கமலை பாராட்டுகிறேன்..! விஸ்வரூபம் திரையிடப்படவேண்டும்..!

(ரவூப் ஹஸீர்)

சர்ச்சைக்குறிய மேற்படி திரைப்படத்தை முழுமையாக இலங்கை திரைப்படக் கூட்டுத்தாபன திரைக்கூடத்தில் பார்த்துவிட்டு வந்த நேரத்தில் இருந்தே எனக்குள் இதனை  எழுதுவதா இல்லையா என்கிற போராட்டம் இருந்தது. படத்தை பார்த்தவர்கள் , பார்க்காதவர்கள் என்று எத்தனையோ பேர் எதிர்ப்பாகவே இருந்துவிட்டார்கள் , எழுதிக்குவித்துமுள்ளார்கள். 

இப்போது சில காட்சிகளை நீக்கிவிட்டும், குர்ஆன் ஓதப்படும் ஒலிகளை கத்தரித்துவிட்டும் படத்தை வெளியிட இஸ்லாமிய இயக்கப் பிரதிநிதிகள் இணங்கியுள்ளதாகவும் சமரசம் எட்டப்பட்டுவிட்டதாகவும் செய்திகள் வந்துள்ளன.

இந்த சமரசத்தை கொண்டுவர கமல் இன்னும் எத்தனை கோடிகளை செலவளித்துள்ளாரோ தெரியாது..!

காட்சிகளை நீக்கிவிட்டு என்பதில் எனக்கு உடன்பாடே கிடையாது. இன்னும் சில காட்சிகளை சேர்த்து வெளியிடுவதாயின் ஒத்துக்கொள்ளுவேன்.   

இங்கு நான் எழுதுவது  என்னுடைய கருத்துகளே. எனக்கும் கருத்துச்சுதந்திரம் உண்டு. வாசித்துவிட்டு என்னை தோல் வேறு சதை வேறாக உறிக்காமல் உங்கள் கருத்துகளை வெளிப்படையாக சொல்வீர்கள் என்று நம்புகிறேன். 

என்னுடைய பார்வைக்குள் நான் நுழைவதற்கு முன்னால், வேறு ஒரு விஷயத்தை முதலில் சொல்லியாக வேண்டும். படத்தை பற்றி எனது சகோதரரும் முஸ்லிம் காங்கிரஸ் தலைவருமான ரவுப் ஹகீம் என்னிடம் கேட்டபோது " எக்காரணம் கொண்டும் இப்படம் இன்றைய சூழ்நிலையில் இலங்கையில் திரையிடப்படவே கூடாது . புது பாலா சேனா போன்ற இனவாத பிரசாரகர்களுக்கு இது மெல்லுகிற வாய்க்கு அவல் கிடைத்த கதையாகிவிடும்" என்று திட்டவட்டமாக தெரிவித்துள்ளேன். கடந்த 01.02.2013 அன்று நடைபெற்ற மு.கா அதி உயர்பீடக்கூட்டத்திலும் அவர் இதனை உறுதிப்படுத்தியுள்ளார்.   

இன்னுமொரு விசயத்தையும் முதலிலேயே குறிப்பிட்டு விடுகிறேன்.

சுமார் ஒரு வருடத்திற்கு முன்னர் இந்தியாவை சேர்ந்த பிரபல எழுத்தாளர் , பதிப்பாளர் மற்றும் உளவியல் நிபுணர் டாக்டர் ஹிமானா சையித் அவர்களுடனான கலந்துரையாடல் ஒன்று " தாருஸ்ஸலாமில்" இடம் பெற்ற போது அவரிடம் நான் இவ்வாறு கேள்வி எழுப்பினேன்.

" சென்னையில் , மதுரையில் , அல்லது திருச்சி போன்ற தமிழ் பேசும் மக்கள் வாழும் ஏதாவது ஒரு இடத்தில் முஸ்லிம் பயங்கரவாதிகள் எப்போதாவது  குண்டு வைத்துள்ளார்களா? உண்மை அப்படி இருக்கையில் ஏன் அநேகமான திரைப்படங்களில் காஸ்மீர் , பாகிஸ்தான் இஸ்லாமிய பயங்கரவாதிகள் தமிழ் நாட்டில் குண்டு வைக்க முயற்சிப்பதாகவும், ஒரு ஹிந்து அதனை கண்டுபிடித்து அப்பாவிப் பொதுமக்களை காப்பாற்றி பதக்கம் பெறுவதாகவும் காட்டப்படுகிறது ? இதை ஏன் உங்கள் மக்களும் இயக்கங்களும் எதிர்க்காமல் இருக்கிறீர்கள்? 

