'விற்கப்படும் முஸ்லிம் சகோதரி' கட்டுரைக்கு பதில்...!

பூவனா

 

கடந்த 29.08.2012ம் திகதி ஜப்னா முஸ்லிம் இணையத்தில் அபுஅஹமத் என்கிற புனைப்பெயரில் ஒருவர் எழுதியிருந்த 'விற்கப்படும் முஸ்லிம் சகோதரி' எனும் ஓர் ஆக்கம் பிரசுரமாகியிருந்தது. அதில் அவர் ஓர் சகோதர முஸ்லிம் பெண்ணை இழிவு படுத்தும் விதத்தில் முஸ்லிம் காங்கிரஸின் போஸ்டர் அமைந்திருந்ததாக குற்றம் சுமத்தியிருந்தார். அது சம்பந்தமாக ஒன்றிரண்டு சகோதரர்களும் காட்டமான விமர்சனங்களை முன்வைத்திருந்தனர்.

இது சம்பந்தமான என்னுடைய கருத்துக்களை தெரிவிக்க விரும்புகிறேன்.

1. கட்டுரையாளர் அவரது கட்டுரையில் புகைப்படத்தின் சரித்திரத்தை சொல்லி, அது புத்தளம் அகதி முகாம் ஒன்றில் ஒரு வெளிநாட்டு புகைப்பட நிபுணரால் எடுக்கப்பட்டது என்பதையும் சொல்லியிருக்கிறார். அதேவேளை மார்க்கப்பற்றின் காரணமாகவும், வெட்கம் காரணமாகவும் முகத்தை மூடிக்கொள்ளும் முஸ்லிம் பெண்களின் புகைப்படத்தை முஸ்லிம் காங்கிரஸ் தன் சுவரொட்டியில் பாவித்திருப்பதாக முன்னுக்கு பின்னாக புலம்புகிறார்.

 

* ஒரு வெளநாட்டு புகைப்படப்பிடிப்பாளரின் கெமராவுக்கு திறந்த முகத்துடன் ஒரு முஸ்லிம் பெண் முகத்தை காட்டியது தவறென்று அவர் சொல்லியிருக்க வேண்டுமல்லவா..?

 

* இலங்கையில் கிழக்கு மாகாணத்தில் மட்டும் சுவரொட்டிகள் ஒட்டப்பட்டதில் குற்றம் காணும் இக்கட்டுரையாளர், உலகெங்கும் உள்ள எவரும் பார்க்ககூடியவாறு அப்புகைப்படத்தை வலைத்தளத்தில் இட்டவர்களை இட்டதை பொருட்படுத்தாமல் இருப்பது இவர் முஸ்லிம் காங்கிரஸின் மேல் காட்டும் காழ்ப்புணர்ச்சியை காட்டுவதாகவே தெரிகிறது.

2. ஒரு சுவரொட்டி என்பது வெறுமனே செய்தியை சுமந்த சப்பைக் கட்டாக இல்லாமல் அந்த செய்தியின் பரிமாணத்தை கண்தொட்டு கல்புவரை இறக்குவதற்கு பொருத்தமான புகைப்படமொன்றை பாவித்து இருக்கிறார்கள். நினைக்கிற செய்தியை மிக ஆழமாகவும் மனதைத்தொடும் படியும் வெளிப்படுத்தியிருக்கிற இப்போஸ்டரில் அந்தப் பெண் எந்த விதத்தில் இழிவு படுத்தப்பட்டாள் என்பது எமக்கு விளங்கவில்லை. ஒரு நிர்வாண போட்டோவையோ, அல்லது படுக்கையறை காட்சியையோ காட்சிப்படுத்தியது போல் இவரும் குறிப்பு எழுதிய மற்றவர்களும் பதற்றப்படுவதற்கு அவசியமே இல்லை.

 

3. இன்றைய ஊடகத் துறையில் தினசரி பத்திரிகை தொட்டு அனைத்து சஞ்சிகைகளிலும் பாதிக்கப்படுபவர்களின் புகைப்படங்கள பரவலாக பிரசுரிக்கப்படுகின்றன. அவர்களுள் எவரையும் மானபங்க படுத்துவதற்காக அவ்வாறு பிரசுரிப்பதில்லை. செய்தியின் கனதியை அப்புகைப்படம் அதிகரிக்கும் என்பதனாலேயே அவை பிரசுரிக்கப்படுகின்றன. கட்டுரையாளர் சொல்வது போல எடுத்துக் கொண்டால் எந்தப் பத்திரிகையிலும் எந்தப்படத்தையும் எவரும் பிரசுரிக்க முடியாது.

4. குறிப்பிட்ட புகைப்படம் பாதிக்கப்பட்ட கவலை மிகுந்த எதிர்பார்ப்புகள் சிதைந்த முஸ்லிம் பெண் ஒருவரை தத்மூபமாக சித்தரிக்கிறது என்பதே அப்புகைப்படத்தின் சிறப்பாகும். இது போன்ற கலையம்சம் பொருந்திய புகைப்படங்கள் பல கண்காட்சிகளில் காட்சிக்கு வைக்கப்படுவதுண்டு . இந்த புகைப்படம்கூட சர்வதேச ரீதியில் பயன்படுத்தப்பட்டிருக்கும். அங்கெல்லாம் போய் கட்டுரையாளர் அழுது வடியப்போகின்றாரா?

 

முஸ்லிம்களின் எரியும் பிரச்சினைகளை எடுத்துச் சொல்ல முஸ்லிம் காங்கிரஸ் பயன்படுத்தியிருக்கும் இந்த புதிய அணுகுமுறையால் முஸ்லிம் காங்கிரஸுக்கு அதிகரிக்கிற மக்கள் அலையைக் கண்டு இவர் அதிர்ச்சிக்குள்ளாயிருப்பது நன்றாகவே தெரிகிறது.

 

அக்கட்டுரையாளர் முஸ்லிம் காங்கிரஸின் எதிரணியை சேர்ந்தவர் என்பது அவருடைய கட்டுரையின் பல இடங்களிலும் தெளிவாக தெரிகிறது இவர்களைத்தான் ஆடு நனைவதை கண்டு அழும் ஓநாய்கள் என்று சொல்வார்கள்.