திவிநெகுமே சட்டத்திற்கு ஆதரவளிக்காதீர் - மு.கா. விடம் தமிழ் தேசிய கூட்டமைப்பு கோரிக்கை

பாராளுமன்றத்தில் நிறைவேற்றப்படவுள்ள திவிநெகுமே சட்டமூலத்திற்கு ஆதரவளிக்க வேண்டாமென தமிழ் தேசியக் கூட்டமைப்பு முஸ்லிம் காங்கிரஸிடம் வேண்டுகோள் விடுத்துள்ளது.

தமிழ் தேசியக் கூட்டமைப்பின் பாராளுமன்ற உறுப்பினர் சுமந்திரன் இதுதொடர்பில் கூறியிருப்பதாவது,

மாகாணங்களுக்கு வழங்கப்பட்டுள்ள அதிகாரங்களை மத்திய அரசு சுவீகரித்துக்கொள்ளும் திவிநெகுமே சட்டமூலம் தொடர்பிலான வாக்கெடுப்பு  பாராளுமன்றத்தில் நடைபெறவுள்ளது. இச்சட்டம் நடைமுறைக்கு வரும்போது வடக்கிழக்கிலுள்ள முஸ்லிம்களும் பாதிக்கப்படுவர். எனவேதான்  நாம் முஸ்லிம் காங்கிரஸ் இச்சட்டமூலத்திற்கு ஆதரவளிக்க வேண்டாமென கூறுகிறோம். இதுதொடர்பில் முஸ்லிம் காங்கிரஸுடன் பேச்சுவார்த்தையிலும் ஈடுபட்டோம் எனவும் தெரிவித்துள்ளார்.

தமிழ் தேசியக் கூட்டமைப்பின் மற்றுமொரு பாராளுமன்ற உறுப்பினரான சுரேஷ் பிரேமச்சந்திரனும் திவிநெகுமே சட்டத்திற்கு முஸ்லிம் காங்கிரஸ் ஆதரவளிக்க முயலக்கூடாதென தெரிவித்துள்ளார். சிறுபான்மை சமூக கட்சிகளான முஸ்லிம் காங்கிரசும், இலங்கை தொழிலாளர் காங்கிரசும் திவிநெகுமே சட்டத்திற்கு ஆதரவளிக்காவிட்டால் அச்சட்டம் மூன்றில் இரண்டு பெரும்பான்மையுடன் நிறைவேறுவதில் சிக்கல் ஏற்படுமெனவும் குறிப்பிட்டுள்ளார்.