ரிஸானா நபீக் தொடர்பாக என்னுள் எழும் சந்தேகங்கள்..! உலமாக்கள் பதில் தருவார்களா..??

(பேகம் றஹ்மான்)

கடந்த புதன்கிழமை (09.01.2013) பல்கலைக்கழக வளாகத்தில் பலர் மத்தியில் காரசாரமான கருத்துப்பரிமாற்றங்கள் நிகழ்ந்து கொண்டிருந்தன. நான் என்னவென்று விளங்கிக் கொள்ளும் மனோநிலையில் இல்லாத காரணத்தால் விடுதியிற்கு சென்று விட்டேன். அப்போது என் கணவருடன் தொலைப்பேசியில் கதைத்தபோது, 'ரிஸானா நபீகிற்கு மரண தண்டனை நிறைவேற்றப்பட்டு விட்டது.' அவருடைய வார்த்தைகள் என்னை ஏதோ ஒரு விதத்தில் பலமாகத்தாக்கியது. முஸ்லிமாகிய நாங்கள் அனைவரும் அநியாயமாக ஒரு குடும்பத்தினையே அழித்து விட்டோமோ என்று எண்ணி என் மனதிற்குள்ளே அழுதேன். தாங்க முடியாமல் என்னுடைய கணவருடன் இது தொடர்பாக என்னுடைய கருத்துக்களை தெரிவித்தபோது, இது ஷரீஆ சட்டம் என்று கூறி என்னுடைய கருத்துக்களுக்கு ஒரே வார்த்தையில் முற்றுப்புள்ளி வைத்தார்.

இதே விதமாக என்னுடைய கல்வி சார் நண்பர்களுடனும் கதைத்த போது அவர்களும் எனக்கு அதே பதிலினையே தந்தனர். அப்போது தான் என்னுள் பல கேள்விகள் எழுந்தன நான் இஸ்லாத்தை பிழையாகவா விளங்கி வைத்துள்ளேன். எல்லோருக்கும் விளங்கும் ஷரீஆ சட்டம் என்னுள் மாத்திரம் ஏன் பல கேள்விகளை தோற்றுவித்துள்ளது. இது தொடர்பாக சரியான தெளிவுகளை பெற்றுக்கொள்ளாத பட்சத்தில் நான் இஸ்லாத்தை விளங்காத நிலையினிலே இருந்து விடுவேன் .இஸ்லாமிய மார்க்க அறிஞர்களே தயவு செய்து என்னுடைய சந்தேகங்களை தீர்த்து வையுங்கள் என்று பணிவாக வேண்டிக்கொள்கின்றேன்.

இஸ்லாமிய சட்டம் மிகவும் நுணுக்கமாக பின்பற்றப்படுகின்ற சவூதி அரேபியாவின் 2005ல் ரிஸானா நபீகிற்கு நான்கு மாதக்குழந்தையை கொலை செய்தார் என்பதுதான் குற்றச்சாட்டு. என்னுடைய தெளிவின்மை என்னவெனில,; திட்டமிட்டு செய்வதுதான் கொலையாக இருக்கும் பட்சத்தில், தவறுதலாக அறியாமல் செய்யப்படுவதும் கொலையாகுமா? அதுமாத்திரமன்றி புட்டிப்பால் வழங்கும் போது மூச்சுத்திணறிதான் குழந்தை இறந்து இருக்கின்றது. இருந்தும் ரிஸானா நபீக் அக்குழந்தையை உயிர் பிழைக்க வேண்டும் என்கின்ற நோக்கில் கழுத்தின் பின்புறத்தில் மெதுவாக தட்டி அக்குழந்தை உயிர் பிழைக்க வேண்டும் என்று அவளும் பிரயாசைப்பட்டுத்தான் இருக்கிறாள். அவ்வாறு இருக்கும் போது இது எந்த வகையில் கொலைக்குற்றமாக ஏற்றுக்கொள்ளப்படும் என்பது எனக்குப்புரியவில்லை.

இத்தகைய நிலையில் ஒரு தாய் தன்னுடைய குழந்தைக்கு புட்டிப்பால் வழங்கும் பட்சத்தில் அக்குழந்தை மூச்சுத்திணறி இறக்குமாக இருந்தால் அத்தாய் குழந்தையை கொலை செய்தவள் என்றாகி விடுமா..?

அதுமாத்திரமன்றி அக்குழந்தையின் தந்தை ரிஸானா நபீகிற்கு பொது மன்னிப்பு வழங்க விருப்பம் இருந்த நிலையில் அந்த தாயின் மனோநிலையில் மன்னிப்பு வழங்கும் பக்குவ நிலை காணப்படவில்லை. எனவே ரிஸானா நபீகினுடைய வீட்டு எஜமானியின் விருப்பிற்கிணங்கவே தண்டனை வழங்கப்பட்டுள்ளது. ஏன்னுடைய தெளிவின்மை என்னவெனில், இஸ்லாமிய ஷரீஆ சட்டத்தின்படி( நான் அறிந்த வகையில்) பெண்கள் உணர்ச்சி வசப்படக்கூடியவர்கள், நிதானமாக சிந்திக்க முடியாதவர்கள் என்கின்ற பல காரணங்களின் அடிப்படையில் பெண்களை தீர்மானம் எடுத்தல் மற்றும் சாட்சி சம்பந்தப்பட்ட விடயங்களில் ஆண்களுடன் ஒப்பிடும்போது பெண்களுக்கு ஒரு சில வரையறைகள் காணப்படுகின்றன. இங்கு என்னுடைய தெளிவின்மை என்னவெனில் இறந்த குழந்தையின் தந்தை நிதானமாக இருக்கும் பட்சத்தில் தாயின் முடிவு மாத்திரம் எவ்விதம் காரணமாக முடியும்? அதுமாத்திரமன்றி இஸ்லாத்தில் ஒரு பெண் தன்னுடைய கணவனின் இறப்பிற்கு மாத்திரமே அதிகூடிய நாட்களான நான்கு மாதங்களும் பத்து நாட்களுமே துக்க அனுஷ்டிப்பு செய்ய முடியும். மாறாக ஏனைய உறவினர்களாக  இருக்கும் பட்சத்தில் அது ஆகக்கூடியது மூன்று நாட்களே. இங்கு குழந்தை இறந்தது 2005 ஆம் ஆண்டு ஆனால் குற்றவாளியாக கருதப்பட்ட ர்pஸானா நபீகிற்கு தண்டனை வழங்கியது 2013 ஆம் ஆண்டு.