விடுதலைப் புலிகள், கொழும்பு உட்பட இலங்கையின் பல நகரங்களிலும் குண்டு வைத்தும் அனுராதபுர புனிதப் பிற தேசத்தில் பௌத்த பிக்குகளை கோரமாக கொன்றும், கண்டியில் தலாதா மாளிகை என்கிற மிகப்புனிதமாக கருதப்படுகிற கோவிலை குண்டு வைத்து தகர்த்தும், வயல் வெளிகளில் வேலை செய்துகொண்டும், இரவு வீடுகளில்    உறக்கத்திலும் இருந்த அப்பாவி பொதுமக்களை வெட்டியும் அரிந்தும் கொலைசெய்து.. இப்படியாக ஒரு பட்டியலே இருக்கும் போது, ஒரு  சிங்கள திரைப்படம் கூட தமிழ் சமூகத்தை முழுமையாக  பயங்கரவாதிகளாக காட்டியதுமில்லை, இந்து சமயத்தை பயங்கரவாத செயற்பாடுகளுடன் இணைத்ததுமில்லை. (இதுபற்றி சிறிது விரிவாக பிறிதொரு சந்தர்பத்தில் தனியாக எழுத எண்ணியுள்ளேன்.) இந்த முஸ்லிம்களை மட்டுமே பயங்கரவாதிகளாக சித்தரிக்கும் தமிழ் திரைப்படத் துறையினருக்கு  உங்கள் எதிர்ப்பை இனிமேலாவது காட்டுங்கள்" என்றேன் . 

அன்று அங்கிருந்த நஜிமுதீன் ( விடிவெள்ளி ஆசிரிய குழாம் ) நிலாம் ( தினக்குரல் ஆசிரிய பீடம் ) என்போர் அப்போது பல ஆதாரங்களுடன் என் கருத்துக்கு  வலு சேர்த்தார்கள் .

இது ஒரு வருடத்திற்கு முன்னர் நிகழ்ந்தது .

இந்தியா போனதும் தனது பத்திரிகையில் இதுபற்றி எழுதுவதாகவும் , உரிய நடவடிக்கைகளை எடுப்பதாகவும் ஹிமானா செய்யித் சொன்னார் . ஆனாலும் ஏதாவது செய்தாரா என்பது பற்றி எதுவுமே தெரியாது . 

பரவாயில்லை , ஒரு வருடம் கழிந்தாவது  இப்போது விழித்துக் கொண்டார்களே என்கிற அளவில் முன்னரே இதை சுட்டிக்காட்டியவன் என்கிற பெருமையில் நான் என் சட்டை காலரை கொஞ்சம் தூக்கிவிட்டுக் கொள்கிறேன் . 

"ஓகே ! இப்போதைக்கு என்னை சுற்றி ஒரு காவலரணை அமைத்துக் கொண்டாயிற்று " என்கிற நம்பிக்கையுடன் " விஸ்வரூபம் " பற்றிய என் பார்வைக்குள் நுழைகிறேன். 

பொதுவாக எல்லோரும் சொல்லும் பின்வரும் குற்றச் சாட்டுக்களை நான் ஒத்துக்கொள்ளப்போவதில்லை . ( வாசித்துவிட்டு முடியுமானால் எனது கொடும்பாவியை எரியுங்கள் . நானும் பிரபலமாகிவிடுவேன் )

· தொழுதுவிட்டு பயங்கரவாத செயல்களில் இறங்குவதாக காட்டுவது பிழை .

· தூக்கிலிடும் சந்தர்பத்திலும் , போரில் ஈடுபடும்  சந்தர்பங்களிலும் "அல்லாஹு அக்பர் " சொல்வதாக காட்டப்படுவது  பிழை .

· பல இடங்களில் குர்ஆன் பயங்கரவாத செயற்பாட்டாளர்களால் ஓதப்படுவதாக காட்டுவது பிழை .

· குழந்தைகளுக்கு  துப்பாக்கி பற்றிப் படிப்பிப்பதாக காட்டுவது பிழை .

· மருத்துவம் படிக்க விரும்பும் மகனை " நீ ஜிஹாத் போராளியாகத்தான் உயர வேண்டும் " என்று சொல்வதாக காட்டுவது பிழை .

