சவூதி அரேபியா 1000 கோடி தந்தாலும் எனது மகள் போல வருமா..?

ஏழையாகவே பிறந்தோம், ஏழையாக வாழ்ந்தோம். இந்நிலையில் சவூதி அரேபியாவின் எத்தகைய உதவிகளும் தமது குடும்பத்திற்கு தேவையில்லையென றிசானாவின் தாயார் தெரிவித்தார்.

இதுகுறித்து அவர் எமது இணையத்திற்கு மேலும் தகவல் தருகையில்,

என் மகள் றிசானா வீடு வந்து சேருவாள், எங்களுடன் அமர்ந்து சோறு சாப்பிடுவாள் என்ற நூறு சதவீத நம்பிக்கையுடன் நான் காத்திருந்தேன். அந்த காத்திருப்பு தகர்ந்து போனது. அவர் நினைவுகளிலிருந்து என்னால் மீளமுடியவில்லை. மீளவும்முடியாது.

எனது குழந்தைக்கு மன்னிப்பு கொடுக்காத அந்த சவூதி அரேபியா தாயை நான் மன்னித்துவிட்டேன்.

இப்போது சிலர் சவூதி அரேபியாவின் உதவி குறித்து பேசுகிறார்கள். சவூதி அரேபியா எனக்கு 1000 கோடி ரூபா தந்தாலும் எனது மகளுக்கு அது ஈடாகாது. அவர்களின் உதவி எனக்கு தேவையில்லை. சவூதி அரேபியாவின் பணத்தைக் கொண்டு நான் என்ன செய்வது..? எனது மகள் திரும்பி வந்துவிடுவாளா..??

அல்லாஹ்வின் நாட்டப்படிதான் எல்லாம் நடக்கும். நாங்கள் ஏழ்மையாகவே வாழ வேண்டுமென்று அந்த இறைவன் நினைத்திருப்பின் அதுதான் நடக்கும்.

இலங்கையிலிருந்தும், வெளிநாடுகளிலிருந்தும் எனது குடும்பத்தினருக்கு உதவிய சகலருக்கும் உங்கள் வெப்சைட் மூலம் நன்றி கூறுகிறேன். 

இதேவேளை றிசானாவின் குடும்பத்தினருக்கு சவூதி அரேபியா இளவரசி தனது ஆலோசகர் மூலம் பிரதிமையச்சர் ஹிஸ்புல்லாவிடம் 10 இலட்சம் ரூபா பணம் கொடுத்துள்ளாராமே...? அந்தப் பணம் உங்களிடம் வந்தடைந்துவிட்டதா என றிசானாவின் தாயாரிடம் வினவியபோது ''எனக்கு ஹிஸ்புல்லாஹ் என்பவரையே தெரியாது'' என்றார்...!!