சாதனையாளன் றஜாஸ்கானுக்கு ஊர்மக்கள் ஒன்றுகூடி மகிழ்ச்சிப்பெருவிழா (படங்கள்)

(எஸ்.எல்.மன்சூர்) 

தேசிய ரீதியில் கொழும்பில் நடைபெற்ற விளையாட்டுப்போட்டியில் குறுகிய நேரத்திற்குள் 200 மீற்றர் ஓட்டத்தைக் கடந்து தங்கப்பதக்கம் வென்ற ஏ.ஆர். றஜாஸ்கான் எனும் ஓட்டவீரனுக்கு தனது சொந்த ஊரான ஓலுவில் மக்கள் அனைவரும் ஒன்றுகூடி மகிழ்ச்சிப்பெருவிழா ஒன்றினை இன்று (2012.12.25) நடாத்தினர். 

இந்நிகழ்வில் தங்கப்பதக்கம் வென்ற  தங்கமகனுக்கு ஊர்மக்களும், சிறப்பதிகள் எனப் பலரும் பராட்டி கௌரவம் வழங்கிய கண்கொள்ளாக் காட்சி ஒலுவில் அல்ஹம்றா மகாவித்தியாலய எம்.எச்.எம். அஷ்ரப் கேட்போர் கூடத்தில் ஒலுவில் OSDS, Public & Sports Club  ஆகிய விளையாட்டுக் கழகங்கள் இணைந்து நடாத்தின.

ஒலுவில் பிரதேசம் முழுவதும் சோடிக்கப்பட்டு வாகனப் பவணியில் ஊர்வலமாக அழைத்துவரப்பட்ட ஓட்டவீரன் ஏ.ஆர். றஜாஸ்கானை வரவேற்று நடைபெற்ற மாபெரும் இந்நிகழ்வினை தொகுத்து வழங்கினார் ஆசிரியர் கலைப்பிறை ஜே.வகாப்தீன். 

இவ்வைபவத்தில் பிரதம அதிதியாக அட்டாளைச்சேனை பிரதேச செயலாளர் ஐ.எம்.ஹனீபா, அட்டாளைச்சேனை பிரதேசசபையின் தவிசாளர் எம்.ஏ. அன்சில், உதவித்தவிசாளர் ஏ.எல்.எம். அமானுல்லாஹ், உறுப்பினர்களாக என். ஐமன்யஹ்ஸர், எஸ்.எல். முனாஸ், எம்.றியாஸ், விளையாட்டதிகாரி எம்.பி.எம். ஆஸாத், ஒலுவில் பெரிய பள்ளிவாசல் தலைவர் எம். இஸ்மாயில், சிறுவர் நன்நடத்தை அதிகாரி எம்ஏ. பசூர்தீன், கூட்டுறவு பிரதிப் பணிப்பாளர் வை.எல்.எம் பகுர்தீன் மற்றும் பல அதிதிகளும் பங்குபற்றிய இந்நிகழ்வுக்கு அதிபர் எம்.பி.எம். அரூஸ் தலைமைதாங்கினார். 

இந்நிகழ்வில் தங்கப்பதக்கம் வென்ற ஓட்டவீரனுக்கு அனைத்து அதிதிகளும், உறவினர்களும், ஊர்மக்களும் மாலைகள் சூடியும், நினைவுச்சின்னங்களும் பரிசாக வழங்கப்பட்டதுடன், தேசிய சாதனையாளன் ஏ.ஆர். றஜாஸ்கானுக்கும், அவரது பெற்றோர்களுக்கும் அதிதிகளினாலும், பொதுமக்களினாலும் பொன்னாடைகள் பல போர்த்திக் கௌரவம் வழங்கபட்டமை குறிப்பிடத்தக்கதாகும்.