“மனிதம் அடைந்த வெற்றியாக”

(சத்யன்)

அன்புமிக்க தோழர்களே..!

சமகால இலங்கை முஸ்லிம் ஊடகங்களில் முஸ்லிம்களுக்கெதிரான இனரீதியான அடக்குமுறை குறித்து பல்வேறுவிதமான கருத்தாடல்கள் இடம்பெற்று வருகின்றன. பல்வேறு ஆதங்கங்கள் வெளிப்படுத்தப்படுகின்றன. யோசனைகள் முன்வைக்கப்பட்டுகின்றன. ஆனால் இலங்கை முஸ்லிம் சமூகம் குறித்த சரியான பார்வையுடன் நோக்கும்போது அத்தகைய ஆதங்கங்களுடன் மேலும் சில விடயங்கள் கவனத்தில் எடுத்துக்கொள்ளப்படவேண்டும் என கருதுகின்றேன். 

இலங்கையில் முஸ்லிம்களுக்கெதிரான இனரீதியான ஒடுக்குமுறைகள் முன்னெப்போதும் இல்லாத அளவிற்கு மிகவும் அதிகரித்துக் காணப்படுகின்றது என்ற கருத்தும் உணர்வும் பரவலாக இருக்கின்றது. ஆனால் சரியான புள்ளிவிபரங்கள், தரவுகளுடன் நோக்கும்போது இலங்கை முஸ்லிம் சமூகம் தவறாக வழிநடாத்தப்பட்டு விடுமோ என்ற அச்சம் எழுகின்றது. 1905கள் தொடங்கி இலங்கையில் முஸ்லிம்களுக்கு எதிரான இனரீதியான பல்வேறு நிகழ்வுகள் நடந்தேறியிருக்கின்றன. இனரீதயான அழிவுகள் பலவற்றை எமது சமூகம் எதிர்கொண்டிருக்கின்றது. தமிழ்- சிங்கள இனமுரண்பாடுகள் தலைதூக்க்கியிருந்த காலங்களில் கூட முஸ்லிம்களுக்கு எதிரான இனவாத செயற்பாடுகள் இடம்பெற்றிருக்க்கின்றன. 

அதன் தொடர்ச்சியில் சமகாலத்திலும் பல்வேறு அசம்பாவிதங்கள் நிகழ்ந்தேறிக் கொண்டிருக்கின்றன. ஊடகங்களின் செல்வாக்கு மற்றும் சமூக இணையங்களின் மூலம் சமகால செயற்பாடுகள் குறித்து உடனுக்குடன் தகவல்கள் அறியப்படுகின்ற நிலையினைத் தவிர்த்து முன்னைய கால இனவாத செயற்பாடுகளுக்கும் சமகால செயற்பாடுகளுக்கும் இடையில் பாரிய வித்தியாசத்தை எம்மால் உணரமுடியவில்லை. ஊடக செயற்பாடுகளின் மூலம் ஒருவித பதற்றம் ஏற்பட்டு விடுகின்றதோ என்றும் அதன் மூலம் சமூகத்தில் தவறான முடிவுகள் எட்டப்பட்டு விடுமோ என்றும் எண்ணத்தோன்றுகின்றது.

தற்போதைய சூழ்நிலையில் பிரச்சினையின் மூலவேரினை அறியவேண்டிய நிலையில் நாம் இருக்கின்றோம். ஆனால் பலர் பிரச்சினையின் கிளைகளை வெட்டிச்சாய்த்துவிடுவதிலும், கிளைகளில் தொங்கி பிரபல்யத்தினை ஈட்டிக்கொள்வதற்கும் அவசரப்படுவதை எம்மால் உணர முடிகின்றது. இலங்கையில் எந்தவொரு இனத்துக்கு எதிராகவும் முஸ்லிம்கள் அணிதிரட்டப்படுவார்களேயானால் அதுவே இந்த தேசத்தின் முதன்மையான அழிவின் அடையாளமாக இருக்கும். இலங்கைத் தேசத்தில் இனவாதம் என்பது இங்குள்ள மக்களின் அத்தியாவசியமானதொரு அம்சமாக காலனித்துவ காலம் தொட்டு மாற்றப்பட்டிருக்கின்றது. அதன் வரலாறு நீண்டது. அதற்கான காரணிகளும் மிக ஆழமானது, அதனை போசிக்கும் சக்திகளும் மிகவும் பலமானவை. இலங்கையில் பாரிய அழிவு நாசங்களுக்கு அடிப்படைக் காரணியாக இருப்பது இனவாதமே. சிங்கள்- தமிழ் சமூகங்களுக்கிடையிலான மோதல்களின் அடிப்படை இனரீதியான வழிகாட்டல்களே. பல்வேறு சந்தர்ர்ப்பங்களில் முஸ்லிம்களும் இனரீதியான செயற்பாட்டாளர்களால் வழிநடாத்தப்படுகின்றார்கள். இங்குதான் முஸ்லிம் சமூகம் சுதாகரித்துக்கொள்ள வேண்டும்.

