சிறைக் கைதியின் விடுதலைக்கு உதவிய ரவூப் ஹக்கீம் (படம் இணைப்பு)

நீதிமன்றத்திற்கு செலுத்த வேண்டிய பணத்தை செலுத்துவதற்கு வசதியில்லாத காரணத்தினால் மட்டக்களப்பில் நான்கு மாதங்கள் சிறைவாசம் அனுபவிக்கும் ஒருவரின் விடுதலைக்காக உரிய தொகையை நீதியமைச்சர் ரவூப் ஹக்கீம் பிரஸ்தாப நபரின் தாயாரிடம் வழங்கியுள்ளார்.

ஏறாவூரிலுள்ள அமைந்துள்ள குல்லியதுல் தாருல் உலூம் அரபுக்கல்லூரியை பார்வையிடுவதற்கு ஸ்ரீ லங்கா முஸ்லிம் காங்கிரஸ் தலைவரும், நீதியமைச்சருமான ஹக்கீம் அங்கு அண்மையில் சென்றிரந்த பொழுது சம்மந்தப்பட்டவரின் தாயாரான காத்தான்குடியைச் சேர்ந்த சித்தி உம்மா என்பவரிடம் அதற்கான பணத்தை அவர் கையளித்துள்ளார். அப்பொழுது அந்த அரபுக் கல்லூரியை பரிபாலித்து வரும் ஹாபிஸ் நஸீர் அஹமதும் உடனிருந்தார்.

அமைச்சர் ஹக்கீம் மட்டக்களப்பு சிறைச்சாலைக்கு சென்றிருந்த பொழுது, அங்கிருந்த முஸ்லிம் சிறைக் கைதிகள் புனித நோன்பை நோற்ப்பதற்கும், இப்தாருக்குமான ஏற்பாடுகள் பற்றி கேட்டறிந்ததோடு, அவர்களின் குறைபாடுகள் பற்றியும் அளவளாவினார். அவற்றிக்கான உரிய நடவடிக்கைகளை மேற்கொள்வதாகவும் அமைச்சர் அவர்களிடம் தெரிவித்தார்.

அப்பொழுது அங்கிருந்த சிறைக்கைதி ஒருவர் அமைச்சரை அணுகி, தாம் செலுத்த வேண்டிய பணத்தை செலுத்த வசதியற்ற ஒரே காரணத்திற்காக நான்கு மாதங்கள் சிறையில் வாடுவதாகக் கூறிய பொழுது கவலையடைந்த அவர், விடுவிப்பதற்காக தேவைப்படும் பணத்தை வழங்குவதாகவும் கூறியிருந்தார்.