( அவசரப்படாதீர்கள் , கீழே இதே * குறியீட்டுடன் இவை ஒவ்வொன்றிற்குமான என் பக்க நியாயங்களை எழுதவுள்ளேன்  )

இன்னும் குற்றச்சாட்டுகள் நிறைய சுமத்தப்பட்டாலும் இவைதான் பாரிய குற்றங்களாக பரவலாக சொல்லப்படுகின்றன . இவற்றில் எந்த நியாயத்தையும் என்னால் காண முடியவில்லை . 

தலிபான்கள் யார்...? 

அவர்கள் இஸ்லாத்தை அழிக்க  செயற்படும் யூத - அமரிக்கர்களுக்கு எதிராக செயற்படுபவர்கள் . இஸ்லாத்திற்காக உயிரையும் தியாகம் செய்வதற்காகப் பயிற்றுவிக்கப்பட்டவர்கள். எந்த அளவிற்கு இந்த தியாக உணர்வு அவர்களின் இரத்தத்தில் ஓடி , தசையில் ஊறி , நரம்புகளில் ஜீரணமாகி ......இருக்கிறது என்பது நமக்குத் தெரியாததல்ல. 

எந்த விதத்திலும் .அமெரிக்காவின் இந்த இஸ்லாமிய எதிர்ப்பு நடவடிக்கைகளால் நேரடியாக பாதிக்கப்படாத இலங்கை , இந்திய முஸ்லிம்களாகிய நாமே எத்தனை அமெரிக்க எதிர்ப்பு ஆர்ப்பாட்டங்களில் கலந்துகொண்டிருக்கிறோம் .தொண்டை கிழியக் கிழிய " நாரேதக்பீரும்" " அல்லாஹு அக்பரும் " முழங்கி இருக்கிறோம் . அமெரிக்காவின் , புஷ்சின் , ஏரியல் ஷேரோனின் , ஒபாமாவின் எத்தனை கொடும்பாவிகளை எரித்து அந்த புகை மூட்டத்துள் குதித்துக் குதித்து ஆடியிருக்கிறோம்  . அமெரிக்காவின் எத்தனை தேசியக் கொடிகளை கிழித்து, கால்களால் துவைத்து துவம்சம் செய்திருக்கிறோம் . எத்தனை அமெரிக்க எதிர்ப்பு கட்டுரைகள் எழுதி இருப்போம் , கவிதைகளில் கொந்தளித்திருப்போம் .

நேரடிப்பாதிப்புக்கு ஆளாகாத நாமே இப்படியெல்லாம் செய்திருக்கும் போது , இன்னும் செய்ய இருக்கும்போது , அமெரிக்க , நேட்டோ தாக்குதல்களில் தன் தாய் , தன் செல்லக் குழந்தை , குடும்பம் , சுற்றம் எல்லாமே தலை சிதறி , கைகால்கள் எல்லாம் துண்டம் துண்டமாகி  இறந்து கிடைப்பதை நேரில் கண்ட ஆப்கானிக்கு,.

தன் வீடும் , கடையும் , அலுவலகமும் சுக்கு நூறாகி சாம்பல் மேடாகி விட்டதை  தாங்கிக் கொள்ள முடியாத ஆப்கானிக்கு  எவ்வளவு ஆவேசமும் ஆத்திரமும் இருக்கும் . 

முஸ்லிம்களின் ஈமான் மிகவும் பலம் வாய்ந்தது , ஏனைய மதத்தவர்களை போலல்லாது இஸ்லாத்திமீது அளவுகடந்த இறுக்கம் முஸ்லிம்களுக்கு உள்ளது . இஸ்லாமியர்கள் இலகுவில் மதம் மாறுபவர்களே அல்ல . நாடு , நிலம் , கடல் கடந்து இஸ்லாம் என்கிற கயிற்றால் இறுக்கமாக  பிணைக்கப்பட்டவர்கள் . சத்தியமும் , விஞ்ஞானமும் நம்பகத்தன்மையுடன் குர்ஆன் , ஹதீதில் இருப்பதால் ஒரு முஸ்லிம் அல்லாஹ்வை பூரணமாக விசுவாசித்து இஸ்லாத்தை காப்பாற்ற உயிரையும் இழக்க சித்தமாக உள்ளான் .   

பாலஸ்தீனில் விமானத் தாக்குதல் நடந்தாலும் , காஷ்மீரில் குண்டு வெடித்தாலும் , ஆப்கானிஸ்தானில் போர் நடந்தாலும் தன் வீட்டில் , தன் தோட்டத்தில் நடந்தது போல் ஒரு முஸ்லிம் பதறுகிறான் . உடுக்கை இழந்தவன் கை போல் அவன் ஆகிறான்.

