சீரற்ற காலநிலையால் பாதிக்கப்பட்டவர்கள் 100 முகாம்களில் தங்கவைப்பு - இதுவரை 42 பேர் பலி

சீரற்ற காலநிலை மற்றும் இயற்கை அனர்த்தங்கள் காரணமாக பாதிக்கப்பட்டவர்கள் 100 நலன்புரி முகாம்களில் தங்க வைக்கப்பட்டுள்ளனர். சுமார் 5025 குடும்பங்களைச் சேர்ந்த 17 ஆயிரத் 160 பேர் முகாம்களில் தங்கியுள்ளதாக அனர்த்த முகாமைத்தவ மத்திய நிலையம் தெரிவித்துள்ளது.

கடந்த 24 மணித்தியாலங்களில் வவுனியாவிலேயே அதிக மழை வீழ்ச்சி 225.7 மில்லிமீற்றர்களாக பதிவாகியுள்ளது. 

யாழ்ப்பாணம்  - கண்டி பிரதான வீதியில் வவுனியா - நொச்சிமோட்டை பகுதியில் வெள்ளப்பெருக்கு காரணமாக போக்குவரத்து பாதிக்கப்பட்டுள்ளது. பலத்த மழை காரணமாக குறித்த பகுதியில் சிறிய ரக வாகனங்கள் செல்ல முடியாத நிலை ஏற்பட்டுள்ளது. இதேவேளை, வடக்கில் சில குளங்களும் நிரம்பி வழிவதால் வீதிகளும், கிராமங்களும் வெள்ளப்பெருக்கால் பாதிக்கப்பட்டுள்ளன. 

இதனிடையே, இயற்கை சீற்றம் காரணமாக இதுவரை பலியானவர்களின் எண்ணிக்கை 42 ஆக அதிகரித்துள்ளது. அனர்த்த முகாமைத்துவ மத்திய நிலையத்தின் பிரதி ஊடக பணிப்பாளர் சரத்லால் குமார இந்த தகவலை உறுதிப்படுத்தினார்.