாவோடும், பொதுவான அமைப்புக்களோடும் ஒத்துழைக்குமே தவிர தனியாக கையில் எடுத்து இதனை ஒரு அரசியல் பிரச்சினையாக மாற்றாது. எமது மதத்திற்கு எதிராக கொண்டுவரப்படுகின்ற ஒரு தீவிரவாத அமைப்பாகிய பொதுபலசேனா அமைப்பால் கொண்டு செல்லப்படுகின்ற விடயத்திற்கு ஸ்ரீலங்கா முஸ்லிம் காங்கிரஸ் எதிர்பினை வெளிகாட்டுவதுடன், ஸ்ரீலங்கா முஸ்லிம் காங்கிரசின் எல்லா சக்திகளையும் ஒன்றுதிரட்டி இவ்வாறான அமைப்புகளை தோற்கடிப்பதற்கு இந்த பிரச்சினையை அரசியலுக்கு அப்பால் நின்று முன் கொண்டு செல்கின்ற பொது அமைப்புக்களுக்கு உறுதுணையாக இருக்கும் என்பதனை தெரிவித்துக் கொள்ள விரும்புகிறேன் என்று மேலும் அவ் ஊடக அறிக்கையில் தெரிவிக்கப்பட்டுள்ளது.