காத்தான்குடியில் வெள்ளை வானில் கடத்தப்பட்ட சிறுவன் விடுவிப்பு

(Tm) காத்தான்குடியில், சிறுவன் ஒருவன் இனம் தெரியாத நபர்களினால் வெள்ளை வானில் கடத்தப்பட்டு பின்னர் விடுவிக்கப்பட்டுள்ளதாக காத்தான்குடி பொலிஸார் தெரிவித்தனர்.

புதிய காத்தான்குடி பரீட் நகர் பாம் வீதியில் வசிக்கும் சுஹைப் முகம்மது அர்ஹாம் எனும் 12வயது சிறுவனே இவ்வாறு கடத்தப்பட்டு விடுவிக்கப்பட்டுள்ளார்.

நேற்று சனிக்கிழமை இச்சிறுவன் புதிய காத்தான்குடி பதுறியா வீதியில் துவிச்சக்கர வண்டியில் சென்று கொண்டிருந்தபோது வெள்ளை வானில் வந்த இனம் தெரியாத சிலரினால்  கடத்தப்பட்டுள்ளார்.

இதேவேளை, இச்சிறுவன் ஓடிச் சென்ற துவிச்சக்கர வண்டியையும் மேற்குறிப்பிட்ட நபர்கள் வானில் எடுத்துச்சென்றுள்ளதாக தெரிவிக்கப்படுகின்றது.

இதனையடுத்து இச்சிறுவனின் பெற்றோர் காத்தான்குடி பொலிஸ் நிலையத்தில் சிறுவனை காணவில்லையென முறைப்பாடு செய்துள்ளனர்.

பொலிஸார் மற்றும் சிறுவனின் குடும்ப உறவினர்கள் சிறுவனை தேடிக்கொண்டிருந்தபோது சிறுவன் நேற்று பிற்பகல் வீடு வந்து சேர்ந்துள்ளான்.

தன்னை ஆறுபேர் வெள்ளைவேனில் கடத்திச் சென்றதாகவும் பின்னர் மட்டக்களப்பு வழியாக கொண்டு செல்லப்பட்டு மட்டக்களப்பிலுள்ள வாவியோரமாகவுள்ள வீதியோரத்தில் தன்னை தள்ளிவிட்டு சென்றதுடன் தனது சைக்கிளையும் கீழே போட்டு விட்டு சென்றதாக அச் சிறுவன் பொலிஸில் தெரிவித்துள்ளான்.

இச்சம்பவம் தொடர்பாக காத்தான்குடி பொலிஸார் விசாரணைகளை மேற்கொண்டு வருகின்றனர்.