உலகம் அழிவதற்கு புதிய திகதி நிர்ணயம் - முட்டாள்களின் கணிப்பு..!

(தினகரன்)  மாயன் நாட்காட்டியை காரணம் காட்டி உலகம் அழிவதாக நம்பி வந்தோர் உலகம் அழிவதற்கான மேலும் திகதிகளை கணித்துள்ளனர். இதில் உண்மையாக உலகம் அழியும் திகதி 2017 ஜனவரி முதலாம் திகதி என கடவுள் சகோதரத்துவம் என்ற அமைப்பு கூறியுள்ளது.

மாயன் நாட்காட் டியின் 5, 126 ஆண்டுகள் கடந்த வெள்ளிக்கிழமையுடன் முடிவடைவதையொட்டி அன்று உலகம் அழிவதாக உலகெங்கிலும் வதந்திகள் பரவியதோடு, அதனை நம்பியோர் அன்றைய தினம் உலகம் அழிவதிலிருந்து தப்புவதற்கு பல வகை ஏற்பாடுகள் செய்திருந்தனர்.

எனினும் மாயன் நாட்காட்டி முடிவடைந்த வெள்ளிக்கிழமை காலை 11. 11ஐ தாண்டியதும், அதனை நம்பியவர்கள் ஏமாற்றத்தை சந்தித்தனர். இந்நிலையில் இறைதூதர் ஜிப்ரீல் தமக்கு உலகம் அழியப்போகும் சரியான திகதியை அறிவித்திருப்பதாக கடவுள் சகோதரத்துவம் என்ற அமைப்பு கூறியுள்ளது. 

அதன்படி 2017 ஜனவரி முதலாம் திகதி உலகம் அழியும் என அந்த அமைப்பு கூறியுள்ளது. அதேபோன்று கிறிஸ்தவ புனித நூலான பைபிளை ஆராய்ச்சி செய்த மத விவகார நிபுணர் இயன் கன்னி 2023 ஆம் ஆண்டே இறுதித் தீர்ப்பு நாள் என கூறியுள்ளார்.

தவிர அயர்லாந்து கிறிஸ்தவ மதத் துறவி மலாச்சி கி. பி. 1143 ஆம் ஆண்டு உலகம் அழியும் தினத்தை கணித்துள்ளதாக மற்றுமொரு தரப்பினர் குறிப்பிட்டுள்ளனர். அதன்படி 112 ஆவது பாப்பாண்டவர் தேர்வாகும்போது உலகம் அழியும் என அவர்கள் குறிப்பிட்டுள்ளனர். தற்போது 111 ஆவது பாப்பாண்டவர் உள்ளார்.