அதாவுல்லாவின் நாடகம்...!!

ஒமர் பாருக்

 

கிழக்கு மாகாண சபைத்தேர்தல் நெருங்கி வரும் இவ்வேளையில் தனது பங்கிற்கு ஐ.ம.சு.கூ. இல் வேட்பாளர்களாக நிறுத்தப்பட்டிருக்கும் வேட்பாளர்களை ஆதரித்து அக்கரைப்பற்றில் அமைச்சர் அதாஉல்லா ஒரு துண்டுப் பிரசுரத்தை வெளியிட்டிருக்கின்றார்.

 

”கிழக்கு மாகாண சபைத் தேர்தல் – 2012, அக்கரைப்பற்று மக்கள் பிரகடனம்” எனும் தலைப்புடன் இத்துண்டுப் பிரசுரம் வெளியிடப்பட்டிருக்கின்றது. தனது வேட்பாளர்களை வெல்லவைப்பதற்கான வியுகம் என தான் வகுத்திருக்கும் திட்டத்தை இதில் அமைச்சர் அதாஉல்லா விளக்கியிருக்கின்றார்.

 

இந்தத் துண்டுப் பிரசுரத்தின் இறுதிப் பகுதிதான் மக்கள் மத்தியில் சந்தேகத்தைக் கிளப்பியிருக்கின்றது. இப்பகுதியில் முதலாவதாக “கௌரவ செயலாளர், ஜம்இய்யதுல் உலமா” எனும் குறிப்புடன் மௌலவி ஏ.ஆர்.ஏ. மானாப்கான் கையொப்பமிட்டுள்ளார். அதனைத் தொடர்ந்து அக்கரைப்பற்றிலுள்ள 11 பள்ளிவாயல்களின்  செயலளர்கள் கையொப்பமிட்டுள்ளனர். தொடர்ந்து 13 வதாக ”வர்த்தக சங்கம் உட்பட ஏனய பல பொது நிறுவனங்களும் இதில் கையொப்பமிட்டுள்ளன” எனும் வாசகம் பொறிக்கப்பட்டுள்ளது. ஆனால் கையொப்பங்கள் இல்லை.

 

இதில் மு,கா, வேட்பாளரான தவத்தின் ஆதரவுக் கோட்டையான பத்ர் ஜும்ஆ பள்ளிவாயல் செயலாளரும் கையொப்பம் இட்டுள்ளார் என்பதே மக்களின் சந்தேகத்தைக் கிளறிய விடயமாகும். உண்மையில் இந்த ”இப்படிக்கு” பகுதி குறித்த பிரகடனத்துடன் தொடர்புடைய பகுதி அல்ல என்றும் குறித்த பிரகடனத்துக்கும் தமக்கும் தொடர்பில்லை என்றும் அதில் காணப்படும் கையொப்பங்களுக்கு உரியவர்கள் சிலர் அறிக்கைகளைக் கசியவிட்டிருக்கின்றனர்.

 

எது எவ்வாறெனினும் குறித்த துண்டுப் பிரசுரத்தைக் கூர்ந்து நோக்கும்போது அமைச்சர் அதாஉல்லா செய்திருக்கும் கபடத்தனம் அம்பலமாகின்றது. இந்தத் துண்டுப் பிரசுரத்தின் முதல் பக்கமும் இரண்டாம் பக்கத்தின் ஆரம்பப் பகுதியும் publication software ஒன்றில் type செய்யப்பட்டுள்ளன. ஆனால் இந்தக் கையொப்பத்துக்கான பகுதியோ JPEG image (.jpg) file type இல் அச்சிடப்பட்டுள்ளது. அதாவது இப்பகுதி வேறொரு கையொப்பமிடப்பட்ட ஆவணத்தின் பகுதி scan செய்யப்பட்டு பின்னர் cut and paste செய்யப்பட்டுள்ளமை அம்பலமாகியுள்ளது.

 

அமைச்சர் அதாஉல்லாவின் மக்களை ஏமாற்றும் இந்த வித்தை அம்பலமாகியுள்ளதால் மக்கள் மேலும் விசனம் கொண்டுள்ளனர்.