சிரியாவில் 48 ஈரானியர்கள் கடத்தப்பட்டனர்

சிரியாவில் அதிபர் பஷர் அல் ஆசாத்துக்கு எதிராக கடந்த 17 மாதங்களாக பொதுமக்கள் போராடி வருகின்றனர். இவர்களுக்கு ஆதரவாக புரட்சி படை களம் இறங்கி உள்ளது. இந்த நிலையில் வர்த்தக நகரான காலப்போவை கைப்பற்றுவதில் புரட்சி படைக்கும், ராணுவத்துக்கும் இடையே கடும் சண்டை நடக்கிறது. ஹெலிகாப்டர்களில் பறந்தபடி ராணுவம் குண்டு மழை பொழிகிறது.

நேற்று நடந்த சண்டையில் மட்டும் 150 பேர் பலியாகி உள்ளனர். இதையடுத்து தலைநகர் டமாஸ்கஸ் உள்பட அனைத்து நகரங்களிலும் கலவரம் தீவிரம் அடைந்துள்ளது.

இந்த நிலையில் சிரியா வந்த ஈரானை சேர்ந்த பக்தர்கள் 48 பேர் நேற்று தீவிரவாதிகளால் கடத்தப்பட்டனர். சிரியாவில் உள்ள சாயிதா ஷைனாப் மாவட்டத்தில் உள்ள ஷியா பிரிவினரின் புனித தலத்துக்கு ஆண்டுதோறும் ஈரானை சேர்ந்த ஆயிரக்கணக்கானவர்கள் வந்து செல்வது வழக்கம்.

அதுபோன்று நேற்று அங்கு வந்த ஈரானியர்கள் புனித தலத்துக்கு சென்று விட்டு டமாஸ்கஸ் திரும்பினர். அங்கிருந்து விமான நிலையத்துக்கு ஒரு பஸ்சில் புறப்பட்டு சென்றனர். அந்த பஸ்சை துப்பாக்கியால் சுட்டு நிறுத்தினர். பின்னர் டிரைவரை மிரட்டி பஸ்சை கடத்தி சென்றனர்.

அவர்களை மீட்கும் நடவடிக்கையில் ஈரான் தூதரக அதிகாரிகள் ஈடுபட்டுள்ளனர்.

கடந்த மே மாதம் லெபனானை சேர்ந்த 11 பேர் கடத்தப்பட்டனர். பின்னர் 3 நாட்களுக்கு பிறகு அவர்கள் விடுவிக்கப்பட்டனர்.