ஸ்ரீலங்கா முஸ்லிம் காங்கிரஸின் முக்கிய தீர்மானம் இன்று வெளியாகும்..?

TN

ஸ்ரீலங்கா முஸ்லிம் காங்கிரஸின் அதியுயர் பீடம் இன்று செவ்வாய்கிழமை மாலை கூடி முக்கிய தீர்மானங்களை அறிவிக்குமென எதிர்பார்க்கப்படுகிறது.

கிழக்கு மாகாண சபைத் தேர்தலில் போட்டியிடுவது சம்பந்தமாக இறுதி முடிவைத் தீர்மானிக்கும் நிகழ்வாக இது அமையவுள்ளதுடன் கட்சியின் முடிவுகள் கிழக்கு மாகாண சபையில் அரசாங்கத்துடன் இணைந்து நிற்கும் முடிவாகவே இருக்குமெனவும் நம்பத்தகுந்த வட்டாரங்கள் மூலம் அறிய முடிகிறது.

ஸ்ரீலங்கா முஸ்லிம் காங்கிரஸ் அரசாங்கத்துடன் இணைந்து கிழக்கு மாகாண சபைத் தேர்தலில் போட்டியிடுவதற்கு சில கோரிக்கைகளை முன்வைத்திருந்தது. அந்த கோரிக்கைகளை அரசாங்கம் ஏற்றுக் கொண்டுள்ளது.

இதன்படி அம்பாறை மாவட்டத்தில் ஆறு ஆசனங்கள், மட்டக் களப்பில் 3 ஆசனங்கள், திருகோணமலையில் 3 ஆசனங்கள் என 12 ஆசனங்களை மு. கா. விற்கு வழங்க அரசாங்கம் தீர்மானித்துள்ளது.

எனினும் சக கட்சியின் வேட்பாளர்கள் களமிறங்கும் தொகுதிகள், இடங்கள் குறித்து ஐக்கிய மக்கள் சுதந்திர முன்னணிக்கும் முஸ்லிம் காங்கிரசுக்குமிடையில் இழுபறி நிலையே உள்ளது.

இதற்கு முற்றுப்புள்ளி வைக்கும் வகையில் இன்று செவ்வாய்கிழமை காலை ஐ. ம. சு. மு. பொதுச் செயலாளர் அமைச்சர் சுசில் பிரேம ஜயந்தவுடன் முக்கிய சந்திப்பொன்று இடம்பெறவுள்ளது.

இந்த சந்திப்பில் எட்டப்படும் முடிவுகளுக்கமைய இன்று செவ்வாய்கிழமை மாலை ஸ்ரீலங்கா முஸ்லிம் காங்கிரஸ் உயர் பீடம் கூடி இறுதித் தீர்மானத்தை எடுக்கும் என நம்பப்படுகிறது