இலங்கை முஸ்லிம்களின் உடனடி கவனத்திற்கு..!

(அபூ அஹ்மட்)

இன்னும் 14 நாட்களில், அதாவது எதிர்வரும் பெப்ரவரி நான்காம் திகதி இலங்கையின் 65வது சுதந்திர தினம் கொண்டாடப்பட இருக்கின்றது. இதற்கான ஏற்பாடுகளை பெரும்பான்மை சமூகத்தினர் ஏற்கனவே ஆரம்பித்துவிட்டனர். 

இலங்கையில் இன்று முஸ்லிம்களுக்கு எதிரான பிரச்சாரங்கள், மிக அசுர வேகத்தில் நடந்து கொண்டிருக்கும் நிலையில், முஸ்லிம்கள் தங்களின் நாட்டுப்பற்றையும், மற்றைய சமூகங்களோடு தங்களின் ஒற்றுமையையும் வெளிப்படுத்துவதற்க்கு, எதிர்வரும் சுதந்திரதினமானது எங்களுக்குக் கிடைத்த மிகப்பெரிய அரிய சந்தர்ப்பமாகும். 

இன்று நாம் விரும்பியோ அல்லது விரும்பாமலோ, சுதந்திர தினத்தை கொண்டாட வேண்டிய நிலமையிலும், தேசியக் கொடியை கையில் எடுக்க வேண்டிய நிலமையிலும் உள்ளோம். 

கீழ்க்குறிப்பிட்ட முறைகளில், இதில் நாம் பங்குபற்றலாம்:   

1.     நமது வீடுகளிலும், வியாபார ஸ்தலங்களிலும் பெரிய அளவிலான தேசியக் கொடிகளை பறக்கவிடுதல்.

2.     ஊரின் பொதுவான இடங்களில் காலையில் கொண்டாட்டங்களை ஏற்பாடு செய்தல்.

3.     இலங்கையின் சரித்திரத்தையும், நாட்டிற்க்காக நமது முன்னோர்களின் தியாகங்கள், பங்களிப்புகள் பற்றி உரைகளை ஏற்பாடு செய்தல்.

4.     நாட்டிற்க்காகவும், சமாதானத்திற்க்காகவும் பள்ளிவாயல்களில் துஆப்பிரார்த்தனைகளை ஏற்பாடு செய்தல்.

5.     நமதூர்களிளுள்ள மற்றைய சமூகங்களைச் சேர்ந்த அரச மற்றும் இரானுவ உயர் அதிகாரிகளை மேற்படி விழாக்களுக்கு அழைப்பதோடு, அவர்களுக்கு மிகச் சிறந்த அன்பளிப்புகளையும் வழங்குதல்.

6.     வைத்தியசாலை, சிறைச்சாலை, அரச அலுவலகங்களில் பணியாற்றுபவர்களுக்கு அன்பளிப்புகளை வழங்குதல்.

சுதந்திர தின கொண்டாட்டங்களை இத்தோடு நிறுத்திக்கொள்ளாமல், தங்களது ஊர்களில் மாற்று சமூகத்தவர்களின் நல்லெண்ணெத்தைப் பெறுவதற்க்கும், அவர்களோடு நமது உறவை அதிகப்படுத்துவதற்க்கும் அனைத்து வாய்ப்புகளையும் பயன்படுத்திக்கொள்ளவும். அத்தோடு அனைத்து முஸ்லிம்களது நன்மை கருதியும், நமது எதிர்கால சந்ததிக்கு செய்யும் மிகப்பெரும் உதவியாக நினைத்தும், எதிர்வரும் சுதந்திர தின கொண்டாட்டங்களில் முற்றுமுழுதாக பங்குபற்றுவதற்க்கு அனைவரும் உறுதி பூனுவோம்.