இஸ்லாத்திற்கு எதிரான இப்போரில் தானும் கலந்துகொண்டால் , அந்த ஜிஹாதில் புனித மரணம் எய்தி , அல்லாஹ்வுக்காக உயிர்த்தியாகம் செய்தால் சுவர்க்கம் நிச்சயம் என்று நம்புகிறான்.

இதற்க்கெல்லாம் அடிப்படை அவனின் ஈமான்.. . 

ரஷ்யா - ஆப்கான் போர் நடந்தபோது இறைவனை முழுமையாக மறுதலிக்கும் , கம்யுனிச கழுகுக்கெதிராக ஜிஹாத் ஆப்கானில் சிறகுவிரித்தது . அமெரிக்கா தனது சுயநல அஜென்டாவை மிகவும் சூட்சுமமாக அரங்கேற்றியது . ஒசாமா பி லாடன் என்கிற ஜிஹாதியை வலுப்படுத்தியது .பிறகு நடந்ததெல்லாம் அநேகருக்குத்தெரியும். விரிவஞ்சி விடுகிறேன் . 

தலிபான்களின் கருதுகோள் சரியோ பிழையோ என்பதல்ல இங்குள்ள பிரச்சினை . இஸ்லாத்தை அழிக்க முயலும் சியோனிஸ சக்திகளுக்கெதிரான அல்லாஹ்வுக்கான போராட்டம் இது என்றே சொல்லப்படுகிறது . அதை நம்புகிற ஆப்கானியர்களும், பிற தேசத்து முஸ்லிம்களும் அதில் இணைந்து போராடி புனித மரணம் எய்த தலிபான்களாகின்றனர். 

ஈமான் என்கிற உணர்வு அளவுகடந்து அவர்களுள் ஆட்சி செய்வத்னாலேயே அவர்கள் தலிபான் போராளிகளாகின்றனர். இந்த பின்னணியில்தான் நான் மேலே சரி கண்ட விசயங்களை நீங்கள் நோக்கவேண்டும்.

· மிக சாதாரண முஸ்லிமாகிய நாமே ஒரு காரியத்திற்காக வெளியிறங்கும் போது இரண்டு ரகாஅத்து  தொழுதுவிட்டே புறப்படுகிறோம். அல்லாஹ்விற்காக , அவனின் இஸ்லாத்தை காப்பதற்காக வெளியிறங்குகிறேன் என்கிற நிய்யத்துடன் புறப்படுகிற ஜிஹாதி தொழாமலா புறப்படுவான் . உண்மையை உண்மையாக காட்டியிருக்கிறார் கமல் . ஈமானின் பலத்தை தெளிவாகச் சொல்லியிருக்கிறார் கமல் . முஸ்லிம்கள் இவ்வளவு தூரம் அல்லாஹ்வை விசுவாசிக்கிரார்கள் , அவர்கள் சாமானியமான வர்கள் அல்ல என்பதை சொன்னதற்கு கமலை பாராட்டவேண்டாமா . ( "அடிடா இவனுக்கு கல்லு "  என்று யாரோ சொல்வது கேட்கிறது .)  

சாதாரண அரசியல் கூட்டத்திலேயே " நாரே  தக்பீர் " முழங்குபவர்கள் அல்லவா நாம் . அமெரிக்க எதிர்ப்பு ஆர்ப்பாட்டம் எதிலாவது " அல்லாஹு அக்பர் " சப்தம் ஓங்கி ஒலிக்காமலிருந்ததுண்டா? இப்போது உங்கள் கல்பில் கை வைத்து சொல்லுங்கள் , விரோதியென தலிபான்கள் இனம்காண்கிற ஒருவனை ( அந்த  மனிதன் சூழ்நிலைக் கைதி - கமல் ஏற்றுள்ள பாத்திரந்தான்  இங்கு உண்மையான துரோகி என்பது வேறு கதை ) அதுவும் நேட்டோ விமானங்களுக்கு முஸ்லிம் போராளிகளின் மறைவிடத்தை காட்டிக்கொடுத்தவனுக்கு , பலர் அநியாயமாக உயிர் இழப்பதற்கு காரணகர்த்தாவாக இருந்ததாக நம்பப்படுபவனுக்கு மரண தண்டனை நிறைவேற்றப்படும்போது அவர்கள் அல்லாஹு அக்பர் சொல்வதில் என்ன பிழை ! நாறேதக்பீரும் , அல்லாஹு அக்பரும் வெறுமனே தேர்தல் மேடைகளுக்கும் , ஆர்ப்பாட்ட ஊர்வலங்களுக்கும் மட்டுந்தானா ஆகுமானது ? 