இந்தப் பிரச்சினையின் வேர் “இனவாதம்” “எப்பொழுது இந்த நாட்டில் இனவாதம் தோற்கடிக்கப்படுகின்றதோ அப்போதே இந்த நாடு முழுமையான சுதந்திரத்தை அடையும்” இது என்னுடைய ஆணித்தரமான நம்பிக்கையாகும். சமகாலத்தில் முஸ்லிம்களுக்கெதிராக மேற்கொள்ளப்படுகின்ற எல்லா நடவடிக்கைகளும் இனவாதம் என்னும் வேரின் அடியாக எழுகின்றன. அதேபோன்று அவற்றுக்கு பதிலடிகொடுக்க நினைக்கும் முஸ்லிம் செயற்பாடுகளும் இனவாத வேரின் அடிப்படையில் இருந்துவிடக்கூடாது என்பது எமது நிலைப்பாடாகும். இனவாதத்தை ஒழிக்கும் செயற்பாட்டில் இந்த தேசத்தின் பெரும்பான்மை சமூகம் தனக்கிருக்கின்ற தார்மீகப் பொறுப்பினை மறந்திருக்கின்றது அல்லது மறுத்திருக்கின்றது. 

இந்த நாட்டின் பிரசைகள் என்றவகையில் இந்த நாட்டை நேசிக்கின்றவர்கள் என்றவகையில்  இந்த தேசத்தில் இனவாதத்தை இல்லாதொழிகின்ற ஒரு பாரிய போராட்டம் அவசியமாகின்றது. அது ஒரு இரத்தம் சிந்தாப்புரட்சியாக அமையவேண்டும். அதுவே முஸ்லிம்கள் மட்டுமல்ல இந்த தேசத்தில் வாழ்கின்ற எல்லா மக்களுக்குமான வெற்றியாக அமையும். அதனை மிகச்சரியாகத் திட்டமிடுவோம், அமுலாக்குவோம். அது இந்த தேசத்தின் “மனிதம் அடைந்த வெற்றியாக” அடையாளப்படுத்தப்படும்.

அதற்கான சில அடிப்படை வழிகாட்டல்கள்..

முஸ்லிம்கள் இனரீதியாக சிந்திப்பதையும், இனரீதியாக செயற்படுவதையும் இனரீதியாக முஸ்லிம் உம்மத்தை வழிகாட்டுவதையும், உணர்வூட்டுவதையும் முற்றாகத் தவிர்க்க வேண்டும்

இந்த தேசத்தில் வாழுகின்ற பெரும்பாலான சிங்களவர்களும், தமிழர்களும், ஏனைய இனத்தவர்களும் இனரீதியான சிந்தனைகளையும் செயற்பாடுகளையும் வெறுக்கின்றார்கள், இந்த உண்மையினை உணர்ந்து அவர்களை இனவாதத்திற்கெதிரான எமது முயற்சியில் இணைத்துக்கொள்தல் வேண்டும்

முஸ்லிம் சமூகத்தில் இனரீதியான செயற்பாடுகளை எதிர்கொள்வதில் முஸ்லிம் அரசியல் கட்சிகள், இஸ்லாமிய இயக்கங்கள் தோல்வி கண்டிருக்கின்றன, எனவே இதனை எதிர்கொள்வதற்கு முற்றிலும் புதிய அணுகுமுறையினைக் கொண்ட ஒரு செயற்சக்தி உருவாக்கப்படவேண்டும்.

உச்ச அளவிலான சிந்தனைப் புரட்சிக்கான பொறிமுறை முதன்மையாக உருவாக்கப்படவேண்டும், அதனைத்தொடர்ந்து நடத்தை ரீதியான செயற்பாட்டுரீதியான மாற்றங்களுக்கான வழிகாட்டல்கள் ஒழுங்குபடுத்தப்படவேண்டும்.

இது ஒரு போராட்டம், இது ஒரு சாத்வீகப் போராட்டம், வெற்றி இலக்கான இனவாதம் தோற்கடிக்கப்படும்வரை, இந்த நாட்டின் அரசியலில் இந்த நாட்டின் பொருளாதாரத்தில், இந்த நாட்டின் எல்லாவிதமான சமூகச் செயற்பாடுகளிலும் இனவாதம் தோற்றுப்போகும்வரை எமது போராட்டம் தொடரவேண்டும்.

இவ்வாறாக ஒரு தூய்மையான அடித்தளத்தில் இருந்து நாம் சிந்திப்போம், செயற்படுவோம். வெற்றிகாணுவோம். இதுவே தேசத்தின் வெற்றியாக அமையும். இன்ஸா அல்லாஹ்.