மு.கா. யும், ரவூப் ஹக்கீமையும் புகழந்து தள்ளிய மின்னல் ரங்கா - தாருஸ்ஸலாமில் அதிசயம் (படங்கள்)

செய்தி - ரவூப் ஹஸீர்

பட உதவி - அஷ்ரப் சமத்

முஸ்லிம் காங்கிரஸ் கிழக்கு மாகாணசபைத் தேர்தலில் தனித்துக் கேட்பதாக எடுத்த தீர்மானத்தை தலைவர் ரவுப் ஹக்கீம் “தாருஸ்ஸலாம்“ கேட்போர் கூடத்தில் தெரிவித்தார். கட்சி உயர் பீட உறுப்பினர்களும், பெரும்மளவு ஆதரவாளர்களும் குழுமியிருக்க நடைபெற்ற இந்த நிகழ்வில் எதிர்பாராத விருந்தினர்களாக முன்னாள் கொழும்பு மாநகரசபை உறுப்பினர் அஸாத்சாலியுடன் பாராளுமன்ற உறுப்பினர் மின்னல் ரங்காவும் வந்து கலந்துக் கொண்டனர்.

அங்கிருந்தவர்களை விளித்து ரங்கா பின்வருமாறு கூறினார்.

முஸ்லிம் காங்கிரஸ் எடுத்திருக்கும் இந்த முடிவு மிக சந்தோசகரமானதும், ஒரு சிறுபான்மை இனமான முஸ்லிம்களின் பலத்தை சர்வதேசத்துக்கும் உணர்த்துவதற்கான சரியான சந்தர்ப்பமாகும். இத்தேர்தலில் அரசின் சார்பாக இறங்கும் மற்றைய இரு கட்சிகளும் பேரளவில் முஸ்லிம்களை பிரதிநிதித்துவப்படுத்தினாலும் இந்நாட்டு முஸ்லிம்கள் தமது கட்சியாக கருதுவது ஸ்ரீ லங்கா முஸ்லிம் காங்கிரஸை மட்டுமேயாகும்.

நேற்றைய மின்னல் நிகழ்ச்சியில் கூட தொலைபேசி அழைப்பின் மூலம் தொடர்பு கொண்டவர்கள் அனைவரும் ஏன் தேசிய காங்கிரஸ் அரசை விட்டு விலகி வந்து தேர்தல் கேட்க முடியாதென்றோ, அகில இலங்கை காங்கிரஸ் ஏன் அரசை விட்டு விலகி வந்து தேர்தல் கேட்க முடியாதென்றோ கேட்கவே இல்லை. அனைவரினதும் கேள்வி ”ஏன் முஸ்லிம் காங்கிரஸ் தனித்து கேட்க முடியாது?” என்றே இருந்தது. இது முஸ்லிம் காங்கிரஸை மட்டுமே மக்கள் தங்கள் பிரச்சினைகளுக்கு தீர்வு தரும் சக்தியாக இனங்கண்டு இருக்கிறார்கள் என்பதற்கு மிகப் பெரும் சாட்சியாகும்.

உண்மையில் இந்தத் தேர்தலில் களம் இறங்கும் மிகப் பலமான மக்கள் தளத்தைக் கொண்ட தனிக்கட்சி ஸ்ரீ லங்கா முஸ்லிம் காங்கிரஸேயாகும். ஐக்கிய மக்கள் சுதந்திரக் கூட்டணி தனிக்கட்சி ஒன்றல்ல அதே போல தமிழர் விடுதலைக் கூட்டணியும் பல கட்சிகளின் கூட்டேயாகும். தனிப்பெரும் சக்தியாக முஸ்லிம் காங்கிரஸ் இந்தத் தேர்தலில் நிச்சியம் தன்னை நிருபிக்கும் என்ற நம்பிக்கை மக்களை நாடிபிடித்து பார்த்திருக்கும் எனக்கு நன்றாகவே தெரியும். இந்த தடவை முஸ்லிம் காங்கிரஸ் பெறுகின்ற இந்த மக்கள் பலம் இந்தத் தேர்தலில் மாத்திரமல்ல இதன் பிறகு குறைந்த பட்சம் இன்னும் 30 வருடங்களுக்காவது முஸ்லிம் காங்கிரஸை அசைக்க முடியாத சக்தியாக அரசியல் அந்தஸ்தை பெற்றுக் கொடுக்கும்.

தலைவர் ரவுப் ஹக்கீம் அவர்களை தவிர்க்க முடியாத காரணங்களினால் நான் விமர்சிக்க நேர்ந்திருந்தாலும் அவரின் ஆளுமை சமூகப்பற்று முஸ்லிம் காங்கிரஸின் கொள்கைகளில் சறுக்காத தன்மை என்பவை பற்றி நிறைய அறிந்து அவரின் மீது மரியாதை வைத்திருக்கிறேன். அது இன்று உறுதி படுத்தப்பட்டு இருக்கிறது.

கடந்த மின்னல்களில் கட்சியின் தவிசாளர் என் மதிப்பிற்குரிய நெருங்கிய நண்பர் பஷீர் அவர்களையும் விமர்சிக்க வேண்டிய இக்கட்டுகளுக்கு ஆளானேன். இனி வரும் மின்னல்களில் அந்த கஷ்டம் ‌எனக்கு நேராது என்பது மிகுந்த மனநிறைவை தருகிறது என்றும் ரங்கா தன் சிறிய உரையில் கூறினார்.