கிழக்கு தேர்தலில் மு.கா. க்கு 2 ஆசனங்களே கிடைக்கும் - அதாவுல்லா கணிப்பு

கிழக்கு மாகாணசபைத் தேர்தலில் ஐக்கிய மக்கள் சுதந்திர முன்னணி அமோக வெற்றிபெற்று எக்கட்சியின் உதவியுமின்றி தனியாக ஆட்சி அமைக்கும் என அமைச்சர் ஏ.எல்.எம்.அதாவுல்லா தெரிவித்தார். அக்கரைப்பற்று அதாவுல்லா அரங்கில் நடைபெற்ற கூட்டமொன்றில் கலந்துகொண்டு உரையாற்றிய போதே அவர் மேற்கண்டவாறு கூறினார். அவர் மேலும் கூறுகையில்,

 

கிழக்கு மாகாண மக்கள் மத்தியில் ஐக்கிய மக்கள் சுதந்திர முன்னணியின் செல்வாக்கு நாளுக்கு நாள் அதிகரித்து வருகின்றது. கொடூர யுத்தத்தை முடிவுக்குக் கொண்டு வந்து, நிம்மதி வாழ்வுக்கு வழியமைத்த ஜனாதிபதி மஹிந்த ராஜபக்ஷவுக்கு கிழக்கு மக்கள் மீண்டும் நன்றி தெரிவிக்க தேர்தலை எதிர்பார்த்துள்ளனர்.

 

2008 கிழக்கு மாகாண சபைத் தேர்தலின் போது 65 ஆயிரமாக இருந்த, தேசிய காங்கிரஸ் கட்சியின் வாக்கு வங்கி இன்று கணிசமானளவு அதிகரித்துள்ளது. அட்டாளைச்சேனை, நிந்தவூர், மருதமுனை, சம்மாந்துறை மற்றும் பொத்துவில் போன்ற ஊர்களில் அன்றிருந்த நிலை இன்றில்லை. இன்று தேசிய காங்கிரஸ் கட்சியின் பலம் மேலும் அதிகரித்துள்ளது.

 

எதிர்வரும் கிழக்கு மாகாண சபைத் தேர்தலில் ஸ்ரீலங்கா முஸ்லிம் காங்கிரஸ் கட்சிக்கு திகாமடுல்ல மாவட்டத்தில் இரு ஆசனங்கள் கிடைக்கும். மட்டக்களப்பு, திருகோணமலை மாவட்டங்களில் எதுவித ஆசனங்களும் கிடைக்காது. அந்தளவுக்கு அக்கட்சியின் செல்வாக்கு வீழ்ச்சி கண்டுள்ளது.

 

முஸ்லிம் காங்கிரஸ் தலைவர் ரவூப் ஹக்கீம், கிழக்கில் ஒன்றையும், வடக்கில் ஒன்றையும், வடக்கு, கிழக்குக்கு வெளியில் ஒன்றையும் கூறிவருகின்றார். அவரிடம் நிலையான கொள்கையில்லை. இது கட்சித் தலைவருக்குரிய பண்பல்ல.

 

கிழக்கு முஸ்லிம்களுக்காக தற்போது நீலிக்கண்ணீர் வடிக்கும் தமிழ்த் தேசிய கூட்டமைப்புடன் இணைந்து பகற் கனவு காண்கின்றார். வடக்குடன் கிழக்கை இணைக்கும் ஈனச் செயலுக்கு துணை போகின்றார். இதற்கு நாமும், கிழக்கு மக்களும் ஒருபோதும் அனுமதிக்கப் போவதில்லை.

 

தலைவர் ஹக்கீமின் கடந்தகால பத்திரிகைச் செய்திகளைப் புரட்டிப் பார்ப்பவர்களுக்கு உண்மை நிலை தெரியும். கடந்த பாராளுமன்றத் தேர்தலின் போது அட்டாளைச்சேனையைச் சேர்ந்த கிழக்கு மாகாண சபை முன்னாள் உறுப்பினர் ஒருவருக்கு தேசியப் பட்டியல் பாராளுமன்ற பிரதிநிதித்துவம் வழங்குவதாகக் கூறி, பின்னர் வாக்குறுதியை காற்றில் பறக்க விட்டார். தற்போது இனவாதத்தைத் தூண்டி ஆதரவு தேடுகின்றார்.

 

நாம் அன்று பேசியதற்கும் இன்று பேசுவதற்கும் எந்தவித வேறுபாடுகளும் கிடையாது. மக்களை ஏமாற்ற வேண்டிய எந்தத் தேவைப்பாடும் எமக்குக் கிடையாது எனவும் அவர் மேலும் தெரிவித்தார்.