முஸ்லிம் காங்கிரஸ் இனக் கலவரத்தை தூண்டிவிட முயலுகிறதா..?

TM

மலிவான அரசியல் இலாபத்துக்காக, வெறுப்பூட்டும் அறிக்கைகளை வெளியிடுவதன்மூலம்; மக்களிடையே இன, மத, குரோத உணர்வை ஸ்ரீலங்h முஸ்லிம் காங்கிரஸ் பரப்பி வருவதாக விஞ்ஞான தொழில்நுட்ப பிரதி அமைச்சர் பைஸர் முஸ்தபா குற்றம் சுமத்தியுள்ளார்.

 காவியுடை பயங்கரவாதம் குறித்து அண்மையில் ஸ்ரீலங்கா முஸ்லிம் காங்கிரஸ் பேசியதாக ஊடகங்கள்  செய்தி வெளியிட்டுள்ளன. இது இன குரோதத்தை தூண்டிவரும் அதன் நோக்கத்தை தெளிவாக எடுத்துக்காட்டுகின்றது என டெய்லிமிரருக்கு பைஸர்; முஸ்தபா தெரிவித்தார். 

காவியுடை பயங்கரவாதம் என்பது சற்றும் பொறுப்பில்லாத ஒரு கருத்து வெளிப்பாடு ஆகும். இது நாட்டிலுள்ள சகல பௌத்த குருமாரையும் ஒட்டுமொத்தமாக தாக்குகின்றது என அவர் கூறினார்.

 'இனவாத அரசியலால் தேர்தலை வெல்லக்கூடும். ஆனால் இதற்கு கொடுக்க வேண்டிய விலை மிக உயர்வானதாக இருக்கும். நீங்கள் மீண்டும் இனக்கலவரம் ஒன்றை தூண்டிவிடப் போகின்றீர்களா? ஸ்ரீலங்கா முஸ்லிம் காங்கிரஸ் இதை நிறுத்த வேண்டும். தாம் புனித குர் ஆன் வழி நடப்பதாக ஸ்ரீலங்கா முஸ்லிம் காங்கிரஸ் கூறுகின்றது. அல்லாஹ்வின் தூதுவர் ஏனைய சமயத்தவர்களை பள்ளிவாசல்களில் தமது சமயக் கடமைகளை செய்யுமாறு அழைத்துள்ளார். இந்த நாட்டை முன்னேற்ற வேண்டுமாயின் நாம் மதசார்பற்றவர்களாக இருக்க வேண்டும்.

 இப்போது ஸ்ரீலங்கா முஸ்லிம் காங்கிரஸ் அதன் முன்னைய அரசியல் கொள்கையிலிருந்து விலகிவிட்டது. இது இப்போது மலிவான அரசியல் தந்திரங்களில் ஈடுபட்டு தனது நோக்கத்தை நிறைவேற்ற முயல்கின்றது என பிரதி அமைச்சர் கூறினார்.

 அஷ்ரப் இருந்த காலத்தில் ஸ்ரீலங்கா முஸ்லிம் காங்கிரஸ் ஒரு பெரும் சக்தியாக இருந்தது. அது முஸ்லிம் மக்களின் நலனில் முழுக் கவனத்தையும் செலுத்தியது. ஆனால் இன்று அது எப்படி அதிகாரத்தில் தொடர்ந்தும் இருக்கலாம் என்பதையிட்டே அக்கறைப்படுகிறது.

 ஒரு அரசியல்கட்சி மக்களை வழிநடத்தும் முறைமை கொண்டே மதிப்பிடப்படுகின்றது. அந்த வகையில் ஸ்ரீலங்கா முஸ்லிம் காங்கிரஸ் தோல்விக்கண்டுள்ளது என நான் நினைக்கின்றேன்' என அவர் கூறினார்.