அனைவரையும் கவர்ந்த ஜப்னா முஸ்லிம் இணையம்

(M.H.M. அப்துல்லாஹ் - அல் அஸ்ஹர் பல்கழைக்கழகம்)

நவீன உலகில் ஊடகத்துறை என்பது மிக முக்கியமான ஒன்றாகும். உலகில் எந்த ஒரு மூலையிலும் இடம் பெரும் சம்பவங்களை உடனுக்குடன் கண்டங்கள் தாண்டி அவ்வினாடியே காட்சிப்படுத்தும் சாதனங்களாக இன்று  அது மாறியிருக்கிறது.

எனினும் ஊடகத்துறையில் இலங்கை முஸ்லிம்களின் வகிபாகம் பல தசாப்தங்களாக கேள்விக்குறியாக இருந்த போதிலும் அண்மையில் சில இணையதளங்கள் உருவாக்கபட்டு  குறிப்பிடத்தக்க அளவு ஆரோக்கியமான பணிகளை மேற்கொண்டு வருவது பாராட்டத்தக்கது.

குறிப்பாக “ஜப்னா முஸ்லிம்’ என்ற இணையதளம் சம காலத்தில் செய்திகளை உள்வாங்குவதிலும் அவைகளை வெளியிடுவதிலும் பிரத்தியேகமான தன்மைகளை கொண்டுள்ளது எனலாம்.

இயக்க மோதல்கள், கட்சி விமர்சனங்கள் போன்றவற்றை தவிர்த்து இலங்கை முஸ்லிம்களை விழிப்பூட்டும் செய்திகளையும்  காலத்துக்கு இயைந்த கவர்ச்சிகரமான கருத்துக்களையும் இஸ்லாமிய நடுநிலை சிந்தனைகளையும் சுமந்த ஒரு இணையதளமாக “ஜப்னா முஸ்லிம்” மக்களை சென்றடைகிறது.

முஸ்லிம்களின் அக முரண்பாடுகளை தனிக்கும் ஆக்கங்களை அதிகமாக பிரசுரித்து சமுக ஒற்றுமைக்காக சிறப்புக் குரல் கொடுத்த ஒரே இணையமாக அதை நான் காண்கிறேன்.

நியாயமான கோரிக்கைகளுக்கு இயக்க, கட்சி வேறுபாடு பாராமல்  களம் அமைத்துக் கொடுப்பது அதன் மற்றுமோர் சிறப்பம்சம்.

தகவல் துறையில் அதன்  பிரவேசம் தாமதமாக இருந்தாலும் குறிகிய காலப்பகுதியில் அதன் அறுவடைகள் பன்மடங்காகியுள்ளது.

அண்மையில் இலங்கை முஸ்லிம்களுக்கு எதிராக கட்டவிழ்த்து விடப்பட்ட இனவாத செயற்பாடுகளை உடனுக்குடன் முஸ்லிம் ளின் கவனத்துக்கு  கொணர்வதில் துரிதமாக செயற்பட்ட ஒரே இணையதளம் அதுவேயாகும்.

மயக்கத்தில் இருந்த முஸ்லிம்களை தட்டி எழுப்பியது மட்டுமல்லாமல் அவர்களின் எதிர்காலம் பற்றிச் சிந்திக்க அது தூண்டியிருக்கிறது.

பக்க சார்பில்லாமல் சமூக நலனை முதன்மைப்படுத்தி உண்மையாகவும், தெளிவாகவும், துணிவாகவும் செய்திகளை மக்களிடம் கொண்டு செல்லும் இம் மகத்தான பணியை பாராட்டாமல் இருக்கமுடியாது.

செய்திகளில் நம்பகத்தன்மை, செய்திகளை எழுத்து வடிவில் சுருக்காது படங்களுடன் வெளியிடல், சுடச்சுட வெளியிடல், தனித்துவம், மற்றும் ஊடகவியல் ஒழுக்கம். போன்ற உயர் பண்புகளைப் பேணிவதில் ஜப்னா முஸ்லிம் தனித்துவமாக விளங்குகிறது.

இன்று இலங்கை முஸ்லிம்கள் தமது தேசத்தின் செய்திகளை உடனுக்குடன் அறிய முகநூலுக்கு அடுத்த படியாக ஜப்னா முஸ்லிமைத்தான் நாடுகிறார்கள் என்றால் அது மிகையல்ல.

அதன் மகத்தான பணி என்றும் தொடர எனது வாழ்த்துக்கள். ஜப்னா முஸ்லிம் நிருவாகிகளின் நேர்மையான நோக்கத்தை அல்லாஹ் ஏற்றுக்கொள்வானாக!