முஸ்லிம்களுக்கு எதிராக குருநாகலில் தொடரும் அடாவடிகள்..!

(இ. அம்மார்)

குளியாப்பிட்டிய நாரம்மல பிரதான வீதியில் அமைந்துள்ள ஹொரம்பாவ என்ற இடத்தில் 10-02-2013 அன்று நேற்று சுப்ஹுத் தொழுகையை நிறைவேற்றச் சென்று கொண்டிருந்த நபர் ஒருவர் மீது இனந்தெரியாதவர்கள் தாக்குதல் நடத்தியுள்ளனர்.

மோட்டார் சைக்கிலின் மூலம் வருகை தந்த இருவரே இந்த நபரைத் தாக்கிச் சென்றுள்ளனர். அதேவேளை கற்பிட்டிக்கு செல்வதற்காக நின்று கொண்டிருந்த இன்னுமொரு நபரை வேனில் வந்த இனந்தெரியாத நபர்கள் வேனில் ஏறுமாறு நிர்ப்பந்தித்துள்ளனர் அவர் அதில் ஏறாமல் பின்னால் வந்த பஸ்ஸில் ஏற முற்பட்ட போது அவரையும் தாக்கி விட்டுச் சென்றுள்ளனர்.

கடந்த இரு நாட்களுக்கு முன் கடைகளில் முன்னால் போடப்பட்டுள்ள மின்குமிழ்களை கழட்டிச் சென்றுள்ளனர்.

அத்துடன் அப்பிரதேசத்திலுள்ள முஸ்லிம் கடைகளுக்கு ஹலால் முத்திரை பதிக்கப்பட்ட பொருட்கள் விற்பனை செய்யக் கூடாதெனக் கோரும் துண்டுப் பிரசுரம் அனுப்பி வைக்கப்பட்டுள்ளதாகவும் இந்தப் பிரதேசத்தில் ஒரு பதற்ற நிலை தோன்றுவதாக பிரதேசவாசிகள் தெரிவிக்கின்றனர்.