இஸ்லாமியர்கள் "அல்லாஹ்வுக்காக" என்று வரும்போது சுற்றம் , உறவு ,நட்பு , ரத்த பாசம் எல்லாவற்றையும் ஒதுக்கிவைத்துவிடுவார்கள் என்பதை இங்கு கமல்ஹசன் சொல்வதில் நாம் பெருமைப்பட வேண்டாமா..?

நிறைய இடங்களில் குர்ஆன் ஓதுவதை காட்டுகிறார் கமல் . ஒரு முஸ்லிமின் வாயில் "அல்லாஹ்வின் கலாம்" எந்நேரமும் இருக்கும் என்பதை அவர்சொன்னால் பிழை . நாம் சொன்னால் சரியா ? தமிழர்களில் எத்தனை பேருக்கு அவர்களின் இந்து மத சுலோகங்கள் தெரியும் . அதை அவர்கள் அன்றாட வாழ்க்கையில எங்காவது சொல்லிவருகிரார்களா ? ஆனால் ஒரு முஸ்லிம் அப்படியல்ல அவன் தெருவில் நின்றும் ஒதுவான் , பஸ்ஸில் பிரயாணம் செய்யும்போதும் ஒதுவான் , தூங்கச்செல்லும்போதும் ஒதுவான் , தூங்கி எழுந்ததும் ஒதுவான் இதுதானே நடைமுறை . இந்த பக்தியை தெளிவாக காட்டியிருப்பதில் என்ன பிழை ! 

ஒரு மருத்துவன் தன் பிள்ளையை தன்னைவிட சிறந்த மருத்துவனாகவும்  , ஒரு வழக்கறிஞ்ஞன் தன் பிள்ளையையும் உயர் வழக்கறிஞ்ஞனாகவும் உருவாகுவதென்பதே இன்று நிகழ்ந்துகொண்டிருக்கிறது. தனது மகனை ஜிஹாத் போராளியாக  ஆக்குவதற்காக  (அவனை வைத்து சம்பாதிக்க, சுக போகங்களை சுகிக்க அல்லாமல் , அல்லாஹ்வுக்காக இழக்க) கனவுகாணும் ஒரு தந்தை, தன் மகனுக்கு இருக்கும் ஆயுதங்கள் பற்றிய அறிவை துப்பாக்கி , தோட்டாக்களை கொண்டு சோதித்து ,மற்றவர்களுக்கு முன்னாள் மகனின் திறமையை பெருமையாக காட்டிக் கொள்வதில் அப்படி என்ன பிழை இருக்கிறது ?  

ஈன்ற பொழுதினும் பெரிதுவக்க , தன் மகனை சான்றோன் எனக்காட்டுவது குற்றமா?

வாழ் நாள் வரமாக கிடைத்த மகனை , அல்லாஹ் கனவில் சொன்னான் என்பதற்காக  அறுக்கத் துணிந்த இன்றாஹீம் நபியின் கதையை எத்தனை குத்பாக்களில் சொல்லியிருப்பார்கள் . அதற்காக நாம்  தியாகத்திருநாள் என்று ஒரு பெருநாளையே கொண்டாடுகிறோமே . மருத்துவனாக கனவுகாணும் மகனை இஸ்லாத்தை காப்பதற்காக போராளியாக  ஒரு தந்தை தியாகம் செய்ய துணிந்ததில் இப்போது எப்படி பிழை காண்கிறீர்கள்? 

எல்லா அரசியல் தலைவர்களும் நாட்டுக்கொரு நீதியும், தன் குடும்பத்திற்கொரு நீதியுமாக நடந்து கொள்ளும் போது " ஊருக்கு மட்டுமல்ல உபதேசம் உனக்குமதுதானடி" என்கிற முல்லா ஓமரின் தலைமைத்துவப் பண்பை காட்டுகிற கமலை பாராட்ட வேண்டாமா ? இஸ்லாமிய சரித்திரத்தில் உள்ள இது போன்ற தியாக சம்பவங்களை  நாம் மிம்பர்களில் கதைத்ததெல்லாம் மறந்துவிட்டதா ?    

