ஓட்டமாவடியிலிருந்து கொழும்பு நோக்கிப் பயணித்த வான் விபத்து - 18 பேர் காயம்

ஓட்டமாவடியிலிருந்து கொழும்பு நோக்கிப் பயணித்த வான் ஓன்று கிரித்தலை பிரதேசத்தில் முன்னால் வந்த வானுடன் நேருக்கு நேர் மோதி விபத்துக்குள்ளானதில் 18 பேர் காயமடைந்தனர். ஓட்டமாவடியைச் சேர்ந்த ஆசிரியர் ஒருவருக்குச் சொந்தமான வானே எதிரே ஆடைத் தொழிற்சாலையொன்றைச் சேர்ந்த ஊழியர்களை ஏற்றி வந்த வானுடன் மோதி விபத்துக்குள்ளாகி உள்ளது.

நேற்று வெள்ளிக்கிழமை காலை இடம்பெற்ற இந்தச் சம்பவத்தில் வானை ஓட்டிச் சென்ற ஆசிரியர் உட்பட இரு வான்களிலும் பயணித்த ஐந்து பெண்களும் இரண்டு சிறுவர்களும் அடங்கலாக 18 பேர் காயமடைந்து பொலனறுவை வைத்தியசாலையில் அனுமதிக்கப்பட்டுள்ளனர்.

வெளிநாடு ஒன்றில் இருந்து நாடு திரும்பிய உறவினர் ஒருவரை அழைத்து வருவதற்காக கட்டுநாயக்க விமான நிலையம் செல்லும் வழியில் கிரித்தலையில் இந்த விபத்து இடம்பெற்றுள்ளதாகத் தெரிவிக்கப்படுகின்றது.

விபத்து தொடர்பான மேலதிக விசாரணைகளை கிரித்தலை பொலிஸார் மேற்கொண்டு வருகின்றனர்.