பாலியல் பலாத்காரத்திற்கு குட்டை பாவாடையும், ஹை ஹீல்ஸ் ஷூவும் - இங்கிலாந்து எம்.பி.

குட்டை பாவாடையும், ஹை ஹீல்ஸ் ஷூவும் இளம்பெண்கள் அணிவதே, பாலியல் பலாத்காரம் அதிகரிக்க காரணம் என்று இங்கிலாந்து எம்.பி. ஒருவர் கருத்து தெரிவித்துள்ளார். இதற்கு கடும் எதிர்ப்பு கிளம்பி உள்ளது. இங்கிலாந்தின் குளவ்செஸ்டரை சேர்ந்தவர் ரிச்சர்ட் கிரகாம். கன்சர்வேடிவ் கட்சி எம்.பி.யாக இருக்கிறார். இவர் சமீபத்தில் அளித்த பேட்டியில், குட்டை ஸ்கர்ட், ஹை ஹீல்ஸ் அணிந்து செல்லும் இளம்பெண்கள், பலாத்காரத்துக்கு ஆளாக வாய்ப்பு அதிகம் உள்ளது என்று கூறினார். இத்தகவல் உள்ளூர் பத்திரிகையான தி சிட்டிசன் வெளியிட்டது. இதற்கு பெண்கள் மத்தியில் கடும் எதிர்ப்பு கிளம்பி உள்ளது. 

மோசமான உடைகளை உடைத்தி கொண்டு செல்லும் போது, உங்களால் எப்படி பாதுகாப்பாக இருக்க முடியும் என்று கேள்வி எழுப்புகிறார் ரிச்சர்ட். இவருடைய கருத்துக்கு பலாத்காரத்துக்கு எதிரான அமைப்பு கடும் கண்டனம் தெரிவித்துள்ளது. பெண்கள் உடை விஷயத்தையே எல்லோரும் பெரிதாக்குகின்றனர். பலாத்காரத்தால் பாதிக்கப்பட்டவர்களின் மனதை எம்.பி.யின் கருத்து மேலும் புண்படுத்துவது போல் உள்ளது. பலாத்காரத்தில் ஈடுபடுபவர்களை எப்படி தடுக்க வேண்டும் என்று யோசிப்பதில்லை என்று தெரிவித்துள்ளது. இதுகுறித்து கருத்து கேட்க எம்.பி.யை தொடர்பு கொள்ள முடியவில்லை என்று சிட்டிசன் பத்திரிகை கூறியுள்ளது.