ஜனாதிபதி மஹிந்த 12 ஆம் திகதி யாழ்ப்பாணம் செல்கிறார்

ஜனாதிபதி மகிந்த ராஜபக்ஷ இருநாள் விஜயமாக எதிர்வரும் 12 ஆம் திகதி யாழ்ப்பாணத்துக்கு விஜயம் செய்யவுள்ளதாக யாழ்.அரச அதிபர் சுந்தரம் அருமைநாயகம் தெரிவித்தார். இதுதொடர்பில் அவர் மேலும் தெரிவிக்கையில், 

இரண்டு நாள் விஜயத்தை மேற்கொண்டு ஜனாதிபதி மகிந்த ராஜபக்ஷ எதிர்வரும் 12 ஆம் திகதி யாழ்ப்பாணத்துக்கு விஜயம் மேற்கொள்ளவுள்ளார். அன்றைய தினம் காலை 10 மணிக்கு யாழ்.ரில்கோ விருந்தினர் விடுதியில் யாழ்.மாவட்டச் செயலகத்தின் விசேட ஒருங்கிணைப்புக் குழுக் கூட்டம் ஜனாதிபதி தலைமையில் நடைபெறவுள்ளது என்றார்.  

இதேவேளை 13 ஆம் திகதி காலை 10.30 மணிக்கு ஜப்பான் ஜெய்க்கா நிறுவனத்தினால் யாழ்.போதனா வைத்தியசாலையில் அமைக்கப்பட்டுள்ள ஐந்து மாடிக் கட்டிடத்தை ஜனாதிபதி சம்பிரதாயபூர்வமாகத் திறந்துவைக்கவுள்ளார் என யாழ்.போதனா வைத்தியசாலையின் பதில் பணிப்பாளர் டாக்டர் எஸ்.ஸ்ரீபவானந்தராஜா தெரிவித்துள்ளார். 

ஜனாதிபதியின் விஜயத்தை முன்னிட்டு பாதுகாப்பு ஏற்பாடுகளை மேற்கொள்வதற்காக ஜனாதிபதியின் பாதுகாப்புப் பிரிவினர் நேற்று யாழ்ப்பாணத்துக்கு  வருகைதந்துள்ளதாக யாழ்.மாவட்டச் செயலகத் தகவல்கள் தெரிவிக்கின்றன.