புத்தளம் தமிழ்ப் பிரிவுக்கு பொறுப்பான கல்விப் பணிப்பாளராக இஸட்.ஏ.சன்ஹீர் நியமனம்

(முஹ்ஸி)

மலர்ந்துள்ள (2013) புதிய கல்வியாண்டில் புத்தளம் கல்விப் பணிமனையில் இயங்கும் தமிழ்ப் பிரிவுக்கு பொறுப்பான கல்விப் பணிப்பாளராக இலங்கை கல்வி நிர்வாக சேவையைச் சேர்ந்த இஸட்.ஏ.சன்ஹீர் வடமேல் மாகாண ஆளுநர் திஸ்ஸ.ஆர்.பலல்லவினால் நியமிக்கப்பட்டுள்ளார்.

இதனைத் தொடர்ந்து அவர் அண்மையில் உத்தியோக ரீதியாக தனது கடமைகளை புத்தளம் வலயக் கல்விப் பணிப்பாளர் முன்னிலையில்  பொறுப்பேற்றுக் கொண்டார். சன்ஹீர் தலைசிறந்த பொருளியல் ஆசிரியர். கல்வித் தாகமும் சமுக வேட்கையும் கொண்டவர். சமுக கல்விப் பணிகளில் தீவிரமாக பங்கேற்பவர். அவரது தந்தை ஸைனுல் ஆப்தீன் ஆசிரியராக அதிபராக பணியாற்றியவர். அவரது தாய்மாமன் மர்ஹும் ஏ.என்.எம். சாஜஹான் வட்டாரக் கல்வி அதிகாரியாக சிறப்பாக பணியாற்றியவர்.

பன்முக ஆளுமைமிக்க கல்விப் பணிப்பாளர் சன்ஹீர் புத்தளத்தின் கல்வி முன்னேற்றத்துக்கு தனது அர்ப்பணமிக்க சேவையினை முழு வீச்சில் முன்னெடுப்பார் என்று திடமாக நம்பலாம்.