முஸ்லிம் காங்கிரஸின் உயர்பீடம் கூடுகிறது - பஷீரின் அமைச்சு தெரிவு குறித்து தெளிவில்லை!

முஸ்லிம் காங்கிரஸ் தவிசாளர் பஷீர் சேகுதாவூத் பெற்றுள்ள அமைச்சுப் பதவி முஸ்லிம் காங்கிரஸிற்குரியதா அல்லது பஷீர் சேகுதாவூத்திற்குரியதா என அக்கட்சியின் செயலாளர் ஹசன் அலியிடம் எமது இணையம் வினா தொடுத்த போது, என்னை வம்பில் மாட்டிவிடாதிர்கள் என அவர் பதில் வழங்கினார்.

பஷீர் சேகுதாவூத் அமைச்சுப் பதவியை பெறுவதற்கு முன் முஸ்லிம் காங்கிரஸின் உயர்பீடத்திடம் அனுமுதி பெற்றாரா எனவும் எமது இணையம் ஹசன் அலியிடம் கேட்டபோது, அதற்கு இல்லையென பதில் வழங்கிய ஹசன் அலி, தலைவர் ரவூப் ஹக்கீமிடமிடமிருந்து பஷீர் சேகுதாவூத் அனுமதி பெற்றாரா என்ற விடயம் தமக்கு தெரியாதெனவும் குறிப்பிட்டார்.

இதுதொடர்பில் அமைச்சர் ரவூப் ஹக்கீமின் ஊடகச் செயலாளர் டாக்டர் ஹபீஸ் நஸீரிடம் கேட்டபோது, இதுகுறித்து எனக்கு தெரியாது. நான் ரவூப் ஹக்கீமின் ஊடகச் செயலாளர் மாத்திரமே என்றார்.

அதேவேளை எதிர்வரும் வெள்ளிக்கிழமை முஸ்லிம் காங்கிரஸின் உயர் பீடம் கூடவுள்ளதாக ஹசன் அலி எம்.பி. கூறினார்.

இருந்தபோதும் முஸ்லிம் காங்கிரஸ் தவிசாளர் பஷீர் சேகுதாவூத்திற்கு அமைச்சுப் பதவி வழங்கப்பட்டமை குறித்து அந்த கட்சியின் ஆதரவாளர்களிடையே பல்வேறுபட்ட அபிப்பிராயங்கள் நிலவி வருகின்றன. அதுபற்றிய சில தகவல்கள் எமது இணையத்திற்கு கிடைக்கப்பெற்றன. இருந்தபோதும் அவை உறுதி செய்யப்படாமை காரணமாக நாம் அவற்றை இங்கு பதிவு செய்யவில்லை.