பேரினவாதத்துடன் குடும்பம் நடத்திவிட்டு, தமிழர்களிடம் பங்கு கேட்கும் முஸ்லிம்கள்..!

 

முஸ்லிம்களின் தனித்துவமான தேசியத்தை ஒளித்து மறைத்துப் பேசுகின்ற போக்கை தமிழ்த் தேசியம் கைவிட வேண்டுமென்றும், முஸ்லிம் தேசியத்தை தமிழ் தேசியம் வெளிப்படையாக ஏற்க வேண்டுமென்றும், ரவுப் ஹக்கீம் எதிர்பார்ப்பது நியாயமானதாகும்  என மனோ கணேசன் குறிபிட்டுள்ளார். இதுகுறித:து தனது பேஸ்புக் பக்கத்தில் அவர் மேலும் குறிப்பிட்டுள்ளதாவது,

முஸ்லிம்கள் தம்மை தனி ஒரு தேசிய இனமாக அறிவித்துக்கொண்டு ரொம்ப நாளாச்சு! முஸ்லிம்களை இன்னமும் பிடிவாதமாக தமிழர்கள் என்று அடையாளப்படுத்தும் காலம் மலையேறி போயாச்சு!

முஸ்லிம்களை... தனி ஒரு தேசிய இனமாக ஏற்றுகொள்வதில் தமிழ் தலைமைகளுக்கு இன்னமும் தயக்கம் இருக்கின்றது. முஸ்லிம்களை இன்னமும் 'இஸ்லாமிய தமிழர்கள்' என்ற அடைமொழிக்குள் அடைக்க நினைக்கும் தமிழ் தலைவர்களும் இருக்கிறார்கள்.

முஸ்லிம்களில் பெரும்பாலோருக்கு இன்னமும் தமிழ்தான் தாய்மொழி. ஆனால் அவர்கள் தமிழர்கள் இல்லை. இந்த அடிப்படை உண்மை சிலருக்கு கசப்பானதாக இருந்தாலும் அதை நாம் ஏற்றுக்கொள்ளத்தான் வேண்டும்.

தமிழ் தலைமைகள் முஸ்லிம்களுக்காக பேச தேவை இல்லை அல்லது காலத்துக்கு காலம், முஸ்லிம்களுக்கும் சேர்த்துதான் நாம் தீர்வை தேடுகிறோம் அல்லது பேசுகிறோம் என்று அறிவித்தல்கள் கொடுக்கவும் தேவை இல்லை. அதை முஸ்லிம் தலைமைகளிடம் விட்டு விட வேண்டும். தமக்கு உரிய தீர்வுகளை தேடுவதற்கான உரிமை முஸ்லிம் மக்களின் தலைமைகளுக்கு உண்டு.

தமிழர்களும், முஸ்லிம்களும் பரஸ்பரம் அங்கீகாரங்களை பறிமாறிகொண்டு, ஒரு நட்பு கூட்டை ஏற்படுத்திக்கொண்டால்தான், தமிழ் பேசும் சமூகம் அடுத்த கட்டத்துக்கு போக முடியும். அது நடைபெறாத வரைக்கும் சிங்கள பேரினவாதம் இரண்டு தரப்பையும் மோத விட்டு, இரண்டு இனங்களையும் வாழவே விடாது. அதுமட்டும் அல்ல, தமிழர்களினதும், முஸ்லிம்களினதும் வாழ்வாதாரங்களை பறித்து இரண்டு இனங்களினதும் இன அடையாளங்களை சிதறடித்துவிடும். அந்த கைங்கரியங்கள்தான் இன்று நடந்து வருகின்றன.

முஸ்லிம் தேசியத்தை பகிரங்கமாக ஏற்க மறுக்கும் தமிழ் தலைமைகளின் தவறைப்போல், முஸ்லிம் தலைமைகளும் தவறு விடுகின்றன. இது பற்றி நான் சமீபத்தில் சொன்ன ஒரு கருத்து பெரும் சர்ச்சையை கிளப்பியது. ஆனாலும் அது சரியான கருத்து என நான் நம்புகிறேன்.

