அதாவுல்லாவின் எதிர்ப்பு - அரசாங்கத்தின் ஏமாற்று - மு.கா. வெளியேற காரணமாகியது

கிழக்கு மாகாணசபை தேர்தலில் ஆளும் ஐக்கிய மக்கள் சுதந்திரக் கூட்டமைப்பு வேட்பாளர் பட்டியல் தொடர்பான இட ஒதுக்கீட்டில் முஸ்லிம் காங்கிஸுக்கு அம்பாறையில் 6 இடங்களை ஒதுக்க ஜனாதிபதி மஹிந்த ராஜபக்ஸ, அமைச்சர்களான பசில் ராஜபக்ஸ மற்றும் சுசில் பிரேம்ஜயந்த ஆகியோர் முன்னர் இணக்கம் வெளியிட்டிருந்தனர்.

இதனையடுத்து அமைச்சர் அதாவுல்லா மற்றும் றிசாத் பதியுதீன் ஆகியோர் அம்பாறையில் மு.கா. க்கு 6 இடங்கள் ஒதுக்கப்படுவதற்கு எதிர்ப்புத் தெரிவித்தனர். இதனையடுத்து பசில் ராஜபக்ஸ அம்பாறை மாவட்ட முஸ்லிம் காங்கிரஸ் வேட்பாளர் இட ஒதுக்கீட்டை 5 ஆக குறைத்துள்ளார்.

இதையடுத்து முஸ்லிம் காங்கிரஸ் ஆதரவாளர்கள் அரசாங்கம் தமது கட்சியை ஏமாற்றிவிட்டதாக குற்றம்சுமத்தினர். முஸ்லிம் காங்கிரஸ் வட்டாரத்திலும் அரசாங்கத்திற்கு எதிரான விசனப்போக்கு மேலோங்கியுள்ளது. முஸ்லிம் காங்கிரஸின் ஆதரவாளர்கள் ரவூப் ஹக்கீமின் இல்லத்தில்கூடி தமது ஆத்திரத்தை வெளிப்படுத்தியுள்ளனர். இதனால் மீண்டும் அரச தரப்புடன் அவசர பேச்சு நடைபெற்றுள்ளது.

இதன்போது அம்பாறையில் முஸ்லிம் காங்கிரஸுக்கு 5 இடங்கள்தான் வழங்கப்படவேண்டும் என அமைச்சர் அதாவுல்லா பிடிவாதம் பிடித்துள்ளார். மு.கா. 6 இடங்கள் வழங்கப்பட்டால் தாம் தனித்தே போட்டியிடப் போவதாகவும் மிரட்டியுள்ளார். இதனால் கட்சிகளுக்கு அம்பாறை வேட்பாளர் ஒதுக்கீட்டில் பெரும் கலவர நிலை ஏற்பட்டுள்ளது. இதையடுத்து மீண்டும் கூடி ஆராய்ந்தள்ள முஸ்லிம் காங்கிரஸ் தனித்துப் போட்டியிடுவதென்ற தீர்மானத்தை மேற்கொண்டுள்ளது.