மக்களை விழுங்கும் அரசியல்வாதிகள் - அக்கரைப்பற்று மாநகர சபை உறுப்பினரின் குமுறல்

வாழ்தாரச் சுமைகள், பொருட்களின் விலையேற்றம், அடிப்படை வசதிகள் இல்லாமல் மக்கள் தத்தளித்துக் கொண்டிருக்கும் இவ்வேளையில் தமது இருப்பினை உறுதிப்படுத்திக் கொள்வதற்காக பலவாறான அறிக்கைகளை விடும் அரசியல்வாதிகள் மக்களின் கஷ்டங்களை தேர்தல் காலங்களில் கண்டு கொள்பவர்களாக மாத்திரமே இருக்கின்றனர். 

குறிப்பிட்ட பிரதேசத்திற்கான அரசியல் பிரமுகர் எனப்படுபவர் அங்கு வாழும் மக்களுக்குத் தலைவர் ஆவார். இவர் தன் கடமைகளை மறந்து விடுகிறார். கல்வி கற்பதற்கு போதிய வசதியில்லாமல் வாழும் மாணவர்கள், கணவனை இழந்து தவிக்கும் விதவைகள்,வறுமைக்கோட்டிற்கு கீழே வாழும் குடும்பங்கள் என  எத்தனையோ பிரச்சினைகள் கண்முன்னே இருந்தும் கவனிக்க மறந்துவிடுகிறார்கள். ஆனால், தேர்தல் வருகின்ற போது பள்ளி உடைப்பு என்று மக்களின் இதயங்களில் துவேச உணர்வினை ஏற்படுத்தி அவர்களை சலவை செய்து பழைய சங்கதிகளையெல்லாம் மழுங்கடிக்கச் செய்து புதைத்துவிடுகிறார்கள். 

மீண்டும் வேதாளம் முருங்கை மரம் கதைபோலாகிறது. மக்களின் அறியாமையும், உணர்ச்சி வசப்படுதலும், நமக்காக கட்சிகளும் தலைவர்களும் என்ற எண்ணம் மாறி கட்சிக்காக நாம் என்று மாற்றப்பட்டுவிட்டோம். இதுயார் செய்த தவறு? பலவருடங்களுக்கொருமுறை வரும் வாக்கு எனும் கோடாரியைக் கொhண்டு பிழையானவைகளை தறிக்காமல் விட்டுவி;ட்டது யார் செய்த பிழை? எதற்கெடுத்தாலும் நமக்கு ஏன் இந்த வேண்டாத வேலை என்று ஒதுங்கி எமது குழந்தைகளின் எதிர்காலத்தை நாசம் செய்து விடுகிறோம். நமது குழந்தைகள் கல்வி கற்கும் பாடசாலைகள் குன்றும் குழியுமாக இருக்கிறது என எதிர்த்து எத்தனை பேர் போராடியுள்ளோம். வருமானம் இல்லாமல் தவிக்கும் ஏழை குடும்பங்களுக்கு உதவ முன்வராத தலைவர்களை எத்தனை பேர் தட்டிக் கேட்டுள்ளோம். 

எம்மிடம் கேள்விகளும் இல்லை விடைகளும் இல்லை

உலகிலே எல்லா விலங்குகளைப் போல் பிறந்து மடிவதற்கு நாம் மனிதர்களாக உருவெடுத்திருக்கவே தேவையில்லை. 

இனிவரும் காலங்களிலாவது எம்முள் புது உதிரம் சுரக்க வேண்டும். இரத்தம், நாடி, நரம்புகள் எல்லாம் நம்மையும் நமது மண்ணையும் எமது பொருளாதாரம் பற்றிய சிந்தனைகளை கலந்து விட்டுள்ள தலைவர்களை தெரிவு செய்ய அல்லது உருவாக்க ஆயத்தமாவோம்.

எஸ்.எம். சபீஸ்

மாநகர சபை உறுப்பினர்

அக்கரைப்பற்று