அதுமாத்திரமன்றி எந்த ஒரு இஸ்லாமிய மனைவியும் தன்னுடைய கணவனுக்கு கட்டுப்பட்டு, அவர்களுடைய விருப்பு வெறுப்புக்களுக்கு முக்கியத்துவம் வழங்கப்படும் வகையில் ஒவ்வொரு மனைவிமாரும் நடந்து கொள்ள வேண்டும். அத்தகைய நிலையிலிருந்து நோக்கும் போதும் இங்கும் எனக்கு மங்கலான ஒரு நிலைப்பாடே தோன்றுகின்றது.

ரிஸானா நபீக் 2005.மே.4 ஆம் திகதி பணிப்பெண்ணாக சென்று அதே ஆண்டு அதே மாதம் 22 அம் திகதி குழந்தைக்கு புட்டிப்பால் ஊட்டிய சமயம் அக்குழந்தை உயிரிழந்துள்ளது. இங்கு ரிஸானா நபீக் பணிப்பெண்ணாக இணைந்து வெறுமனே பதினெட்டு நாட்கள் மாத்திரமே. ஆத்தகைய நிலையில் வீட்டு எஜமானி ரிஸானா நபீகிற்கு வேலைப்பயிற்சிகளை கற்றுக்கொடுக்காமல் விட்டது யாரின் தவறு? மாறாக  அவ்வீட்டு எஜமானி மேற்பார்வை செய்யாது அப்படி என்ன முக்கிய அலுவலில் ஈடுபட்டிருந்தார்?

இஸ்லாமிய மார்க்கம் ஒவ்வொரு தாயிற்கும் தன்னுடைய குழந்தையை பராமரிக்கும் பொறுப்பினை தாயிற்கே வழங்கியுள்ளது. அவ்வாறு இருக்கும் பட்சத்தில் நான்கு மாதக்குழந்தையிற்கு புட்டிப்பால் வழங்கும் ஓர் சந்தர்ப்பம் ஏற்பட்டிருந்தாலும் கூட அத்தகைய   சூழ்நிலையில் தாய் தன்னுடைய குழந்தையினை கவனிக்காமல் அப்படி என்ன முக்கிய வேலையில் ஈடுபட்டிருந்தார்?

அதுமாத்திரமன்றி ரிஸானா  வீட்டுப்பணிப்பெண்னாகவே சென்றார்.தவிர குழந்தை வளர்க்கும் தாயாக அல்ல. மேலும் அவருக்கு அவருடைய சக்தியிற்கும் அப்பால் அதிக வேலைப்பளு வழங்கப்பட்டுள்ளது. மேலும் ரிஸானா நபீக் எழுதியிருந்த கடிதத்தில் அவரை கொலை செய்ததாக ஒப்புக்கொள்ளும் படி வற்புறுத்தப்பட்டிருப்பதும் குறிப்பிடத்தக்க விடயமாகும்.

எது எவ்வாறு இருந்த போதிலும் நாம் அனைவரும் இறைவனின் படைப்புக்கள்.மறுமையை ஈமான் கொண்டுள்ள நாங்கள் எவ்வாறு பலிக்குப்பலி வாங்கும் குரோத மனோநிலையில் இருப்பது? எது எப்படியான போதும் இறைவனின் நாட்டப்படியே அனைத்தும் நடக்கின்றன. இருப்பினும் ஓர் அப்பாவி இலங்கைப்பெண்ணுக்கு இத்தகைய நிலைமை ஏற்பட்டதனை நினைக்கும்போது, நாம் படும் கவலைக்கு அளவே இல்லாது போகின்றது. மார்க்க அறிஞர்களே என்னுடைய தெளிவின்மையில்  தெளிவினை ஏற்படுத்தும் படி மிகவும் பணிவுடன் உங்களிடம் வேண்டி நிற்கின்றேன்.

நடந்து முடிந்தவற்றை மாற்றும் இயலுமை இல்லாவிட்டாலும் நடந்தது நடந்து விட்டது என்று இருப்பதற்கு என் மனம் இடம் தறவில்லை. இலங்கையிலிருந்து பல்லாயிரக்கணக்கான பெண்கள் வெளிநாடுகளுக்கு சென்று உழைத்து தங்களுடைய குடும்ப வறுமையை போக்குவதில் வெற்றி கண்டும் உள்ளனர். அத்தகைய நம்பிக்கையில்தான் ரிஸானா நபீக்கும் பல எதிர்பார்ப்புக்களுடன் சென்றார். ஆனால் அவரது உயிர் அநாதரவாக்கப்பட்டது யாரின் தப்பு...? அவளுக்கு கல்வி மறுக்கப்பட்டு வாழ்க்கையும் மறுக்கப்பட்டு பெற்றோர் உறவினர்களை காணாமலே அம்மண்ணில் சங்கமமாகியது ஈடு செய்ய முடியாத கவலையையும் வேதனையையும் ஏற்படுத்துகின்றது.