முஸ்லிம்களின் பொருளாதாரத்தை சூறையாட சதி - எச்சரிக்கிறார் அமைச்சர் றிசாத்

(Tm +றிப்தி அலி)

 நாட்டில் முஸ்லிம்கள் பந்து போன்று விளையாடப்படுகின்றனர் என அகில இலங்கை முஸ்லிம் காங்கிரஸின் தலைவரும் கைத்தொழில் மற்றும் முதலீட்டு அமைச்சருமான றிசாட் பதியுதீன் தெரிவித்தார்.

 "ஏனைய இனத்தவர்களினால் வட பகுதியிலும் முஸ்லிம்களுக்கு பிரச்சினை தென் பகுதியிலும் முஸ்லிம்களுக்கு பிரச்சினை. இவ்வாறான சூழ்நிலைகளுக்கு மத்தியில் பலத்த சிரமங்களுடன் முஸ்லிம்கள் இன்று இலங்கையில் வாழந்து வருகின்றனர்" எனவும் அவர் குறிப்பிட்டார்.

 வைத்தியர் அஸாத் எம். ஹனீபாவின் 'ஆத்மாவின் புண்' எனும் கவிதை நூல் வெளீயீட்டு விழா இன்று ஞாயிற்றுக்கிழமை கொழும்பில் இடம்பெற்றது. 

சிரேஷ்ட ஊடகவியலாளரும் பாணந்துறை ஜீலான் மத்திய கல்லூரியின் அதிபருமான ஏ.ஆர்.எம்.ஜிப்ரி தலைமையில் நடைபெற்ற இந்த நூல் வெளீயீட்டு விழாவில் பிரதம அதிதியாக கலந்துகொண்டு உரையாற்றும்போதே அவர் மேற்கண்டவாறு தெரிவித்தார்.

 அங்கு தொடர்ந்து உரையாற்றிய அமைச்சர் றிசாட் பதியுதீன்,

 "முஸ்லிம்களின் பொருளாதாரத்தை சூறையாட வேண்டும் என்ற நோக்கத்தில் பௌத்த மதத்தை சேர்ந்த ஒரு குழுவினர் செயற்படுகின்றனர். இதன் ஒரு அங்கமாகவே மஹகரமையிலுள்ள நோளிமிட் காட்சியறைக்கு முன்னபாக ஆர்ப்பாட்டம் இடம்பெற்றது. 

இதன் உரிமையாளர் முஸ்லிம் என்ற காரணத்தினாலேயே இந்த ஆர்ப்பாட்டம் இடம்பெற்றது.  பௌத்த மதத்தை சேர்ந்த சிறியதொரு குழுவினரே முஸ்லிம்களின் பொருளாதாரத்தை சூரையாட வேண்டும் என நினைக்கின்றனர்.

 எனினும் இந்த குழுவினரின் செயற்பாடு சமூக ஊடகங்களின் ஊடாக மிக வேகமாக இடம்பெற்று வருகின்றனது. இதனால் ஏனைய மக்களும் இந்த பிரச்சார நடவடிக்கையினுள் உள்வாங்கப்படுகின்றனர். இதனால் முஸ்லிம் மற்றும் சிங்கள மக்களிடையே கலவரத்தை தூண்ட முயற்சிக்கின்றனர்.

 1983ஆம் ஆண்டு தமிழ் மற்றும் சிங்கள மக்களிடையே ஏற்பட்ட கலவரத்தினால் தமிழ் மக்களின் பொருளாதாரம் சூறையாடப்பட்டது. அதேபோன்றே முஸ்லிம்களின் பொருளாதாரத்தையும் சூறையாட இந்த குழுவினர் முற்படுகின்றனர். 

அத்துடன், முஸ்லிம்கள் நாட்டுக்கு எதிரானவர்கள் என பட்டம் சூட்ட முயற்சிக்கின்றனர். எனினும் முஸ்லிம்கள் ஒருபோதும் நாட்டுக்கு எதிராக செயற்படவில்லை. சுமார் 30 வருட யுத்தம் இடம்பெற்ற கால பகுதியிலும் கூட நாட்டு ஆதரவாகவே முஸ்லிம்கள் செயற்பட்டனர்.

 இதேபோன்று வட மாகாணத்திலிருந்து கடந்த 20 வருடங்களாக இடம்பெயர்ந்த முஸ்லிம்களை மீள்குடியேற்றும் போது தடுக்கின்றனர். அன்று விடுதலை புலிகளுக்கு உதவிய குழுவினரே இன்று இந்த செயற்பர்டுகளில் ஈடுபடுகின்றனர்.

 இவர்களுடன் இணைந்துகொண்டு மதகுருவொருவரும் வட மாகாணத்தில் முஸ்லிம்களுக்கு எதிராக செயற்படுகின்றார். இறுதிக் கட்ட யுத்தத்தின்போது இடம்பெயர்நத 300,000 தமிழ் மக்களை நான் புனர்வாழ்வு அமைச்சராக இருந்தபோது எந்தவித பாரபட்சமுமின்றி மீள்குடியேற்றினேன்.

 ஆனால் இன்று இடம்பெயர்ந்த 100,000 முஸ்லிம்களை மீள்குடியேற்றும்போது எதிராக போராடுவது, புதிய குடியேற்றம் எனவும் அழைக்கின்றனர். இதற்கு காரணம் என்னவென்று எனக்கு தெரியவில்லை.

 தமிழ் மற்றும் முஸ்லிம் சமூகங்களுக்கு இடையில் உறவுப் பலமாக கலைஞர்கள் செயற்பட்டனர். வட மாகாணத்திலிருந்து முஸ்லிம்கள் வெளியேற்றப்பட்டபோதும் அழிஞ்சிப்பொத்தாணையில் முஸ்லிம்கள் கொல்லப்பட்டபோதும் தமிழ் மற்றும் முஸ்லிம் சமூகங்கள் ஒற்றுமையாகவே செயற்பட்டன. 

இதற்கு பிரதான காரணமாக கவிஞர்களே செயற்பட்டனர். இது பாராட்டத்தக்க விடயமாகும். இந்த ஒற்றுமை தொடர்ந்து காணப்பட வேண்டும்" என்றார்.