றிசானா மரண தண்டனை குறித்து சவூதி அரேபியாவின் விளக்கம்..!

(Vi) சவூதி அரேபியாவில் மரண தண்டனை நிறைவேற்றப்பட்ட இலங்கை பணிப்பெண்ணான ரிசானா நபீக் தொடர்பில் உலக நாடுகள் மற்றும் மனித உரிமை அமைப்புக்கள் தம்மை சாடுவதை சவூதி அரேபியா கண்டித்துள்ளதுடன் அவர்கள் முன்வைக்கும் குற்றச்சாட்டுக்களையும் மறுத்துள்ளது.

அத்துடன் இலங்கையானது குறித்த தண்டனை நிறைவேற்றத்துக்கு எதிர்ப்புத்தெரிவித்து தனது தூதுவரை திருப்பி அழைத்தமையானது ஏற்றுக்கொள்ள முடியாதது என தெரிவித்துள்ள சவூதி அரேபியா அதனை கண்டித்துள்ளதுடன்  அந் நடவடிக்கையானது குறித்த சம்பவம் தொடர்பில்  தவறான தகவலினையே உலகுக்கு வழங்குவதாக தெரிவித்துள்ளது.

சவூதி அரசின் சார்பில் அதன்  பேச்சாளர் வெளியிட்டுள்ள அறிக்கையிலேயே மேற்படி கண்டனம் தெரிவிக்கப்பட்டுள்ளது.

அதில் மேலும் தெரிவிக்கப்பட்டுள்ளதாவது.

குறித்த பணிப்பெண் 21 வயதானவர்.அவ்வாறே அவரது கடவுச்சீட்டில் உள்ளது. குற்றச்செயலுடன் அவர் சம்பந்தப்பட்டுள்ளார். இந் நிலையில் சவூதி அதன் சட்டத்தையே அமுல் செய்துள்ளது. 18 வயதுக்கு குறைந்த சிறுவர்களுக்கு ஒரு போதும் சவூதி மரண தண்டனையை அமுல்செய்வதில்லை. கொல்லப்பட்ட குழந்தையின் பெற்றோரை மன்னிப்பளிக்கச்செய்ய கடுமையாக முயற்சிக்கப்பட்டது.அதற்கான இரத்தப்பணமும் வழங்க சவூதி தயாராகவே இருந்தது. எனினும் குறித்த பெற்றோர் மன்னிப்பளிக்கவில்லை.

சவூதி அரேபிய அனைத்து  சட்ட திட்டங்களையும் மதிக்கிறது. தனது நட்டு மக்களின் உரிமைகளுக்கும் உடமைகளுக்கும் கெளரவமளிக்கிறது. இந் நிலையில் சவூதியின் நீதித் துறையிலும் அதன் தீர்புகளிலும் எந்தவிதமான தலையீடுகளையும் அனுமதிக்க முடியாது என தெரிவித்துள்ளார்.

முன்னதாக சவூதியின் குறித்த மரண தண்டனை நிறைவேற்றத் தீர்ப்பை ஐ.நா.வும் மனித உரிமைகள் அமைப்புக்களும் கண்டித்திருந்தமை சுட்டிக்காட்டத்தக்கது. இந்நிலையிலேயே இது குறித்து சவூதி பதிலளித்துள்ளமைக் குறிப்பிடத்தக்கது.