நபிகள் அவமதிப்பதை யூடியூப்பிலிருந்து நீக்க அமெரிக்காவிடம் பாகிஸ்தான் கோரிக்கை

இஸ்லாமாபாத்:நபிகள் நாயகத்தை இழிவுபடுத்தும் வீடியோ படத்தை, "யூ டியூப்' இணைய தளத்தில் இருந்து அகற்ற, நடவடிக்கை எடுக்க வேண்டும் என, அமெரிக்க தூதரிடம், பாகிஸ்தான் அரசு வலியுறுத்தியுள்ளது.அமெரிக்காவின் நியூயார்க் நகரில், உலக வர்த்தக மையக் கட்டடம் விமானங்களை மோதச் செய்து தரைமட்டமாக்கப்பட்ட சம்பவத்தை நினைவுகூரும் வகையில், 11ம் தேதி, பல்வேறு நிகழ்ச்சிகள் நடந்தன. அதன் ஒரு பகுதியாக, நபிகள் நாயகத்தை கேலி செய்யும் வகையில் வெளியிடப்பட்ட வீடியோ படத்தால், உலகம் முழுவதும் உள்ள முஸ்லிம் நாடுகளில், பயங்கர வன்முறைச் சம்பவங்கள் நடந்தேறின. லிபியாவில் தூதர் உட்பட நான்கு பேர் கொல்லப்பட்டனர்.இந்நிலையில், இஸ்லாமாபாத்தில் உள்ள தற்காலிக அமெரிக்க தூதர், ரிச்சர்ட் ஹோக்லேண்ட், பாகிஸ்தான் வெளியுறவுத் துறை அமைச்சக அலுவலகத்துக்கு வர வேண்டும் என, சம்மன் அனுப்பப்பட்டது.

இது குறித்து, பாகிஸ்தான் வெளியுறவுத் துறை அமைச்சகம் வெளியிட்ட அறிக்கையில் கூறியிருப்பதாவது:"முஸ்லிம்களின் அப்பாவித்தனம்' என்ற தலைப்பில் வெளியாகி உள்ள வீடியோ படம், உலகம் முழுவதும் உள்ள 150 கோடி முஸ்லிம்களுக்கு எதிரான தாக்குதல். உலகின், பல்வேறு மதங்களைச் சேர்ந்தவர்கள் மத்தியில் வன்முறை, வெறுப்பை ஏற்படுத்தும் தீய நோக்குடன் வீடியோ வெளியிடப் பட்டுள்ளது. 

இக்கருத்தைக் கூறி, "யூ டியூப்' இணையதளத்தில் இருந்து சர்ச்சைக்குரிய வீடியோ படத்தை அகற்ற நடவடிக்கை எடுக்க வேண்டும் என, அமெரிக்க தூதரிடம் வலியுறுத்தி உள்ளோம்.எல்லா மதத்தவரிடமும் ஒற்றுமையையும், சகிப்புத் தன்மையையும் பேணிக் காப்பது அவசியம். மாறாக, வெறுப்பை வளர்க்கும் வகையில் வீடியோ படம் வெளியிடப்பட்டிருப்பது, மனித சமுதாயத்தின் மீது நடத்தப்பட்ட தாக்குதலாகக் கருதப்படும்.வீடியோ படத்தை கண்டிப்பதாகச் சொன்ன அமெரிக்க தூதர், அமெரிக்க அரசும், இச்சம்பவத்துக்கு கண்டனம் தெரிவித்துள்ளதாகக் கூறினார். அமெரிக்க மக்களில் பெரும்பாலானோர், இந்த வீடியோவுக்கு கண்டனம் தெரிவிப்பதாக தூதர் தெரிவித்தார்.இவ்வாறு பாக்., வெளியுறவுத் துறை அமைச்சக அறிக்கையில் கூறப்பட்டுள்ளது.

வீடியோ படத்துக்கு எதிராக பாகிஸ்தானில், கடந்த சில நாட்களாக வன்முறைச் சம்பவங்கள் நடக்கின்றன. பெஷாவர் நகரில் இரண்டு சினிமா தியேட்டர்கள், தீ வைத்துக் கொளுத்தப்பட்டன. வர்த்தக சபை கட்டடம் எரிக்கப்பட்டது. "டிவி' செய்தி சேனல் ஊழியர் ஒருவர் வன்முறையில் பலியானார்.தொடர் வன்முறை சம்பவங்கள் தொடர்பாக 6,000 பேர் கைது செய்யப்பட்டுள்ளதாக, போலீஸ் அதிகாரி தெரிவித்துள்ளார்.