மியன்மார் முஸ்லிம்களுக்காக பிரார்த்தியுங்கள் - ஜம்இய்யதுல் உலமா வேண்டுகோள்

“முஃமின்கள் யாவரும் சகோதரர்களாவர்” இது இறைவாக்காகும். “ஒரு முஸ்லிம் அடுத்த முஸ்லிமின் சகோதரனாவான்” என நபி ஸல்லல்லாஹு அலைஹி வஸல்லம் அவர்கள் கூறினார்கள். இதற்கமைய முஸ்லிம்களின் விடயத்தில் சகோதர முஸ்லிம்கள் கரிசனை காட்டுவதும், அவர்களுக்கு உதவி செய்வதும், ஒத்துழைப்பு நல்குவதும், அவர்களுக்காக பிரார்த்திப்பதும் ஈமானில் நின்றும் உள்ளதாகும். மனிதாபிமானத்தின் அடிப்படையில் முஸ்லிம் அல்லாதவர்களுக்கும் உதவி ஒத்துழைப்பு நல்குமாறும் இஸ்லாம் கட்டளையிடுகின்றது.

அண்மையில் பர்மா மியன்மாரில் நடைபெற்றுவரும் மனிதப் படுகொலைகள் முழு உலக மக்களின் உள்ளங்களையும் கவலை கொள்ளச்செய்கின்றது. பெருந்தொகையான முஸ்லிம்கள் கொன்று குவிக்கப்பட்டு, உடைமைகள் அழிக்கப்பட்டு, மஸ்ஜித்கள் மற்றும் வீடுகள் தீக்கிரையாக்கப்பட்டு வரலாறு காணாத அழிவுகளை அவர்கள் எதிர் கொண்டுள்ளனர். புனித ரமழான் மாதத்தில் நோன்பு நோற்க்கக்கூட  முடியாமல் தவிக்கின்றார்கள். 

எனவே, அவர்களுக்காக குறிப்பாக, எதிர்வரும் வெள்ளிக்கிழமை ஜும்ஆத் தொழுகையின் பின் பிரார்த்தனை செய்யுமாறும், பொதுவாக சகல நேரங்களிலும் அவர்களுக்காகவும், சிரியா நாட்டைச் சேர்ந்த முஸ்லிம்களுக்காவும், மற்றும் அல்லற்படும் சகல முஸ்லிம்களுக்காவும் துஆச் செய்யுமாறும் அகில இலங்கை ஜம்இய்யதுல் உலமா வேண்டிக்கொள்கின்றது.   

அஷ்ஷைக் எம்.எஸ்.எம். தாஸீம்

உதவிப் பொதுச் செயலாளர்

அகில இலங்கை ஜம்இய்யதுல் உலமா