பெருநாள் தினத்தன்று சதமடித்த ஹாசிம் அம்லா..!

இங்கிலாந்து அணிக்கெதிரான மூன்றாவது மற்றும் கடைசி டெஸ்டில், தென்னாப்பிரிக்க வீரர் ஹாசிம் ஆம்லா தனது 16வது சதத்தை அடைந்துள்ளார். இங்கிலாந்துக்கு சுற்றுப்பயணம் மேற்கொண்டுள்ள தென்னாப்பிரிக்க அணி, இங்கிலாந்து அணியுடன் 3 போட்டிகள் கொண்ட டெஸ்ட் தொடரில் விளையாடி வருகிறது.
 
இந்நிலையில் இரு அணிகளுக்கு இடையில் லோர்ட்சில் நடைபெற்று வரும் மூன்றாவது மற்றும் கடைசி டெஸ்ட் போட்டியின் இரண்டாவது இன்னிங்சில் ஹாசிம் ஆம்லா சதமடித்து அசத்தியுள்ளார். அவர் இதன்மூலம், சர்வதேச டெஸ்ட் அரங்கில் தனது 16வது சதத்தை நிறைவு செய்தார்.
 
மூன்றாம் நாள் ஆட்டநேர முடிவில், தென்னாப்பிரிக்க அணி இரண்டாவது இன்னிங்சில் 3 விக்கெட் இழப்புக்கு 145 ஓட்டங்கள் எடுத்திருந்தது.  ஹாசிம் ஆம்லா (57), ஸ்டைன் (0) ஆட்டமிழக்காமல் இருந்தனர். நேற்று நான்காவது நாள் ஆட்டம் ஆரம்பமானது, ஸ்டைன் 9 ஓட்டங்களில் வெளியேறினார். தொடர்ந்து சிறப்பான ஆட்டத்தை வெளிப்படுத்திய ஆம்லா 121 ஓட்டங்கள் எடுத்த நிலையில், ஸ்டீவன் பின் பந்தில் ஆட்டமிழந்தார்.

நேற்று ஞாயிற்றுக்கிழமை இங்கிலாந்தில் முஸ்லிம்கள் புனித நோன்புப் பெருநாளை கொண்டாடினர். இப்போது சில வாரங்களுக்கு  முன்னரும் ஹாசிம் அம்லா நோன்பு பிடித்த நிலையில் சமடித்து சாதனை படைத்திருந்தமை குறிப்பிடத்தக்கது.