மலாலா என்கிற சிறுமிக்கு இவ்வளவு புகழும் , நோபல் பரிசு கொடுக்கவேண்டும் என்கிற குரல்களும் ஏன் ? படிப்பை விடவும் போராட்டம் இப்போது முக்கியம் என்கிற தலிபான் கொள்கைக்கான மலாலாவின் எதிர்ப்புத்தானே  தானே அவளுக்கு இவ்வளவு புகழும் வருவதற்கு காராணம் . தலிபான்கள் எதை சொல்கிறார்களோ அதைத்தானே கமலும் காட்டியிருக்கிறார் . உண்மையை சொன்னால் உங்களுக்கு உறைக்கிறதோ ! ( "எடுடா அரிவாளை " என்று அப்போது கல்லுப் பொறுக்கப் போனவனை கூப்பிடுவது போல் தெரிகிறதே !)  

சரி .... என்னுடைய வாதங்கள் இத்தோடு முற்றுப்பெறுகின்றன.

எனக்குத்தெரியும் ......

இதுவரையிலும் , என் பக்க நியாயங்களை வாசித்துக்கொண்டிருந்த மகாசனங்களின் மக்கள் நீதி மன்றத்தில் எனக்கான மரண தண்டனையையும் நீங்கள் விதித்தாகிவிட்டது.  

எந்த ஒரு மரணதண்டனை கைதியிடமும் அவனது கடைசி விருப்பத்தை கேட்பது வழக்கமல்லவா! 

" ஏய் ...முனாபிக்கே ! உன்னை கல்லால் அடித்துக் கொள்ள முன் உன் கடைசி விருப்பத்தை சொல்லுடா " என்று யாரோ கத்துவதும் கேட்கிறது .  

இதோ ...இ(அ)ப்பாவியின் கடைசி விருப்பம் .

" பின்வரும் காட்சிகளை இப்படத்துடன் இணைக்குமாறு நான் கேட்டுக்கொண்டதாக கமலிடம் சொல்லுங்கள் .அதற்கு அவர் இணங்காத விடத்து படத்தை எக்காரணம் கொண்டும் வெளியிடவே முடியாது என்று ஜிஹாத் செய்யுங்கள் !

1. அமெரரிக்க - நேட்டோ படைகளின் அராஜக குண்டு வீச்சுகளால் துண்ட துண்டமாய் சிதறும்  அப்பாவி குழந்தைகள் , பெண்கள் , வயோதிபர்களின் காட்சி.

2. சாம்பல் மேடாகியுள்ள பள்ளிவாசல்களுக்கு முன்னால் , வெறும் கற்குவியல்களுக்குள் சுஜூது செய்து தொழும் ஈமாந்தாறிகளின் காட்சி . 

   

3. இரத்த வெள்ளத்தில் மிதக்கும் உறவுகளின் மையத்துகளுக்கு முன்னாள் கதறித்துடிக்கும் சிறுவர்களின் பிஞ்சு உள்ளங்களில் முளைவிடும்  ஜிஹாத் உணர்வுகளின் எழுச்சிக் காட்சி .

4. குர்ஆனை கிழித்துவீசி , அதன்மேல் சிறுநீர் கழித்து எரித்து மகிழும் அமெரிக்க - நேட்டோ வெறியர்களின் காட்சி.

5. அசிங்கங்கள் நிறைந்த அந்நிய கலாச்சாரத்தை  , ஆங்கிலக் கல்வி என்கிற பசுத்தோலுக்குள் பதுக்கி அறிமுகப்படுத்தும் சியோனிச ராஜாதந்திரத்தை தோலுரிக்கும் ஒரு காட்சி .

புதிதாக மீண்டும் இவற்றை எல்லாம் படமாக்க நீண்ட காலம் , பணம் எல்லாம் தேவை என்று காரணம் சொல்லி கமல் நிச்சயமாகவே தப்பிக்க முயற்சிப்பார்.

அதற்காக பணமோ , காலமோ அவசியமே இல்லை இதோ இருக்கிறது , நிஜக்காட்சிகள், அள்ளியெடுத்துக்கொள்ளுங்கள் என்று இணையத்தை திறந்துகொடுங்கள் . " 

என் கடைசி விருப்பத்தை நிறைவேற்றுவீர்கள் என்கிற நம்பிக்கையுடன் இதோ உங்கள் கல்லெறிகளுக்காக நெஞ்சு  திறந்து நிமிர்ந்து நிற்கிறேன்  நான். 

வாருங்கள் !