முஸ்லிம் காங்கிரஸின் பலமும், பேராளர் மாநாடும்..!

(பாஜி)

முஸ்லிம் காங்கிரஸ்  தலைவர் ரவூப் ஹக்கீமை இன்று  பலர் விமர்சனம் செய்கின்றனர். தனி மனிதனாய்  பழியை ஏற்றுக்கொள்ள நிர்பந்திப்பது தவறாகும்.எதை வேண்டுமானாலும் பேசலாம். எதை வேண்டுமானாலும் எழுதாலாம். ஆனால் அதில் நியாயமும் இருக்கவேண்டும். மு.கா விற்கும் எனக்கும் உறவும் இல்லை பகையும் இல்லை.அரசியல் அரங்கிற்கு அப்பால் நின்று பேசுகின்றேன். மு கா ஒரு சமநிலையான தூணின்மேல் நிறுத்தப்படவில்லை என்பதுதான் உண்மை. பொதுவான கொள்கை ஒன்றிற்கு அப்பால் சில முரண்பாடுகள் தோன்றியிருக்கிறது.

இதன் வெளிப்படைத்தன்மை மறைக்கமுடியாதது. தலைமைத்துவம் பல நெருக்கடிகளை சந்தித்து கொண்டிருகின்றது.அரசாங்கத்துக்கு முட்டு கொடுக்க வேண்டும் என்பது மு.கா தலைவரின் தனிப்பட்ட விருப்பம் என்று உறுதியாக கூறமுடியாது.கிழக்கு மாகாணத்தை சேர்ந்த இரு முக்கியஸ்தர்களின் நடவடிக்கையும் இதனை உறுதிப்படுத்துகிறது. கட்சியை   தலைமைத்துவம் தவறாக பயன்படுத்துகின்றது என்றால் அது பகிரங்கமாக விவாததிற்கு வந்திருக்கும். ஆனால் இங்கு     தலைமைத்துவத்தை பிழையாக வழி  நடத்தும் அழுத்தங்களும் இடம் பெறுகிறது. எந்த தனி நபர் பெயரையும் களங்கப்படுத்த விரும்பவில்லை. முஸ்லிம் காங்கிரஸ் நிமிர்ந்து நின்று பேசுவதற்கு  உருவாக்கப்பட்டது. இன்று வளைந்துகொடுக்கும் நிலைமை உருவாக்கி இருப்பது  முஸ்லிம்  சமூகத்தின் அரசியல் பலத்தை ஆணி வேரறுக்கும் என்பதில் சந்தேகமில்லை.

யுத்தத்திற்கு பிறகு முஸ்லிம்  சமூகம் குடிபரம்பல், நிலப்புல எல்லை, மத சுதந்திரம்,மற்றும் பௌதீகரீதியான,உளவியல் ரீதியான வன்முறைகள்  தொடர்பான பிரச்சினைகளை எதிர் நோக்குகின்றது.இது பிரதேச அபிவிருத்திக்கு அப்பால் மிக முக்கியமானது. வெறும் அபிவிருத்தி என்ற மாயக்கண்ணாடியை காண்பித்து சமூகத்தின் எதிர்காலம் பற்றிய திட்டமிடலை புறக்கணிப்பது ஆபத்தானது. முஸ்லிம்களின் அரசியல் சரியான  இடத்தை நோக்கி   நகர்தப்படவேண்டும்.

முஸ்லிம்களுக்குள்ளே பல தலைவர்கள் இருந்தாலும் சர்வதேச அரங்கில் குரல் கொடுக்க கூடிய பலம் முஸ்லிம் காங்கிரஸ் கொண்டிருக்கிறது. அதன் அடையாளத்தை சிதைப்பது வரலாறில் எழுதப்பட வேண்டிய துரோகமாகும். 

இதே சமயம் மு.கா .வின் தலைமைத்துவத்தின் இடைவெளியை நிரப்பும் அளவுக்கு ஆளுமை உள்ளவர் தென்படவும் இல்லை. மு.கா.ஆதரவாளர்கள் உண்மைத்தன்மையை விளங்கி கொண்டு முரண்பாடு தோன்றும் இடத்தை சந்ததிகளுக்காக  பொது நலத்துடன் சரிசெய்ய  வேண்டும். முஸ்லிம்களுக்கு ஒரு பிரச்சினை என்றால் அதை மு.கா.தான் பேசவேண்டும் என்று எதிர்பார்ப்பது அதுவே முஸ்லிம்களின் குரல் என்று ஏற்றுக்கொள்ளப்பட்டமையை சுட்டிக்காட்டுகிறது. தனிப்பட்ட விருப்பு வெறுப்புகளுக்கு அப்பால் மு.கா வை பலப்படுத்துவது காலத்தின் தேவையாகும்.தலைமைத்துவம் பிழையாக நடக்கிறதா?பிழையாக வழி நடத்தப்படுகிறதா? என்ற உண்மையை மக்கள் தெளிவாக விளங்கி கொள்ள வேண்டும்.   

முஸ்லிம் காங்கிரஸின் போராளர் மாநாடு கொழும்பில் நடைபெறவுள்ள நிலையில் இந்த உண்மைகள் புரிந்துகொள்ளப்பட வேண்டும்.