எங்கள் தேசியத்தை நீங்கள் அங்கீகரியுங்கள், எங்களுக்காக நீங்கள் பேசாதீர்கள், எங்களுக்காக நாங்களே பேசுகிறோம் என தமிழ் தலைமைகளிடம் கூறும் முஸ்லிம் தலைமைகள், மறுபக்கத்தில் தமிழ் மக்கள் தம் போராட்டங்களின் மூலம் உருவாக்கும் (தீர்வை கொண்டு வரும்) தேசிய, சர்வதேசிய சூழல்களை மாசுபடுத்துகிறார்கள். அதுமட்டும் அல்லாமல் - போராட்டங்களில் பங்கு வகிக்காமல் அல்லது போராடாமல் இருந்துவிட்டு அல்லது பேரினவாதத்துடன் குடும்பம் நடத்திவிட்டு - தமிழர்களுக்கு உலகம் தீர்வை தேடி தர முயலும்போது அதில் தமக்கும் பங்கு வேண்டும் என கேட்கிறார்கள்.

இதற்கு காரணம் முஸ்லிம் மக்கள் அல்ல. இதற்கு ஒரே அடிப்படை காரணம் முஸ்லிம் அரசியல்வாதிகளுக்கு அமைச்சர் பதவிகளின்மீது இருக்கின்ற மோகம்தான். இது அலாதியானது., இதனால்தான் முஸ்லிம் கட்சிகளும் உடைகின்றன. முஸ்லிம் தேசிய அரசியல் வேலைத்திட்டமும் உருவாவதில்லை.

ஐநா தீர்மானம் உண்மையில் இலங்கை அரசை ஒழுங்குபடுத்தி இனப்பிரச்சினைக்கு தீர்வை தரும்படி ஒருவகையில் வலியுறுத்துகிறது. இந்த ஒரு தீர்மானத்திகாக தமிழர்கள் கொடுத்த விலை அளப்பரியது. சர்வதேச அழுத்தம் மூலம் அரசியல் தீர்வு வரும்போது அது தமிழ் மக்களுக்கு மட்டும் அல்ல, முஸ்லிம் மக்களுக்கும் தீர்வை தரும். அவர்களுக்கும் அது நன்மையை பயக்கும்.

ஆனால், பேரினவாதம் அந்த தீர்மானத்திற்கு தேசியவாத சாயம் பூசி, ஆர்ப்பாட்டங்களை முன்னெடுத்த போது, இந்நாட்டின் ஏறக்குறைய எல்லா முஸ்லிம் தலைவர்களும் பேரினவாதத்துடன் இணைந்துகொண்டு கொடி பிடித்தார்கள். தீர்மானத்தை ஆதரிக்க வேண்டாம். ஆனால் ஆர்ப்பரிக்காமலாவது இருந்திருக்கலாமே ?

முஸ்லிம் நாடுகளை தீர்மானத்திற்கு எதிராக அணி திரட்டுவதிலும், தமிழ் எதிர்ப்பை இதன்மூலம் வெளிப்படுத்துவதிலும் சில முஸ்லிம் தலைவர்கள் காட்டிய அக்கறை, ஆஹா, அற்புதம்!

ஆனால் அந்தோ பரிதாபம்! என்ன நடந்தது? ......இது நடந்து சில வாரங்களிலேயே பேரினவாதம் தன் குணத்தை தம்புள்ளையில் காட்டியது. இன்று இன்னமும் தொடர்ச்சியாக காட்டிக்கொண்டு இருக்கின்றது.

எனவே நடந்தது, நடந்ததாகவே இருக்கட்டும். எதிர்காலத்தில் தமிழர்களும், முஸ்லிம்களும் ஒருவரை ஒருவர் அங்கீகரித்து, அரவணைத்துக்கொண்டு ஜனநாயகரீதியாக போராட வேண்டும். தீர்வை தேடவேண்டும். அது சிங்கள மக்களுக்கு எதிரானதும் அல்ல.

See More