ஈராக்கை அமெரிக்கா ஆக்கிரமித்து 10 வருடங்கள்

ஈராக்கில் சதாம் உசைனை அகற்றுவதற்காக கடந்த 2003-ம் ஆண்டு மார்ச் 20-ம்தேதி அமெரிக்கா தலைமையிலான நேட்டோ படை போரை தொடங்கியது. இந்த போரில் சதாம் உசேன் ஆட்சி அகற்றப்பட்டது. சதாம் உசேன் கைது செய்யப்பட்டு தூக்கிலிடப்பட்டார். இந்த போர் தொடங்கி 10 ஆண்டுகள் நிறைவடைந்தது.

இன்று தலைநகர்  பாக்தாத்தில் பரபரப்பான மார்க்கெட்டில் கார்குண்டு வெடித்தது. பாக்தாத்தின் தெற்கு பகுதியில் நகரில் போலீஸ் தளம் மீது தற்கொலைப்படைவாதி ஒருவர், டிரக்கினால் மோதி வெடிக்கச் செய்தார். இந்த தாக்குதல்களில் குறைந்தபட்சம் 50 பேர் இறந்திருக்கலாம் என அஞ்சப்படுகிறது. 160 பேர் காயம் அடைந்து மருத்துவமனைகளில் சேர்க்கப்பட்டுள்ளனர்.


2003-ஆம் ஆண்டில் அமெரிக்கா தலைமையிலான ஆக்கிரமிப்பு துவங்கியதிற்கு பிறகு 10 ஆண்டுகளில் கிட்டத்தட்ட 1,12,000 சிவிலியன்கள் கொல்லப்பட்டுள்ளதாக ஈராக் பாடி கவுண்ட்(ஐ.பி.சி) என்று குழு தயாரித்த அறிக்கை கூறுகிறது. இந்த எண்ணிக்கை இதுவரை கிடைத்த விபரம் என்றும், முழுமையான ஆவணங்கள் கிடைக்கும் பொழுது இறந்தவர்களின் எண்ணிக்கை 1,74,000 ஆக அதிகரிக்கும் என்றும் லண்டனை மையமாக கொண்டு இயங்கும் ஐ.பி.சி கூறுகிறது.

வரலாற்றில் இதுவரை இல்லாத கூட்டுப்படுகொலை ஈராக்கில் நடந்துள்ளது. ஆக்கிரமிப்பு துவங்கிய ஆண்டுகளில் துல்லியமான விபரங்கள் கிடைத்துள்ளன. கடந்த சில ஆண்டுகளாக தெளிவான தகவல்கள் கிடைக்கவில்லை என்று ஐ.பி.சியின் அறிக்கையில் கூறப்பட்டுள்ளது. ஈராக்கின் தலைநகரான பாக்தாதில்தான் அதிகமான அப்பாவி மக்கள் கொல்லப்பட்டுள்ளனர்.